Night Driving Tips : రాత్రి డ్రైవింగ్ చేస్తున్నారా? ఈ టిప్స్ పాటించకపోతే యముడికి ఇన్విటేషన్ ఇచ్చినట్లే

Night Driving Tips : పగటిపూట కారు నడపడం ఒక ఎత్తు అయితే, రాత్రి వేళ డ్రైవింగ్ చేయడం మరో ఎత్తు. తక్కువ వెలుతురు, ఎదురుగా వచ్చే వాహనాల హై-బీమ్ లైట్లు, అలసట.. ఇవన్నీ ప్రమాదాలకు దారితీసే అవకాశం ఉంది. రాత్రి వేళల్లో రహదారిపై ఉండే సవాళ్లను అధిగమించి, సురక్షితంగా గమ్యాన్ని చేరాలంటే కొన్ని కీలకమైన జాగ్రత్తలు తప్పనిసరి. అవేంటో ఇప్పుడు వివరంగా చూద్దాం.

హెడ్‌లైట్ల వాడకంలో జాగ్రత్త

రాత్రి పూట డ్రైవింగ్‌లో అన్నిటికంటే ముఖ్యమైనది కంటి చూపు, వెలుతురు. మీ కారు హెడ్‌లైట్లు ఎప్పుడూ శుభ్రంగా, పని చేసే స్థితిలో ఉండాలి. ఎదురుగా ఏ వాహనం రానప్పుడు హై బీమ్ వాడుకోవచ్చు, కానీ ఏదైనా వాహనం ఎదురుగా వస్తున్నప్పుడు వెంటనే లో బీమ్‎కు మారాలి. దీనివల్ల ఎదుటి డ్రైవర్ కళ్లు మిరుమిట్లు గొలపవు. అలాగే, కారు విండ్‌షీల్డ్ లోపల, బయట క్లీన్‌గా ఉంచుకోవాలి. అద్దంపై మచ్చలుంటే కాంతి పరావర్తనం చెంది రోడ్డు సరిగ్గా కనిపించదు.

వేగం వద్దు.. వివేకం ముద్దు

చీకట్లో రోడ్డుపై అకస్మాత్తుగా ఏవైనా అడ్డంకులు వచ్చే అవకాశం ఉంది. కుక్కలు, ఆవులు లేదా లైట్లు లేని వాహనాలు అకస్మాత్తుగా ఎదురైతే వేగంగా ఉన్నప్పుడు కారును నియంత్రించడం కష్టం. అందుకే రాత్రి పూట నిర్ణీత వేగంతోనే వెళ్లాలి. ముందు వెళ్తున్న వాహనానికి, మీ కారుకు మధ్య తగినంత దూరం పాటించాలి. దీనివల్ల ముందు వారు అకస్మాత్తుగా బ్రేక్ వేసినా, మీరు ప్రమాదం జరగకుండా కారును ఆపగలరు.

నిద్ర వస్తుందా?

రాత్రి వేళ డ్రైవింగ్‌లో అతిపెద్ద శత్రువు నిద్ర. ఒక సెకను పాటు కన్ను మూసినా ప్రాణాలకే ప్రమాదం. మీకు అలసటగా అనిపించినా లేదా ఆవలింతలు వస్తున్నా మొండిగా డ్రైవ్ చేయకండి. వెంటనే కారును సురక్షితమైన చోట ఆపి, కాస్త నడవండి లేదా కాఫీ తాగండి. వీలైతే ఒక 15 నిమిషాల పాటు చిన్న కునుకు తీయండి. కారులో మెల్లని సంగీతం వినడం లేదా తోటి ప్రయాణికులతో మాట్లాడుతూ ఉండటం వల్ల నిద్ర రాకుండా చూసుకోవచ్చు.

లోపలి లైట్లు ఆపేయండి

చాలామంది కారు లోపల లైట్లు ఆన్ చేసి డ్రైవ్ చేస్తారు. దీనివల్ల కారు లోపల వెలుతురు పెరిగి, బయట ఉన్న చీకటి రోడ్డు సరిగ్గా కనిపించదు. కాబట్టి ప్రయాణంలో ఉన్నప్పుడు క్యాబిన్ లైట్లను ఆపి ఉంచడమే సురక్షితం. అలాగే, డ్యాష్‌బోర్డ్ వెలుతురు కూడా మరీ ఎక్కువగా లేకుండా డిమ్ చేసుకుంటే కళ్ళపై ఒత్తిడి తగ్గుతుంది.

రిఫ్లెక్టర్లు లేని వాహనాలతో జాగ్రత్త

భారతదేశంలో రాత్రి పూట హైవేలపై వెళ్తున్నప్పుడు లైట్లు లేని ఎడ్ల బండ్లు, సైకిళ్లు లేదా ఆగి ఉన్న లారీలు ప్రమాదకరంగా మారుతుంటాయి. అందుకే రోడ్డు అంచులపై కూడా ఒక కన్ను వేసి ఉంచాలి. మలుపులు తిరిగేటప్పుడు ముందే ఇండికేటర్లు వేయడం, బ్రేక్ లైట్లు సరిగ్గా పనిచేసేలా చూసుకోవడం వల్ల వెనుక వచ్చే వాహనదారులకు మీ కదలికలు అర్థమవుతాయి.