Maruti Suzuki : మార్చిలో రోజుకు 7,266 కార్ల సేల్.. మారుతి సుజుకి స్పీడ్ మామూలుగా లేదుగా

Maruti Suzuki : దేశీ దిగ్గజం మారుతి సుజుకి ఇండియా, మార్చి 2026 నెలలో అమ్మకాల సునామీ సృష్టించింది. గత ఏడాది ఇదే నెలతో పోలిస్తే సుమారు 5 శాతం వృద్ధిని సాధించి, మార్కెట్లో తన తిరుగులేని ఆధిపత్యాన్ని చాటుకుంది. మార్చి నెలలో మారుతి ఏకంగా 2,25,251 యూనిట్లను విక్రయించింది. గత ఏడాది మార్చిలో ఈ సంఖ్య 1,92,984గా ఉండేది. ఒక లెక్క ప్రకారం చూస్తే.. గడిచిన మార్చి నెలలో మారుతి సుజుకి రోజుకు సగటున 7,266 కార్లను అమ్మడం విశేషం. ఈ విజయంలో దేశీయ మార్కెట్‌తో పాటు విదేశీ ఎగుమతులు కూడా కీలక పాత్ర పోషించాయి.

వరుసగా మూడో ఏడాది 20 లక్షల మార్కు

2025-26 ఆర్థిక సంవత్సరం మారుతికి ఎంతో కలిసొచ్చింది. ఈ ఏడాది మొత్తం మీద కంపెనీ 24,22,713 వాహనాలను విక్రయించింది. ఇది అంతకుముందు ఏడాదితో పోలిస్తే 3 శాతం ఎక్కువ. వరుసగా మూడో ఏడాది కూడా 20 లక్షల కంటే ఎక్కువ కార్లను విక్రయించిన కంపెనీగా మారుతి రికార్డు సృష్టించింది. ఇందులో దేశీయ అమ్మకాలు 18.61 లక్షలుగా ఉండగా.. ఎగుమతులు మరియు ఇతర కంపెనీలకు సరఫరా చేసిన కార్లు కూడా మంచి వాటాను కలిగి ఉన్నాయి.

విదేశాల్లోనూ మన మారుతిదే హవా

మారుతి సుజుకి అంటే కేవలం భారత్ లోనే అనుకుంటే పొరపాటే.. విదేశాల్లోనూ ఈ కార్లకు ఫుల్ డిమాండ్ ఉంది. 2026 ఆర్థిక సంవత్సరంలో మారుతి సుజుకి ఏకంగా 4,47,774 కార్లను విదేశాలకు ఎగుమతి చేసింది. ఇది గత ఏడాదితో పోలిస్తే దాదాపు 34 శాతం పెరుగుదల. ఈ ఘనతతో మారుతి సుజుకి వరుసగా ఐదో ఏడాది కూడా భారత్ నుంచి అత్యధిక కార్లను ఎగుమతి చేసిన సంస్థగా అగ్రస్థానంలో నిలిచింది. గ్లోబల్ మార్కెట్లో మారుతి బ్రాండ్ వ్యాల్యూ ఎంతలా పెరుగుతుందో చెప్పడానికి ఈ లెక్కలే నిదర్శనం.

ఏ కార్లకు డిమాండ్ ఎక్కువ?

ముఖ్యంగా మిడిల్ క్లాస్ ఫ్యామిలీలకు ఇష్టమైన కాంపాక్ట్ కార్లు, ఎంట్రీ లెవల్ SUV విభాగంలో మారుతి హవా కొనసాగుతోంది. కొత్త డిజైన్లతో వచ్చిన లేటెస్ట్ మోడల్స్ యువతను బాగా ఆకర్షిస్తున్నాయి. చిన్న పట్టణాల్లోనూ, ట్రావెల్ ఆపరేటర్లలోనూ మారుతి కార్లకు విపరీతమైన క్రేజ్ ఉంది. రాబోయే కాలంలో ఈ జోరును మరింత పెంచడానికి కంపెనీ ఎలక్ట్రిక్ వాహనాల (EV) వైపు అడుగులు వేస్తోంది. e-VITARA వంటి ఎలక్ట్రిక్ కార్లు మార్కెట్లోకి వస్తే మారుతి అమ్మకాలు మరింత ఊపందుకోవడం ఖాయం.