Car Buying Guide : మొదటి కారు కొంటున్నారా? ఈ తప్పులు చేశారో ఇక అంతే.. మీ జేబుకు చిల్లు పడకముందే జాగ్రత్త

Car Buying Guide : సొంత కారు కొనడం అనేది ప్రతి ఒక్కరి జీవితంలో ఒక అద్భుతమైన మైలురాయి. అది మీ కష్టార్జితానికి, విజయానికి నిదర్శనం. అయితే, ఆ ఉత్సాహంలో కొన్ని చిన్న చిన్న తప్పులు చేస్తే, ఆ కలల కారు కాస్తా భవిష్యత్తులో తలనొప్పిగా మారే ప్రమాదం ఉంది. మొదటిసారి కారు కొనేటప్పుడు కేవలం రంగు, స్టైల్ మాత్రమే కాకుండా ఆర్థిక అంశాలు, భద్రత, నిర్వహణ ఖర్చులను కూడా దృష్టిలో ఉంచుకోవాలి. మీరు కూడా మొదటిసారి కారు కొనాలని ప్లాన్ చేస్తున్నారా? అయితే ఈ స్మార్ట్ గైడ్ మీ కోసమే.

బడ్జెట్ విషయంలో పొరపాటు వద్దు

చాలామంది చేసే మొదటి తప్పు బడ్జెట్ సరిగ్గా ప్లాన్ చేసుకోకపోవడం. కేవలం నెలవారీ ఈఎంఐ మీ జీతానికి సరిపోతుందని కారు కొనేస్తారు. కానీ, కారు ఖర్చు అంటే కేవలం ఈఎంఐ మాత్రమే కాదు. పెట్రోల్/డీజిల్ ఖర్చులు, ఇన్సూరెన్స్ ప్రీమియం, సర్వీసింగ్ ఛార్జీలు, మెయింటెనెన్స్.. ఇవన్నీ కలిపితే మీ బడ్జెట్ తలకిందులు కావచ్చు. అందుకే, కారు కొనేముందే మీ మొత్తం ఆదాయం, ఇతర ఖర్చులను బేరీజు వేసుకుని, అన్నీ పోగా మిగిలే మొత్తంలోనే కారు ఖర్చులు ఉండేలా ప్లాన్ చేసుకోవాలి.

మీ అవసరమేంటో గుర్తించండి

మార్కెట్లో ఇప్పుడు హ్యాచ్‌బ్యాక్, ఎస్‌యూవీ, సెడాన్ అని వందల ఆప్షన్లు ఉన్నాయి. పక్కింటి వారు ఎస్‌యూవీ కొన్నారని మీరు కూడా అదే కొనాల్సిన పనిలేదు. మీ కారు వాడకం ఎక్కువగా సిటీలోనే ఉంటుందా? లేదా లాంగ్ డ్రైవ్స్ వెళ్తారా? మీ కుటుంబంలో ఎంతమంది ఉన్నారు? ఈ ప్రశ్నలకు సమాధానం వెతుక్కోండి. కేవలం ఫీచర్లు, హంగులు చూసి కారును ఎంచుకోకుండా, మీ జీవనశైలికి ఏ మోడల్ సరిపోతుందో లోతుగా రిసెర్చ్ చేసిన తర్వాతే ఒక నిర్ణయానికి రండి.

టెస్ట్ డ్రైవ్‌ను విస్మరించకండి

కారు చూడటానికి బాగున్నా, లోపల ఫీచర్లు అదిరిపోయినా.. రోడ్డు మీద దాని పెర్ఫార్మెన్స్ ఎలా ఉందనేది ముఖ్యం. టెస్ట్ డ్రైవ్ చేయకుండా కారును బుక్ చేయడం అతిపెద్ద పొరపాటు. డ్రైవింగ్ సీటులో కూర్చున్నప్పుడు మీకు కంఫర్ట్‌గా ఉందా? హ్యాండ్లింగ్ ఎలా ఉంది? బ్రేకింగ్ సిస్టమ్, సస్పెన్షన్ మీ ఊర్లోని రోడ్లకు తట్టుకోగలవా? వంటి అంశాలను టెస్ట్ డ్రైవ్ ద్వారానే తెలుసుకోవచ్చు. కనీసం రెండు మూడు సార్లు వేర్వేరు సమయాల్లో డ్రైవ్ చేసి చూడటం ఉత్తమం.

డీలర్లతో బేరసారాలు, డాక్యుమెంట్స్:

ఒక షోరూమ్ వారు ఆఫర్ ఇస్తున్నారని వెంటనే పడిపోకండి. వేర్వేరు డీలర్లను సంప్రదించి ధరలను, ఆఫర్లను పోల్చి చూడండి. ఇన్సూరెన్స్ విషయంలో బయట తక్కువకు దొరికే అవకాశం ఉంటే అటువైపు మొగ్గు చూపండి. అన్నిటికంటే ముఖ్యంగా, ఏ డాక్యుమెంట్‌పైన అయినా సంతకం చేసేముందు అన్ని నియమ నిబంధనలను క్షుణ్ణంగా చదవండి. ఏవైనా హిడెన్ ఛార్జీలు ఉన్నాయా? వారంటీ, సర్వీస్ ప్యాకేజీలు ఎలా ఉన్నాయి? అనే విషయాలను స్పష్టం చేసుకున్నాకే ముందుకు వెళ్లండి. అప్పుడే మీ కారు కొనుగోలు ఒక తీపి జ్ఞాపకంగా మిగిలిపోతుంది.