Yamaha: యువతను ఎంతగానో ఆకట్టుకునే యమహా కంపెనీ భారత మార్కెట్లో సరికొత్త స్పోర్ట్స్ బైక్‌ను ఆవిష్కరించేందుకు పూర్తిస్థాయిలో సిద్ధమైంది. ఇప్పటికే పలు ఆసక్తికరమైన టీజర్లను విడుదల చేసిన యమహా, ఈ కొత్త మోడల్‌ను యమహా R2 పేరుతో తీసుకొస్తున్నట్లు ఆటోమొబైల్ వర్గాల్లో ప్రచారం జరుగుతోంది. ప్రీ-బుకింగ్స్ కూడా శరవేగంగా ప్రారంభమయ్యాయి. యమహా ఇండియా తన సోషల్ మీడియా ఖాతాలలో పంచుకున్న టీజర్ వీడియోలు బైక్ ప్రియుల అంచనాలను పెంచేస్తున్నాయి. బైక్ బాడీ ప్యానెల్స్, షార్ప్ లేయర్డ్ డిజైన్ టీజర్‌లో స్పష్టంగా కనిపిస్తున్నాయి. స్పష్టమైన ఆకృతి, ఆకర్షణీయమైన యమహా లోగోతో వాహనాన్ని ఎంతో గంభీరంగా తీర్చిదిద్దారు. ది గ్లింప్స్, #RInstinct అనే హ్యాష్‌ట్యాగ్‌లతో కంపెనీ దీనిని ప్రచారం చేయడాన్ని బట్టి, ఇది యమహా ఆర్‌-సిరీస్ శ్రేణికి చెందిన సంపూర్ణ ఫెయిర్డ్ స్పోర్ట్స్ బైక్ అని స్పష్టమవుతోంది. ఆర్‌15 కంటే పెద్ద పరిమాణంలో, ఎక్కువ అగ్రెసివ్‌గా ఈ బైక్ రూపుదిద్దుకుంది.

R15 కంటే పెరిగిన పవర్, మెరుగైన ఇంజిన్

మార్కెట్లో ఇప్పటికే మంచి ఆదరణ పొందిన యమహా R15 కంటే ఈ కొత్త R2 మోడల్ అత్యంత శక్తివంతంగా ఉండనుంది. R15 బైక్‌లో 155సీసీ లిక్విడ్-కూల్డ్ ఇంజిన్ ఉంటుంది. ఇది 18.1 బిహెచ్‌పి పవర్, 14.2 ఎన్ఎమ్ టార్క్‌ను అందిస్తుంది. అయితే రాబోయే న్యూ ఆర్‌2 మోడల్‌లో అంతకంటే పెద్ద ఇంజిన్‌ను అమర్చారు. ఇది దాదాపు 25 బిహెచ్‌పి పవర్, 20 ఎన్ఎమ్ టార్క్‌ను విడుదల చేస్తుందని అంచనా వేస్తున్నారు. 6-స్పీడ్ గేర్‌బాక్స్‌తో పాటు అసిస్ట్ అండ్ స్లిప్పర్ క్లచ్, క్విక్ షిఫ్టర్ సాంకేతికతలను ఇందులో అందించనున్నారు. దీనివల్ల వేగం పెంచినప్పుడు బైక్ రైడింగ్ అనుభూతి అద్భుతంగా ఉంటుంది.

నయా టెక్నాలజీ, అధునాతన ఫీచర్లు

ఫీచర్ల విషయంలో యమహా R15 కంటే ఈ కొత్త వాహనం చాలా అడుగులు ముందే ఉండనుంది. సుదూర ప్రయాణాలను సులభతరం చేసేందుకు క్రూయిజ్ కంట్రోల్ సదుపాయంతో పాటు పలు రకాల రైడింగ్ మోడ్స్‌ను ఇందులో చేర్చనున్నట్లు సమాచారం. గాలి ఒత్తిడిని సమర్థవంతంగా తట్టుకుని వేగంగా దూసుకెళ్లేలా ఎయిరోడైనమిక్స్ కోసం ప్రత్యేకంగా వింగ్‌లెట్స్‌ను సైతం అమర్చే అవకాశం ఉంది. డిజిటల్ కన్సోల్, కనెక్టివిటీ ఆప్షన్లలో అనేక కొత్త మార్పులు తీసుకొస్తున్నారు.

రేస్ ట్రాక్ తరహా ప్రయాణ అనుభవం

స్పోర్టీ ఛాసిస్ డిజైన్‌ను కొనసాగిస్తూనే, సీటింగ్ పొజిషన్‌ను ఎంతో సౌకర్యవంతంగా మార్చారు. యువత కోరుకునే వేగం, భద్రత, లుక్స్ మూడింటి కలయికగా ఈ మోడల్‌ను తీర్చిదిద్దుతున్నట్లు తెలుస్తోంది. భారత్‌లో రోజురోజుకూ పెరుగుతున్న ప్రీమియం స్పోర్ట్స్ బైక్ డిమాండ్‌ను అందుకోవడానికి యమహా వేసిన ఈ వ్యూహాత్మక అడుగు బైక్ ప్రియులకు కొత్త అనుభూతిని అందించనుంది.

Tags: