MV Agusta : ఇది బైక్ కాదు, రోడ్డుపై వెళ్లే ఒక కళాఖండం..ప్రపంచవ్యాప్తంగా కేవలం 300 మందికే ఛాన్స్

MV Agusta : ఇటలీకి చెందిన ప్రముఖ లగ్జరీ బైక్ తయారీ సంస్థ ఎంవీ అగస్టా, తన కళాత్మక సృష్టితో మరోసారి ప్రపంచాన్ని ఆశ్చర్యపరిచింది. స్విట్జర్లాండ్‌లోని సెయింట్ మోరిట్జ్‌లో జరిగిన ఒక అంతర్జాతీయ ఈవెంట్‌లో రష్ టెటానియో అనే అల్ట్రా-ఎక్స్‌క్లూజివ్ మోటార్‌సైకిల్‌ను ఆవిష్కరించింది. కేవలం చూడగానే కట్టిపడేసే డిజైన్, అత్యంత ఖరీదైన లోహాలతో తయారైన ఈ బైక్, బైక్ ప్రేమికుల కలల రాణి అని చెప్పవచ్చు. ప్రపంచవ్యాప్తంగా కేవలం 300 యూనిట్లను మాత్రమే తయారు చేయబోతుండటంతో, దీనికి అప్పుడే విపరీతమైన క్రేజ్ మొదలైంది.

ఈ మోటార్‌సైకిల్‌కు టెటానియో అని పేరు పెట్టడం వెనుక ఒక బలమైన కారణం ఉంది. ఇందులో విమానాల తయారీలో వాడే అత్యంత తేలికైన, బలమైన టైటానియం లోహాన్ని విపరీతంగా ఉపయోగించారు. బైక్ ఎగ్జాస్ట్, ఫ్యూయల్ ట్యాంక్ కవర్, హెడ్‌లైట్ క్యారియర్, డాష్‌బోర్డ్ ఇలా చాలా భాగాలు బ్రష్ చేసిన టైటానియంతో మెరిసిపోతున్నాయి. దీనివల్ల బైక్ బరువు తగ్గడమే కాకుండా, చూడటానికి ఎంతో ప్రీమియంగా కనిపిస్తుంది. అంతేకాకుండా, దీని బాడీ పార్ట్స్ కోసం కార్బన్ ఫైబర్‎ను కూడా భారీగా వాడారు, ఇది బైక్‌కు స్పోర్టీ లుక్ ఇస్తోంది.

ఇక దీని శక్తి సామర్థ్యాల విషయానికి వస్తే, ఇందులో 1000 సీసీ ఫోర్-సిలిండర్ ఇంజన్ ఉంది. ఇందులో కూడా టైటానియం వాల్వ్‌లు మరియు టైటానియం కనెక్టింగ్ రాడ్‌లను వాడటం విశేషం. దీనివల్ల ఇంజన్ పెర్ఫార్మెన్స్ అద్భుతంగా ఉండటమే కాకుండా, అత్యధిక వేగంలోనూ స్థిరంగా ఉంటుంది. ఈ బైక్ రంగుల కలయిక కూడా ఎంతో ప్రత్యేకం. నెరో ఇంటెన్సో అనే బేస్ పెయింట్‌తో పాటు, అక్కడక్కడా బ్లూ టెటానియో టోన్లతో మెరిసిపోయేలా దీనికి ఫినిషింగ్ ఇచ్చారు.

ఎంవీ అగస్టా ఈ బైక్‌ను కేవలం 300 మంది అదృష్టవంతులకు మాత్రమే విక్రయించనుంది. ప్రతి బైక్ పైనా దాని సీరియల్ నంబర్ ఉంటుంది. అంటే ప్రపంచంలో ఆ నంబర్ గల బైక్ ఒక్కటి మాత్రమే ఉంటుంది. ఈ అల్ట్రా-ఎక్స్‌క్లూజివ్ ఎడిషన్ కోసం కంపెనీ ఒక సరికొత్త 'ట్విల్ వీవ్' ఫినిషింగ్‌ను కార్బన్ పార్ట్స్ పై ప్రయోగించింది. మ్యాట్ ఫినిష్ మరియు గ్లాస్ ఫినిష్ కలయిక ఈ బైక్‌కు ఒక రకమైన 'డెవిల్ లక్'ను తీసుకొచ్చింది.

ప్రస్తుతానికి ఎంవీ అగస్టా ఈ బైక్ ధరను కానీ, భారత్ వంటి దేశాల్లో ఎప్పుడు రిలీజ్ చేస్తారనే వివరాలను కానీ వెల్లడించలేదు. అయితే, ఈ బైక్ ప్రత్యేకతలు, వాడిన మెటీరియల్‌ను బట్టి చూస్తే, దీని ధర కొన్ని కోట్ల రూపాయల్లోనే ఉండే అవకాశం ఉంది. స్విట్జర్లాండ్ లాంటి దేశాల్లో జరిగిన అత్యంత ప్రతిష్టాత్మకమైన ఈవెంట్‌లో దీన్ని ప్రదర్శించారంటేనే.. ఇది ఎంతటి రేంజ్ ఉన్న బైక్ అనేది మనం అర్థం చేసుకోవచ్చు. విలాసం, వేగం, కళాత్మకతను ఇష్టపడే ధనవంతుల కోసం ఎంవీ అగస్టా దీన్ని ఒక గిఫ్ట్‌లా తీసుకొచ్చింది.