Ford : అమెరికాలో ఫోర్డ్ కంపెనీ సంచలన నిర్ణయం.. లక్షలాది కార్ల వెనక్కి పిలుపు

Ford : ప్రముఖ అంతర్జాతీయ ఆటోమొబైల్ దిగ్గజం ఫోర్డ్ కంపెనీ అమెరికాలో ఒకేసారి లక్షలాది కార్లను వెనక్కి పిలుస్తూ సంచలన నిర్ణయం తీసుకుంది. తమ కంపెనీకి చెందిన సుమారు 2,55,404 వాహనాలలో ఒక ప్రమాదకరమైన సాంకేతిక లోపం ఉన్నట్లు కంపెనీ గుర్తించింది. కార్ల భద్రతకు ముప్పు వాటిల్లడమే కాకుండా, కస్టమర్ల డ్రైవింగ్ అనుభవాన్ని తీవ్రంగా దెబ్బతీసే అవకాశం ఉన్నందున ఈ నిర్ణయం తీసుకున్నట్లు సంస్థ ప్రకటించింది.

కార్లను ఆపేస్తున్న కానిస్టర్ పర్జ్ వాల్వ్ సమస్య

ప్రస్తుతం ఫోర్డ్ కార్లలో గుర్తించిన ప్రధాన సమస్య కానిస్టర్ పర్జ్ వాల్వ్ కు సంబంధించినది. కారులోని ఇంధన వ్యవస్థలో ఉత్పత్తయ్యే రసాయన వాయువులను, గ్యాసులను నియంత్రించడంలో ఈ పార్ట్ అత్యంత కీలక పాత్ర పోషిస్తుంది. ఒకవేళ ఈ వాల్వ్ గనుక సరిగ్గా పని చేయకపోతే, అది నేరుగా కారు ఇంజన్‌పై తీవ్ర ప్రభావాన్ని చూపిస్తుంది. దీనివల్ల కారు రోడ్డుపై వేగంగా ప్రయాణిస్తున్న సమయంలోనే ఇంజన్ హఠాత్తుగా ఆగిపోయే ప్రమాదం ఉంది. రన్నింగ్‌లో ఉన్న కారు ఒక్కసారిగా ఆగిపోతే వెనుక వచ్చే వాహనాలు ఢీకొని పెద్ద ప్రమాదాలు జరిగే అవకాశం ఉండటంతో ఫోర్డ్ అలర్ట్ అయింది.

ఏ ఏ మోడల్స్ కార్లపై ఈ ప్రభావం పడింది?

ప్రముఖ అంతర్జాతీయ వార్తా సంస్థ రాయిటర్స్ నివేదిక ప్రకారం, ఈ భారీ రీకాల్ ప్రభావం ప్రధానంగా 2012 నుంచి 2018 సంవత్సరాల మధ్య కాలంలో తయారైన ఫోర్డ్ ఫోకస్ కార్లపై పడింది. ఆశ్చర్యకరమైన విషయం ఏంటంటే.. ఇందులో కొన్ని కార్లకు గతంలోనే కంపెనీ సర్వీసింగ్ సమయంలో రిపేర్లు చేసింది. అయితే ఆ పాత మరమ్మతులు సరిగ్గా సత్ఫలితాలను ఇవ్వలేదని, లోపం అలాగే కొనసాగుతోందని గుర్తించడంతో, కంపెనీ ఇప్పుడు మళ్లీ రెండోసారి ఆయా కార్లను క్షుణ్ణంగా తనిఖీ చేసి పూర్తిగా బాగు చేయాలని నిర్ణయించింది.

కస్టమర్లకు రూపాయి ఖర్చు లేకుండా ఫ్రీ సాఫ్ట్‌వేర్ అప్‌డేట్

అమెరికాకు చెందిన ప్రముఖ రోడ్డు భద్రతా నియంత్రణ సంస్థ ఎన్‌హెచ్‌టీఎస్‌ఏ ఈ రీకాల్‌కు సంబంధించిన పూర్తి వివరాలను అధికారికంగా వెల్లడించింది. దీని ప్రకారం, ఫోర్డ్ కంపెనీకి చెందిన డీలర్లు బాధితుల కార్లలోని పవర్‌ట్రెయిన్ కంట్రోల్ మోడ్యూల్ సాఫ్ట్‌వేర్‌ను పూర్తిగా అప్‌డేట్ చేస్తారు. ఈ సర్వీసింగ్ ప్రక్రియ అంతా ఉచితంగా చేయబడుతుంది. కస్టమర్ల నుండి ఎలాంటి అదనపు రుసుము వసూలు చేయరు.

డాష్ బోర్డుపై వార్నింగ్ లైట్లు.. ఇవే ఆ లోపానికి సంకేతాలు

కారులో ఈ కానిస్టర్ వాల్వ్ సమస్య ఉందని తెలుసుకోవడానికి కొన్ని ముఖ్యమైన గుర్తులు ఉన్నాయని నిపుణులు చెబుతున్నారు. కారు నడుపుతున్నప్పుడు డాష్ బోర్డుపై మాల్‌ఫంక్షన్ ఇండికేటర్ లైట్ వెలుగుతుంటే కారులో ఏదో లోపం ఉందని అర్థం చేసుకోవాలి. దీనితో పాటు, ఇంధన సూచీ కస్టమర్లకు తప్పుడు సమాచారాన్ని చూపిస్తుంది. అంటే కారు ట్యాంక్‌లో పెట్రోల్ ఎంత ఉందనే విషయాన్ని అది కరెక్ట్‌గా డిస్‌ప్లే చేయదు.

కస్టమర్ల భద్రతకే మా మొదటి ప్రాధాన్యత: ఫోర్డ్

ఈ వ్యవహారంపై ఫోర్డ్ కంపెనీ స్పందిస్తూ.. కస్టమర్ల ప్రాణాల రక్షణ, భద్రతకే తాము అత్యంత ప్రాధాన్యత ఇస్తామని స్పష్టం చేసింది. రోడ్డుపై ఎలాంటి ప్రమాదాలు లేదా అవాంఛనీయ సంఘటనలు జరగకముందే ముందస్తు జాగ్రత్తగా ఈ లోపాన్ని సరిదిద్దాలని భావిస్తున్నట్లు తెలిపింది. 2012-2018 కాలం నాటి ఫోర్డ్ ఫోకస్ కార్లు ఉన్న వినియోగదారులు వెంటనే తమకు దగ్గరలోని ఫోర్డ్ సర్వీస్ సెంటర్‌ను సంప్రదించి, తమ వాహనాన్ని ఉచితంగా చెక్ చేయించుకోవాలని కంపెనీ సూచించింది.