Defender : 5-స్టార్ రేటింగ్ ఉన్నా దక్కని ప్రాణం.. అతివేగం ముందు తలవంచిన అదిరిపోయే సేఫ్టీ ఫీచర్లు
అతివేగం ముందు తలవంచిన అదిరిపోయే సేఫ్టీ ఫీచర్లు
Defender : మనం ఎంత ఖరీదైన కారు కొన్నాం, అందులో ఎన్ని సేఫ్టీ ఫీచర్లు ఉన్నాయి అన్నది ముఖ్యం కాదు.. మనం ఆ కారును ఎంత బాధ్యతగా నడుపుతున్నాం అన్నదే మన ప్రాణాలను కాపాడుతుంది. తాజాగా హర్యానాలోని ఫరీదాబాద్లో జరిగిన ఒక ఘోర ప్రమాదం ఈ విషయాన్ని మరోసారి నిరూపించింది. ప్రపంచంలోనే అత్యంత సురక్షితమైనదిగా పేరుగాంచిన, 5-స్టార్ సేఫ్టీ రేటింగ్ కలిగిన ల్యాండ్ రోవర్ డిఫెండర్ కారులో ప్రయాణిస్తున్న ఒక 24 ఏళ్ల యువకుడు అతివేగం కారణంగా ప్రాణాలు కోల్పోయాడు. కోట్లు విలువ చేసే కారు కూడా అతడిని మృత్యువు నుంచి రక్షించలేకపోయింది.
ఈ ప్రమాదం జరిగిన తీరు చూస్తుంటే ఒళ్లు గగుర్పొడుస్తుంది. ఆ యువకుడు కారును విపరీతమైన వేగంతో నడుపుతూ, రోడ్డు పక్కన ఆపి ఉన్న ఒక డంపర్ను వెనుక నుండి బలంగా ఢీకొట్టాడు. ఈ ఢీకొన్న తీవ్రత ఎంతలా ఉందంటే, ఆ లగ్జరీ కారు ముందు భాగం మొత్తం నుజ్జునుజ్జయ్యింది. కారులో అత్యున్నత ప్రమాణాలు కలిగిన ఎయిర్బ్యాగ్లు ఉన్నప్పటికీ, అవి తెరుచుకున్నప్పటికీ ఫలితం లేకుండా పోయింది. కొన్ని నివేదికల ప్రకారం.. కారు లోపలి ఇనుప భాగాలు ఎయిర్బ్యాగ్లను కూడా చీల్చుకుంటూ డ్రైవర్ సీట్లో ఉన్న యువకుడికి తగలడంతో తీవ్ర గాయాలయ్యి అక్కడికక్కడే మరణించాడు.
భారతదేశంలో ల్యాండ్ రోవర్ డిఫెండర్ అనేది ఒక పెద్ద స్టేటస్ సింబల్. దీని ధర రూ. కోటి నుంచి ప్రారంభమై రూ.2.60 కోట్ల వరకు ఉంటుంది. కొండలు, కోనలు, బురద దారుల్లో కూడా అప్రతిహతంగా దూసుకుపోయే ఈ ఆఫ్-రోడింగ్ ఎస్యూవీకి ప్రపంచవ్యాప్తంగా మంచి పేరుంది. కానీ, ఎంతటి పవర్ఫుల్ ఇంజిన్ ఉన్నా, ఎంతటి బలమైన బాడీ ఉన్నా.. రోడ్డుపై మితిమీరిన వేగంతో ప్రయాణించినప్పుడు భౌతిక సూత్రాల ముందు టెక్నాలజీ తలవంచక తప్పదని ఈ ఘటన హెచ్చరిస్తోంది. అధిక వేగంలో ఉన్నప్పుడు కారు నియంత్రణ కోల్పోతే, ఏ సెన్సార్లు కూడా ప్రాణాలను కాపాడలేవు.
ఈ విషాద ఘటన ద్వారా మనం నేర్చుకోవాల్సింది ఒక్కటే.. రోడ్డుపై ప్రయాణించేటప్పుడు ఎప్పుడూ అప్రమత్తంగా ఉండాలి. ముఖ్యంగా రాత్రి వేళల్లో లేదా వెలుతురు తక్కువగా ఉన్నప్పుడు రోడ్డు పక్కన ఆపి ఉంచే భారీ వాహనాలను గమనించడం కష్టమవుతుంది. సీట్ బెల్ట్ ధరించడం, నిర్ణీత వేగ పరిమితిని పాటించడం, డ్రైవింగ్ చేసేటప్పుడు ఫోన్ వంటి పరధ్యానాలకు దూరంగా ఉండటం ప్రాణావసరం. కారులో ఉన్న సేఫ్టీ ఫీచర్లు మనకు అదనపు రక్షణను మాత్రమే ఇస్తాయి, కానీ డ్రైవింగ్లో మనం వహించే జాగ్రత్తలే అసలైన రక్షణ కవచాలు.