Maruti Suzuki : 33 కిమీ మైలేజ్.. 5 స్టార్ సేఫ్టీ.. దేశంలోనే అత్యధికంగా అమ్ముడవుతున్న సీఎన్‌జీ కారు ఇదే

Maruti Suzuki : భారతదేశంలో మధ్యతరగతి ప్రజల నమ్మకమైన బ్రాండ్‌గా గుర్తింపు తెచ్చుకున్న మారుతి సుజుకి, డిజైర్ సీఎన్‌జీ మోడల్‌తో మార్కెట్లో భారీ విజయాన్ని అందుకుంది. ఆర్థిక సంవత్సరం 2025-26 లో ఈ కారుకు సంబంధించిన సీఎన్‌జీ వేరియంట్లు ఏకంగా 1,35,000 కంటే ఎక్కువ యూనిట్లు అమ్ముడయ్యాయి. అంటే ప్రతి నెల సగటున 11,277 మంది కస్టమర్లు ఈ కారును కొనుగోలు చేసి తమ ఇళ్లకు తీసుకెళ్లారు. కేవలం సొంత అవసరాల కోసమే కాకుండా, ట్రావెల్స్, టాక్సీ రంగంలో కూడా ఈ కారుకు విపరీతమైన డిమాండ్ ఉంది. తక్కువ నిర్వహణ ఖర్చు, ఎక్కువ కాలం మన్నికగా ఉండటమే దీనికి ప్రధాన కారణం.

బడ్జెట్ ధర, మైండ్ బ్లాక్ అయ్యే మైలేజ్

మారుతి సుజుకి డిజైర్ సాధారణ పెట్రోల్ మోడల్ ప్రారంభ ఎక్స్-షోరూమ్ ధర సుమారు రూ.6,25,000 నుంచి ప్రారంభమవుతుంది. అయితే, సీఎన్‌జీ వేరియంట్ సొంతం చేసుకోవాలనుకునే కస్టమర్లు దాదాపు రూ.8,03,000 వరకు ఖర్చు చేయాల్సి ఉంటుంది. ప్రారంభంలో ధర కాస్త ఎక్కువగా అనిపించినప్పటికీ, ఈ కారు అందించే మైలేజ్ దీర్ఘకాలంలో ఇంధన ఖర్చులను భారీగా తగ్గిస్తుంది. ఈ కారు ఒక కేజీ సీఎన్‌జీ ఇంధనానికి ఏకంగా 33.73 కిలోమీటర్ల మైలేజ్ ఇస్తుందని కంపెనీ ధృవీకరించింది. రోజువారీ ప్రయాణాలు చేసే వారికి ఇదొక అద్భుతమైన ఆప్షన్.

ప్రీమియం డిజైన్, మోడ్రన్ ఫీచర్లు

కొత్త తరం మారుతి డిజైర్ మోడల్‌ను కంపెనీ మునుపటి కంటే చాలా విలాసవంతంగా తీర్చిదిద్దింది. ఇందులో సరికొత్త ఎల్‌ఈడీ హెడ్‌ల్యాంప్‌లు, ఆకర్షణీయమైన ఫ్రంట్ గ్రిల్, మోడ్రన్ ఫాగ్ ల్యాంప్స్, షార్క్ ఫిన్ యాంటెన్నా వంటి అధునాతన డిజైన్ ఎలిమెంట్స్ ఉన్నాయి. కారు లోపలి భాగంలో 9 ఇంచుల టచ్‌స్క్రీన్ ఇన్‌ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, యాపిల్ కార్‌ప్లే, క్రూయిజ్ కంట్రోల్, ఆటోమేటిక్ ఏసీ, సన్‌రూఫ్ వంటి ప్రీమియం ఫీచర్లు డ్రైవింగ్ అనుభవాన్ని మరింత మెరుగుపరుస్తాయి.

సేఫ్టీలో నెంబర్ వన్.. 5 స్టార్ రేటింగ్

ఒకప్పుడు మారుతి కార్లలో భద్రత తక్కువగా ఉంటుందనే అపవాదు ఉండేది. కానీ కొత్త డిజైర్ విషయంలో కంపెనీ సేఫ్టీకి అత్యధిక ప్రాధాన్యత ఇచ్చింది. ఈ కారులో ప్రామాణికంగా 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్, వెనుక వైపు పార్కింగ్ సెన్సార్లు, 360 డిగ్రీల కెమెరా వంటి భద్రతా ప్రమాణాలు ఉన్నాయి. దీని ఫలితంగానే ఈ కారు గ్లోబల్ ఎన్‌క్యాప్, భారత్ ఎన్‌క్యాప్ క్రాష్ టెస్టులలో అత్యుత్తమమైన 5 స్టార్ సేఫ్టీ రేటింగ్‌ను కైవసం చేసుకుంది. తక్కువ ధర, భారీ మైలేజ్, లగ్జరీ ఫీచర్లు, బలమైన సేఫ్టీ కలయికతో ఈ కారు భారతీయ మార్కెట్లో రారాజుగా వెలుగుతోంది.