Nissan Tekton : నిస్సాన్ నుంచి టెక్టాన్ దండయాత్ర.. ఫీచర్లు వింటే షాక్ అవ్వాల్సిందే

Nissan Tekton : జపాన్ ఆటోమొబైల్ దిగ్గజం నిస్సాన్ తన సరికొత్త మిడ్‌సైజ్ ఎస్‌యూవీ నిస్సాన్ టెక్టాన్ గురించి కీలక అప్‌డేట్ ఇచ్చింది. కారు ప్రియులు ఎప్పుడెప్పుడా అని ఎదురుచూస్తున్న ఈ మోడల్ ఇప్పుడు విడుదలకు సిద్ధమైంది. జూన్ 2026లో ఈ కారును ప్రపంచానికి పరిచయం చేయనున్నట్లు కంపెనీ ప్రకటించింది. నిజానికి ఇది ఏప్రిల్‌లోనే లాంచ్ కావాల్సి ఉన్నా, కొన్ని కారణాల వల్ల జూన్‌కు వాయిదా పడింది. రెనాల్ట్ డస్టర్ ప్లాట్‌ఫామ్‌పైనే తయారవుతున్నప్పటికీ, నిస్సాన్ దీనికి ఒక ప్రత్యేకమైన గుర్తింపును, సరికొత్త రూపాన్ని ఇచ్చింది.

నిస్సాన్ టెక్టాన్ డిజైన్ విషయానికి వస్తే, ఇది కంపెనీకి చెందిన ఐకానిక్ మోడల్ నిస్సాన్ పెట్రోల్ నుంచి ప్రేరణ పొందింది. అందుకే ఇది చాలా గంభీరంగా, బలిష్టంగా కనిపిస్తుంది. ముందు భాగంలో పెద్ద గ్రిల్, అదిరిపోయే ఎల్‌ఈడీ హెడ్‌లైట్లు, కనెక్టెడ్ డీఆర్‌ఎల్‌లు దీనికి ప్రీమియం లుక్‌ను ఇస్తాయి. ఎత్తైన బోనెట్ మరియు ముందు, వెనుక వైపున Tekton అనే బ్రాండింగ్ కారుకు మరింత అగ్రెసివ్ స్టైల్‌ను జోడించాయి. వెనుక వైపున ఉండే కనెక్టెడ్ ఎల్‌ఈడీ టెయిల్ లైట్లు కారును మోడ్రన్‌గా చూపిస్తాయి.

కారు లోపలి భాగం (ఇంటీరియర్) ప్రయాణికులకు అత్యున్నత స్థాయి సౌకర్యాన్ని ఇచ్చేలా రూపొందించబడింది. ఇందులో త్రీ-కలర్ డాష్‌బోర్డ్ ఉండే అవకాశం ఉంది. పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, పూర్తి డిజిటల్ డ్రైవర్ డిస్‌ప్లే, వైర్‌లెస్ మొబైల్ ఛార్జింగ్ వంటి ఫీచర్లు హైలైట్‌గా నిలుస్తాయి. అంతేకాకుండా వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, సన్‌రూఫ్, ముందు వరుసలో వెంటిలేటెడ్ సీట్లు వంటి ప్రీమియం సౌకర్యాలు ఈ ఎస్‌యూవీలో ఉండనున్నాయి.

నేటి కాలంలో భద్రత చాలా ముఖ్యం కాబట్టి, నిస్సాన్ ఇందులో అస్సలు రాజీ పడలేదు. 6 ఎయిర్‌బ్యాగ్‌లు, 360 డిగ్రీల కెమెరా, బ్లైండ్ స్పాట్ మానిటర్, ఏబీఎస్ విత్ ఈబీడీ వంటి ఫీచర్లు ఇందులో ఉన్నాయి. వీటికి తోడు టైర్ ప్రెజర్ మానిటరింగ్ సిస్టమ్, ఎలక్ట్రానిక్ పార్కింగ్ బ్రేక్ వంటివి డ్రైవింగ్‌ను మరింత సురక్షితం చేస్తాయి. అంటే కేవలం లుక్స్ మాత్రమే కాదు, భద్రతలోనూ టెక్టాన్ మొనగాడు అనిపించుకోనుంది.

టెక్టాన్‌లో రెండు రకాల టర్బో పెట్రోల్ ఇంజిన్ ఆప్షన్లు అందుబాటులో ఉండనున్నాయి. మొదటిది 1.3 లీటర్ టర్బో పెట్రోల్ ఇంజిన్, ఇది సుమారు 156 bhp పవర్‌ను ఇస్తుంది. రెండోది 1.0 లీటర్ టర్బో పెట్రోల్ ఇంజిన్, ఇది 100 bhp పవర్, 160 Nm టార్క్‌ను ఉత్పత్తి చేస్తుంది. భవిష్యత్తులో 1.8 లీటర్ పెట్రోల్-హైబ్రిడ్ వెర్షన్‌ను కూడా నిస్సాన్ తీసుకురావాలని చూస్తోంది. ప్రారంభంలో ఇది 5-సీటర్‌గా వచ్చినప్పటికీ, 2027 నాటికి రెనాల్ట్ బోరియల్ ఆధారంగా దీని 7-సీటర్ వెర్షన్‌ను కూడా లాంచ్ చేయనున్నారు.