Nissan : నిస్సాన్ అదిరిపోయే బోణి.. ఏప్రిల్‌లో 75 శాతం పెరిగిన అమ్మకాలు.. మార్కెట్లో గ్రావైట్, మాగ్నైట్ హవా

Nissan : జపాన్ కార్ల తయారీ సంస్థ నిస్సాన్ ఇండియా కొత్త ఆర్థిక సంవత్సరంలో అదిరిపోయే బోణి కొట్టింది. ఏప్రిల్ 2026 నెలలో కంపెనీ అమ్మకాలు ఊహించని రీతిలో పెరిగాయి. ముఖ్యంగా దేశీయ మార్కెట్‌లో నిస్సాన్ ఏకంగా 75 శాతం వృద్ధిని నమోదు చేసి ఆటోమొబైల్ రంగాన్ని ఆశ్చర్యపరిచింది. తన సరికొత్త మోడళ్లతో కస్టమర్లను ఆకట్టుకుంటూ మార్కెట్‌లో తన పట్టును నిరూపించుకుంది. నిస్సాన్ మోటార్ ఇండియా ఏప్రిల్ 2026 నెలలో తన అత్యుత్తమ ప్రదర్శనను చాటుకుంది. కంపెనీ మొత్తం 5,388 యూనిట్లను విక్రయించగా, అందులో 3,203 యూనిట్లు కేవలం భారత మార్కెట్‌లోనే అమ్ముడయ్యాయి. గత ఏడాది ఇదే సమయంతో పోలిస్తే దేశీయ అమ్మకాల్లో 75 శాతం వృద్ధి కనిపించడం విశేషం. ఇక ఎగుమతుల విషయానికి వస్తే, 2,185 కార్లను విదేశాలకు పంపించి నిస్సాన్ తన అంతర్జాతీయ ఉనికిని కూడా బలోపేతం చేసుకుంది. ఈ భారీ వృద్ధి కంపెనీకి కొత్త ఉత్సాహాన్ని ఇచ్చింది.

నిస్సాన్ విజయయాత్రలో మాగ్నైట్ ఇప్పటికే సక్సెస్ ఫుల్ మోడల్‌గా నిలవగా, కొత్తగా వచ్చిన నిస్సాన్ గ్రావైట్ ఇప్పుడు మార్కెట్‌ను ఊపేస్తోంది. ఈ 7-సీటర్ ఎస్‌యూవీ తన మోడ్యులర్ డిజైన్, లగ్జరీ ఫీచర్లు, సౌకర్యవంతమైన ప్రయాణానికి కేరాఫ్ అడ్రస్‌గా నిలిచింది. పెద్ద కుటుంబాలకు ఇది పర్ఫెక్ట్ ఛాయిస్ కావడంతో బుకింగ్‌లు భారీగా పెరుగుతున్నాయి. మాగ్నైట్ తన కాంపాక్ట్ లుక్, తక్కువ ధరతో మధ్యతరగతి ప్రజల మనసు గెలుచుకుంటూ అమ్మకాల్లో స్థిరంగా కొనసాగుతోంది.

ఈ అద్భుతమైన ఫలితాల పట్ల నిస్సాన్ ఇండియా ఎండీ సౌరభ్ వత్స్ ఆనందం వ్యక్తం చేశారు. మాగ్నైట్ విజయం, గ్రావైట్‌కు లభిస్తున్న రెస్పాన్స్ కంపెనీ వ్యూహాలకు బలాన్ని ఇచ్చాయని ఆయన పేర్కొన్నారు. కేవలం అమ్మకాలే కాకుండా, కస్టమర్ సర్వీస్ నెట్‌వర్క్‌ను దేశవ్యాప్తంగా విస్తరించడంపై నిస్సాన్ ఇప్పుడు ప్రత్యేక దృష్టి పెట్టింది. రానున్న రోజుల్లో మరిన్ని ఇన్నోవేటివ్ ప్రొడక్ట్స్ తీసుకురావడమే కాకుండా, టైర్-2, టైర్-3 నగరాల్లో కూడా షోరూమ్స్, సర్వీస్ సెంటర్లను పెంచాలని కంపెనీ ప్లాన్ చేస్తోంది.

భారత మార్కెట్ ప్రాధాన్యతను గుర్తించిన నిస్సాన్, కస్టమర్ల అవసరాలకు తగ్గట్టుగా హైబ్రిడ్, ఎలక్ట్రిక్ వెహికల్స్ సెగ్మెంట్‌లో కూడా ప్రయోగాలు చేసేందుకు సిద్ధమవుతోంది. ప్రస్తుతం ఉన్న మోడళ్లకు తోడుగా మరిన్ని గ్లోబల్ టెక్నాలజీ వాహనాలను భారత్‌కు తీసుకురావాలని కంపెనీ భావిస్తోంది. బలమైన ప్రొడక్ట్ లైనప్, మెరుగైన కస్టమర్ కేర్ సాయంతో ఈ ఆర్థిక సంవత్సరంలో రెండంకెల వృద్ధిని సాధించడమే లక్ష్యంగా నిస్సాన్ అడుగులు వేస్తోంది.