Kawasaki: రెట్రో లుక్.. పవర్‌ఫుల్ 649cc ఇంజిన్.. కవాసాకి నుంచి పవర్‌ఫుల్ బైక్ విడుదల
పవర్‌ఫుల్ బైక్ విడుదల
Kawasaki: ప్రముఖ జపనీస్ లగ్జరీ బైకుల తయారీ సంస్థ కవాసాకి భారతీయ మార్కెట్లోకి తన సరికొత్త మిడిల్‌వెయిట్ మోటార్‌సైకిల్ కవాసాకి Z650RS MY27 మోడల్‌ను అధికారికంగా విడుదల చేసింది. కంపెనీ ఈ నవీకరించిన బైక్ ప్రారంభ ఎక్స్-షోరూమ్ ధరను రూ. 7.83 లక్షలుగా నిర్ణయించింది. పాత క్లాసిక్ రెట్రో డిజైన్‌ను ఆధునిక రైడింగ్ సాంకేతికతతో సమ్మేళనం చేస్తూ రూపొందించిన ఈ బైక్ ప్రధానంగా స్పోర్టీ రైడర్లను ఆకట్టుకునేలా మార్కెట్లోకి అడుగుపెట్టింది.
క్లాసిక్ రెట్రో డిజైన్.. మోడ్రన్ లుక్
ఈ కొత్త బైక్ డిజైన్ పాతకాలపు క్లాసిక్ మోటార్‌సైకిళ్ల శైలిని ప్రతిబింబిస్తుంది. ఇందులో గుండ్రటి ఎల్‌ఈడీ హెడ్‌ల్యాంప్, మస్కులర్ ఫ్యూయల్ ట్యాంక్, వెనుక వైపు ఫ్లాట్ డిజైన్ సీటు అమర్చారు. క్లాసిక్ స్పోక్ వీల్స్ లా కనిపించే ప్రత్యేకమైన అలాయ్ వీల్స్ ఈ వాహనానికి ప్రధాన ఆకర్షణగా నిలుస్తాయి. ఇన్స్ట్రుమెంట్ క్లస్టర్ విభాగంలో స్పీడోమీటర్, టాకోమీటర్ కోసం రెండు విడివిడి అనాలోగ్ మీటర్లు ఇచ్చారు. వాటి మధ్యలో రైడింగ్ సమాచారాన్ని అందించే మల్టీ-ఫంక్షన్ ఎల్‌సిడి స్క్రీన్‌ను అమర్చడం విశేషం.
649cc పవర్‌ఫుల్ పారలల్-ట్విన్ ఇంజిన్
ఇంజిన్ విషయానికి వస్తే ఈ బైక్‌లో 649cc లిక్విడ్-కూల్డ్, ఫోర్-స్ట్రోక్ పారలల్-ట్విన్ ఇంజిన్ అమర్చారు. ఇది 8,000 rpm వద్ద 68 PS పవర్, 6,700 rpm వద్ద 64 Nm టాపింగ్ టార్క్‌ను ఉత్పత్తి చేస్తుంది. 6-స్పీడ్ గేర్‌బాక్స్‌తో అనుసంధానించిన ఈ ఇంజిన్‌లో అసిస్ట్ అండ్ స్లిప్పర్ క్లచ్ సౌకర్యాన్ని అందించారు. దీనివల్ల క్లచ్ ఉపయోగించడం చాలా తేలికగా మారడమే కాకుండా, వేగంగా గేర్లు తగ్గించే సమయంలో వెనుక చక్రం స్కిడ్ కాకుండా రక్షణ లభిస్తుంది.
భద్రతకు ప్రాధాన్యత.. కవాసాకి ట్రాక్షన్ కంట్రోల్
రైడర్ల భద్రత కోసం కవాసాకి స్పెషల్ కేటీఆర్‌సి సిస్టమ్‌ను ఇందులో చేర్చింది. ఈ సిస్టమ్ రెండు వేర్వేరు మోడ్లలో పనిచేస్తుంది. రైడర్లు తమ ప్రయాణ అవసరాలకు అనుగుణంగా అనుకూలమైన మోడ్‌ను ఎంచుకోవచ్చు, లేదా పూర్తిగా నిలిపివేసే వెసులుబాటు కూడా ఉంది. ముందు వైపు రెండు 300mm డిస్క్ బ్రేకులు, వెనుక వైపు 220mm డిస్క్ బ్రేకులు అమర్చి బ్రేకింగ్ సిస్టమ్‌ను మరింత సమర్థవంతంగా తీర్చిదిద్దారు.
అద్భుతమైన రైడింగ్ పొజిషన్
ఈ బైక్ తయారీలో కేవలం 13.5 కిలోల బరువు ఉండే తేలికపాటి స్టీల్ ట్రెల్లిస్ ఫ్రేమ్‌ను ఉపయోగించారు. బైక్ మొత్తం కర్బ్ బరువు 192 కిలోలుగా ఉంది, ఫ్యూయల్ ట్యాంక్ సామర్థ్యం 12 లీటర్లు. బైక్‌పై నిటారుగా కూర్చునే రైడింగ్ పొజిషన్, వెడల్పాటి హ్యాండిల్‌బార్ సిటీ వీధుల్లో సులభంగా ప్రయాణించడానికి సహకరిస్తాయి. కొత్తగా వచ్చిన మెటాలిక్ కార్బన్ గ్రే రంగుతో ఈ బైక్ లగ్జరీ స్పోర్ట్స్ బైక్ ప్రియులను విశేషంగా ఆకట్టుకుంటోంది.