New Car Launches : జులైలో కార్ల పండగ.. సరికొత్త టెక్నాలజీ, అదిరిపోయే లుక్స్‌తో మార్కెట్లోకి రానున్న టాప్ మోడల్స్

New Car Launches : భారతీయ ఆటోమొబైల్ రంగానికి ఈ జులై నెల ఎంతో కీలకం కానుంది. దేశీయ మార్కెట్లోకి సరికొత్త ఫీచర్లు, వినూత్నమైన డిజైన్లతో పలు సరికొత్త కార్లు విడుదల కావడానికి సిద్ధంగా ఉన్నాయి. ప్రముఖ కార్ల తయారీ సంస్థ స్కోడా ఆటో ఇండియా ఇప్పటికే తన మోస్ట్ పవర్‌ఫుల్, స్పోర్టీ ఎస్‌యూవీ కొడియాక్ ఆర్‌ఎస్ ను భారత్‌లో లాంచ్ చేసి ఈ నెల హంగామాను ఘనంగా ప్రారంభించింది. దీని ఎక్స్-షోరూమ్ ధరను రూ.66.99 లక్షలుగా నిర్ణయించారు. ఈ లగ్జరీ కారు ఎంట్రీతో ఊపుందుకున్న మార్కెట్లో, రాబోయే రోజుల్లో మరికొన్ని దిగ్గజ కంపెనీలు తమ కార్లను లాంచ్ చేయడానికి లైన్లో పెట్టాయి.

జులై 9న నిస్సాన్ టెక్టాన్ ఎస్‌యూవీ గ్రాండ్ ఎంట్రీ

ఈ జులై నెలలో జరగబోయే అతిపెద్ద లాంచ్‌లలో నిస్సాన్ కంపెనీకి చెందిన సరికొత్త ఎస్‌యూవీ టెక్టాన్ ఒకటి. ఈ కారును జులై 9న అధికారికంగా ప్రపంచానికి పరిచయం చేయనున్నారు. నిస్సాన్ సంస్థ ఈ కారును అంతర్గతంగా బేబీ పెట్రోల్ అని పిలుస్తోంది. ఈ సరికొత్త ఎస్‌యూవీ 1.0-లీటర్ టర్బో-పెట్రోల్, 1.3-లీటర్ టర్బో-పెట్రోల్ ఇంజన్ ఆప్షన్లతో వచ్చే అవకాశం ఉంది. అధునాతన టెక్నాలజీ ఇష్టపడే వారి కోసం ఇందులో ఫుల్లీ డిజిటల్ ఇన్‌స్ట్రుమెంట్ క్లస్టర్, డ్రైవర్ వైపు వంగి ఉండే టచ్‌స్క్రీన్ ఇన్ఫోటైన్‌మెంట్ సిస్టమ్ మరియు అదిరిపోయే పనోరమిక్ సన్‌రూఫ్ వంటి ఫీచర్లు ఉండనున్నాయి.

ఎంజీ స్టార్‌లైట్ 560 ప్లగ్-ఇన్ హైబ్రిడ్

జేఎస్‌డబ్ల్యూ ఎంజీ మోటార్ ఇండియా జులై 16న దేశీయ మార్కెట్లో తన మొట్టమొదటి ప్లగ్-ఇన్ హైబ్రిడ్ ఎస్‌యూవీ స్టార్‌లైట్ 560ను విడుదల చేయబోతోంది. అంతర్జాతీయ మార్కెట్లో బాగా అమ్ముడవుతున్న వూలింగ్ స్టార్‌లైట్ 560 మోడల్ ఆధారంగా దీనిని రూపొందించారు. గ్లోబల్ మార్కెట్లో ఈ కారు 1.5-లీటర్ పెట్రోల్ ఇంజన్, 20.5 కిలోవాట్-అవర్ బ్యాటరీ సామర్థ్యంతో వస్తుంది. ఇది 197 బీహెచ్‌పీ పవర్‌ను జనరేట్ చేస్తుంది. కేవలం ఎలక్ట్రిక్ బ్యాటరీ పవర్‌తోనే ఈ కారు 100 కిలోమీటర్ల వరకు ప్రయాణించగలదు, ఆ తర్వాత ఆటోమేటిక్‌గా పెట్రోల్ ఇంజన్‌కు మారుతుంది. పెట్రోల్, బ్యాటరీ రెండూ కలిపి ఈ కారు ఏకంగా 1,100 కిలోమీటర్ల కంటే ఎక్కువ డ్రైవింగ్ రేంజ్ ఇస్తుందని ఎంజీ కంపెనీ క్లెయిమ్ చేస్తోంది.

