Renault Triber : ఫ్యామిలీ కస్టమర్లకు పండగే.. రెనాల్ట్ 7-సీటర్ కారుపై రూ.60,000 భారీ డిస్కౌంట్

Renault Triber : మీరు మీ పెద్ద కుటుంబం కోసం తక్కువ బడ్జెట్ లో ఒక మంచి 7-సీటర్ కారును కొనాలని ప్లాన్ చేస్తున్నారా? అయితే మీకు జూలై నెల ఒక సూపర్ ఛాన్స్ అని చెప్పవచ్చు. ప్రముఖ ఆటోమొబైల్ సంస్థ రెనాల్ట్ ఇండియా తన మోస్ట్ పాపులర్ 7-సీటర్ ఫ్యామిలీ కార్ రెనాల్ట్ ట్రైబర్ పై జూలై 2026 ఆఫర్లలో భాగంగా ఏకంగా రూ.60,000 వరకు భారీ బెనిఫిట్స్ ప్రకటించింది. అయితే ఈ ఆఫర్ పరిమిత కాలం మాత్రమే అందుబాటులో ఉంటుంది. కస్టమర్ నివసించే రాష్ట్రం, ఎంచుకునే వేరియంట్, మోడల్ ఇయర్, వారి అర్హత ఆధారంగా ఈ డిస్కౌంట్ విలువలో మార్పులు ఉంటాయని కంపెనీ స్పష్టం చేసింది.

రాష్ట్రాన్ని బట్టి మారుతున్న ఆఫర్లు

కంపెనీ విడుదల చేసిన అధికారిక ఆఫర్ల జాబితా ప్రకారం.. కేరళలో రెనాల్ట్ ట్రైబర్ కారును కొనుగోలు చేసే వినియోగదారులకు గరిష్టంగా రూ.60,000 వరకు అత్యధిక లాభం చేకూరనుంది. అదేవిధంగా, గుజరాత్ రాష్ట్రానికి చెందిన కస్టమర్లకు రూ.45,000 వరకు ఈ ఆఫర్ వర్తిస్తుంది. ఇక దేశంలోని మిగిలిన మెజారిటీ రాష్ట్రాలలో కొత్తగా వస్తున్న మోడల్ ఇయర్ 2026 ట్రైబర్ కారుపై రూ.30,000 వరకు ప్రయోజనాలను అందిస్తున్నారు. మీ నగరంలో ఉన్న డీలర్‌షిప్‌ను బట్టి ఈ ఆఫర్లలో స్వల్ప మార్పులు ఉండవచ్చని సంస్థ తెలిపింది.

రూ.30,000 వరకు నేరుగా క్యాష్ డిస్కౌంట్

రెనాల్ట్ ఇండియా ప్రకటించిన ఈ ఆఫర్ ప్యాకేజీలో కస్టమర్లకు విభిన్న మార్గాల్లో లబ్ధి చేకూరనుంది. ఇందులో నేరుగా రూ.30,000 వరకు క్యాష్ డిస్కౌంట్ లభిస్తుంది. దీనితో పాటు పాత కారును మార్చుకునే వారికి ఎక్స్ఛేంజ్ బోనస్, పాత వాహనాన్ని స్క్రాప్ కింద ఇచ్చే వారికి స్క్రాపేజ్ బెనిఫిట్, పాత రెనాల్ట్ కస్టమర్ల కోసం లాయల్టీ బోనస్, రెఫరల్ బోనస్, కార్పొరేట్ ఉద్యోగుల కోసం ప్రత్యేక డిస్కౌంట్లు కూడా ఉన్నాయి. అయితే ఈ ఆఫర్లన్నీ అందరు కస్టమర్లకు ఒకేలా వర్తించవు. మీరు ఎంచుకునే వేరియంట్, స్టాక్ లభ్యతను బట్టి డిస్కౌంట్ మారుతుంది కాబట్టి, కారు కొనేముందు మీ సమీపంలోని అధికారిక రెనాల్ట్ షోరూమ్‌ను సంప్రదించడం మంచిది.

కేవలం రూ.5.81 లక్షల ప్రారంభ ధర

రెనాల్ట్ ట్రైబర్ ప్రస్తుతం భారత మార్కెట్లోనే అత్యంత చౌకైన 7-సీటర్ ఎంపీవీ కార్లలో ఒకటిగా గుర్తింపు పొందింది. ఈ కారు ఎక్స్-షోరూమ్ ధర రూ.5.81 లక్షల నుంచి ప్రారంభమై టాప్ వేరియంట్ రూ.8.48 లక్షల వరకు మాత్రమే ఉంది. ఈ బడ్జెట్ ధరలోనే ఇది మార్కెట్ లీడర్ అయిన మారుతి సుజుకి ఎర్టిగా కారుకు గట్టి పోటీ ఇస్తోంది. ఈ కారుకున్న ప్రత్యేకత ఏమిటంటే దీని మాడ్యులర్ సీటింగ్ లేఅవుట్. మన అవసరానికి తగ్గట్లుగా వెనుక సీట్లను పూర్తిగా మడతపెట్టుకోవచ్చు లేదా పూర్తిగా తీసేయవచ్చు. దీనివల్ల ఎక్కువ మంది ప్రయాణించడానికే కాకుండా, లగేజ్ ఎక్కువగా ఉన్నప్పుడు భారీ స్పేస్ క్రియేట్ చేసుకోవడానికి వీలవుతుంది.

లీటరుకు 20 కిలోమీటర్ల అద్భుతమైన మైలేజ్

ఇంజన్ విషయానికి వస్తే.. రెనాల్ట్ ట్రైబర్‌లో 1.0-లీటర్, 3-సిలిండర్ నేచురల్లీ ఆస్పిరేటెడ్ పెట్రోల్ ఇంజన్‌ను అందించారు. మైలేజ్ పరంగా చూస్తే, ఈ కారు మాన్యువల్ గేర్‌బాక్స్ వేరియంట్ లీటరుకు ఏకంగా 20 కిలోమీటర్ల వరకు మైలేజ్ ఇస్తుందని కంపెనీ క్లెయిమ్ చేస్తోంది. అలాగే ఆటోమేటిక్ గేర్‌బాక్స్ వేరియంట్ లీటరుకు 17 కిలోమీటర్ల మైలేజీని అందిస్తుంది. అయితే మనం డ్రైవ్ చేసే రోడ్లు, ట్రాఫిక్ కండిషన్స్, డ్రైవింగ్ స్టైల్ ఆధారంగా రియల్ టైమ్ మైలేజ్ కొద్దిగా మారే అవకాశం ఉంది.

లగ్జరీ ఫీచర్లు, 6 ఎయిర్‌బ్యాగ్‌ల భద్రత

తక్కువ ధరలోనే వచ్చినప్పటికీ ఫీచర్ల పరంగా రెనాల్ట్ కంపెనీ ఎక్కడా రాజీ పడలేదు. ఈ కారులో వైర్‌లెస్ ఆండ్రాయిడ్ ఆటో మరియు ఆపిల్ కార్ ప్లే సపోర్ట్ చేసే 8-ఇంచుల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ ఇన్‌స్ట్రుమెంట్ క్లస్టర్, స్టీరింగ్ మౌంటెడ్ ఆడియో కంట్రోల్స్, వెనుక ప్రయాణీకుల కోసం రేర్ ఏసీ వెంట్స్, పుష్-బటన్ స్టార్ట్/స్టాప్, కీ-లెస్ ఎంట్రీ, కూల్డ్ సెంటర్ స్టోరేజ్ వంటి మోడ్రన్ ఫీచర్లు ఉన్నాయి. వీటన్నింటికీ మించి ప్రయాణీకుల రక్షణ కోసం ఈ కారులో 6 ఎయిర్‌బ్యాగ్‌లు వంటి పటిష్టమైన సేఫ్టీ ఫీచర్లను కూడా అందించడం విశేషం.