Ather Energy : ఓలాకు పోటీగా ఏథర్ సంచలన ప్రకటన..'రిజ్తా' విజయంతో భారీ విస్తరణ!

Ather Energy : భారతీయ ఎలక్ట్రిక్ టూ-వీలర్ కంపెనీ ఏథర్ ఎనర్జీ తన రిటైల్ నెట్‌వర్క్‌ను వేగంగా విస్తరించాలని ప్రణాళికలు రచిస్తోంది. ఆర్థిక సంవత్సరం 2025-26 చివరి నాటికి 700 ఎక్స్‌పీరియన్స్ సెంటర్‌లను తెరవాలని లక్ష్యంగా పెట్టుకున్నట్లు కంపెనీ ప్రకటించింది. ప్రస్తుతం భారతదేశంలో ఏథర్‌కు 351 కేంద్రాలు ఉండగా, నేపాల్, శ్రీలంకలలో 24 కేంద్రాలు ఉన్నాయి. మార్కెట్‌లో ఏథర్ ఎనర్జీ.. ఓలా ఎలక్ట్రిక్, హీరో ఎలక్ట్రిక్, టీవీఎస్ మోటార్ కంపెనీ, బజాజ్ ఆటో వంటి వాటికి గట్టి పోటీనిస్తోంది.

కొత్త ఎలక్ట్రిక్ స్కూటర్ 'రిజ్తా'కు లభించిన అద్భుతమైన డిమాండ్ చూసిన తర్వాత ఏథర్ ఈ నిర్ణయం తీసుకుంది . రిజ్తా కంపెనీ మొదటి ఫ్యామిలీ-ఫ్రెండ్లీ స్కూటర్, ఇది లాంచ్ అయిన మొదటి సంవత్సరంలోనే లక్ష యూనిట్ల అమ్మకాల మైలురాయిని దాటింది. దీని విజయం కంపెనీకి కేవలం పర్ఫామెన్స్ బెస్డ్ స్కూటర్ల వినియోగదారుల నుంచే కాకుండా ఫ్యామిలీ సెగ్మెంట్ నుండి కూడా కస్టమర్‌లను అందించింది. ముఖ్యంగా గుజరాత్, రాజస్థాన్, మహారాష్ట్ర, ఢిల్లీ, మధ్యప్రదేశ్, ఒడిశా, ఛత్తీస్‌గఢ్ వంటి రాష్ట్రాలలో అమ్మకాలు పెరిగాయి. ప్రస్తుతం, ఏథర్ మొత్తం అమ్మకాల్లో దాదాపు 60శాతం రిజ్తా నుంచే వస్తున్నాయి.

ప్రస్తుతం ఏథర్ సుమారు 46శాతం ఎక్స్‌పీరియన్స్ సెంటర్‌లు దక్షిణ భారతదేశంలో ఉన్నాయి. ఇక్కడే కంపెనీ తన కార్యకలాపాలను ప్రారంభించింది. ఇప్పుడు విస్తరణ ప్రధానంగా ఉత్తర భారతదేశంపై దృష్టి సారించనుంది. అక్కడ కంపెనీ తన ఉనికిని మూడు రెట్లు పెంచుకోవాలని యోచిస్తోంది. తూర్పు , పశ్చిమ భారతదేశంలో కూడా వృద్ధి కొనసాగుతుంది. రిటైల్ తో పాటు, కంపెనీ యజమాని అనుభవం పై కూడా దృష్టి పెడుతోంది. కంపెనీ మార్చి 31, 2025 నాటికి దేశవ్యాప్తంగా 3,578 ఫాస్ట్-చార్జింగ్ పాయింట్‌లను ఏర్పాటు చేసింది. ఇది భారతదేశంలోనే అతిపెద్ద టూ-వీలర్ ఛార్జింగ్ నెట్‌వర్క్‌గా మారింది. దీనితో పాటు కంపెనీ సర్వీస్ సౌకర్యాలపై కూడా పని చేస్తోంది.

ఏథర్ రిజ్తా ఒక ఫ్యామిలీ స్కూటర్, ఇది 159 కిలోమీటర్ల రేంజ్, గంటకు 80 కిలోమీటర్ల టాప్ స్పీడ్ అందిస్తుంది. కంపెనీ స్కూటర్ బ్యాటరీపై 5 సంవత్సరాల వారంటీ ఇస్తుంది. స్కూటర్‌లో 56 లీటర్ల స్టోరేజ్ ఉంది, ఇందులో 34-లీటర్ బూట్, 22-లీటర్ ఫ్రంక్ ఉన్నాయి. ఎలక్ట్రిక్ స్కూటర్‌లో స్కిడ్‌కంట్రోల్, ఆటోహోల్డ్, రివర్స్ మోడ్, రియర్ మోనోషాక్ సస్పెన్షన్, ఫాల్‌సేఫ్ వంటి ఫీచర్‌లు ఉన్నాయి. అంతేకాకుండా, ఎలక్ట్రిక్ స్కూటర్‌లో గూగుల్ మ్యాప్స్, వాట్సాప్, అలెక్సా స్కిల్స్ ఇంటిగ్రేషన్ వంటి కనెక్టెడ్ సౌకర్యాలు కూడా లభిస్తాయి. దీని ధర రూ.1.11 లక్షల నుండి రూ.1.54 లక్షల ఎక్స్-షోరూమ్ వరకు ఉంది.