మారుతి సుజుకి బ్రెజ్జా ఫేస్‌లిఫ్ట్

భారతదేశంలోనే అతిపెద్ద కార్ల తయారీ సంస్థ అయిన మారుతి సుజుకి సైతం తన మోస్ట్ పాపులర్ మోడల్ బ్రెజ్జాను సరికొత్త అప్‌డేట్స్‌తో జులై 23న మార్కెట్లోకి తీసుకురావడానికి సిద్ధమైంది. ఇప్పటికే ఈ సరికొత్త బ్రెజ్జా ఫేస్‌లిఫ్ట్ మోడల్స్ రోడ్లపై టెస్టింగ్ చేస్తూ పలుమార్లు కనిపించాయి. కారు వెలుపలి భాగంలో ఆకర్షణీయమైన కొన్ని చిన్న మార్పులు చేశారు. ఇక ఇంటీరియర్ విషయానికి వస్తే.. విక్టోరియా మోడల్ నుంచి ప్రేరణ పొందిన పెద్ద ఇన్‌ఫోటైన్‌మెంట్ టచ్‌స్క్రీన్, అప్‌డేట్ చేసిన డ్రైవర్ డిస్‌ప్లే, వెంటిలేటెడ్ ఫ్రంట్ సీట్లు, క్యాబిన్ లోపల అంబియంట్ లైటింగ్, వైర్‌లెస్ ఫోన్ ఛార్జర్ వంటి క్రేజీ ఫీచర్లు ఇందులో ఉండబోతున్నాయి. ఇంజన్ పరంగా ఎలాంటి మార్పులు లేకుండా ప్రస్తుతమున్న 1.5-లీటర్ పెట్రోల్ ఇంజన్‌తోనే ఇది రానుంది.

హోండా జెడ్ఆర్-వి హైబ్రిడ్

ఇటీవలే సరికొత్త సిటీ కారుతో పాటు హోండా సంస్థ తన ప్రీమియం ఎస్‌యూవీ జెడ్ఆర్-వి హైబ్రిడ్ ను ప్రదర్శించింది. ఈ కారు కూడా జులై ఆఖరి వారంలో మార్కెట్లోకి వచ్చే అవకాశం ఉంది. ఇందులో 9 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్‌తో పాటు అదిరిపోయే సౌండ్ కోసం 12 స్పీకర్ల బోస్ ఆడియో సిస్టమ్‌ను అమర్చారు. లగ్జరీ ఫీచర్ల విషయానికి వస్తే మల్టీ-జోన్ క్లైమేట్ కంట్రోల్, వెంటిలేటెడ్ సీట్లు, అడాప్టివ్ ఎల్‌ఈడీ హెడ్‌లైట్లు, రెయిన్-సెన్సింగ్ వైపర్లు, 10.2 అంగుళాల డిజిటల్ ఇన్‌స్ట్రుమెంట్ క్లస్టర్, పనోరమిక్ సన్‌రూఫ్, హ్యాండ్స్-ఫ్రీ పవర్డ్ టెయిల్‌గేట్ వంటి ఫీచర్లు ఉన్నాయి. భద్రతకు పెద్దపీట వేస్తూ ఈ కారులో ఏకంగా 11 ఎయిర్‌బ్యాగ్‌లు, హోండా సెన్సింగ్ ఏడీఏఎస్ టెక్నాలజీ, 360-డిగ్రీ కెమెరాలను అందించారు.