Ola S1 Pro vs Ather 450X: భారతీయ మార్కెట్లో ఎలక్ట్రిక్ స్కూటర్ల వాడకం రోజురోజుకూ గణనీయంగా పెరుగుతోంది. ముఖ్యంగా నగరాల్లో రోజూ తిరిగే వారి కోసం ప్రీమియం ఈవీల డిమాండ్ తారస్థాయికి చేరింది. ఈ సెగ్మెంట్‌లో అగ్రగామిగా ఉన్న ఏథర్ 450ఎక్స్, ఓలా ఎస్1 ప్రో మోడళ్ల మధ్య తీవ్ర పోటీ నెలకొంది.

బ్యాటరీ ప్యాక్ అలాగే మైలేజ్ పోలిక

రోజూ ఆఫీసులు అలాగే వివిధ పనులపై సిటీలో తిరిగే వారికి మైలేజ్ అనేది అత్యంత కీలకం. ఈ విషయంలో ఓలా ఎస్1 ప్రో వేరియంట్లు ఎక్కువ రేంజ్‌తో ముందంజలో ఉన్నాయి. ఇందులో 3 కిలోవాట్ల నుంచి 5.2 కిలోవాట్ల వరకు బ్యాటరీ ఆప్షన్లు లభిస్తాయి. పెద్ద బ్యాటరీ మోడల్ ఒకసారి ఛార్జ్ చేస్తే ఏకంగా 320 కిలోమీటర్ల దూరం ప్రయాణిస్తుందని కంపెనీ చెబుతోంది. మరోవైపు ఏథర్ 450ఎక్స్ స్కూటర్‌లో 2.9 కిలోవాట్ అలాగే 3.7 కిలోవాట్ బ్యాటరీ ప్యాక్‌లు అందుబాటులో ఉన్నాయి. ఇవి గరిష్టంగా 161 కిలోమీటర్ల వరకు ప్రయాణించే సత్తా కలిగి ఉన్నాయి.

ఫీచర్లు అలాగే రైడింగ్ మోడ్స్

రెండు స్కూటర్లలోనూ అత్యాధునిక టెక్నాలజీతో కూడిన ఫీచర్లు కొకొల్లలుగా ఉన్నాయి. ఓలా ఎస్1 ప్రోలో 7 అంగుళాల డిజిటల్ టచ్‌స్క్రీన్ డిస్‌ప్లేతో పాటు 34 లీటర్ల భారీ అండర్-సీట్ స్టోరేజ్ లభిస్తుంది. ఇందులో ఎకో, నార్మల్, స్పోర్ట్, హైపర్ వంటి రైడింగ్ మోడ్స్ ఇచ్చారు. అలాగే ఏథర్ 450ఎక్స్ కూడా ఫీచర్ల పరంగా ఎంతో పవర్ఫుల్గా ఉంది. ఇందులో 7 ఇంచ్ టీఎఫ్‌టీ స్క్రీన్, గూగుల్ మ్యాప్స్ నేవిగేషన్, స్మార్ట్ ఎకో, వార్ప్ వంటి ప్రత్యేక మోడ్స్ ఉన్నాయి. ట్రాక్షన్ కంట్రోల్ అలాగే రివర్స్ అసిస్ట్ వంటి టెక్నాలజీలు రెండు మోడళ్లలోనూ ప్రయాణాన్ని సులభతరం చేస్తాయి.

ధరల పరంగా ఏది ఎకనామికల్?

సామాన్య మధ్యతరగతి కొనుగోలుదారులను ఆకర్షించడంలో ధర ప్రధాన పాత్ర పోషిస్తుంది. ఏథర్ 450ఎక్స్ ప్రారంభ ధర సుమారు 1.49 లక్షలుగా ఉంది. అదే సమయంలో ఓలా ఎస్1 ప్రో బేస్ మోడల్ సుమారు 1.28 లక్షల నుంచి ప్రారంభమవుతుంది. పెద్ద బ్యాటరీ కలిగిన టాప్ మోడల్ ధర 1.58 లక్షల వరకు పలుకుతుంది. తక్కువ ధరకు ఎక్కువ రేంజ్ కోరుకునే వారికి ఓలా వైపు మొగ్గు చూపడం సులభమవుతుంది.

నగర ప్రయాణాలకు ఏది సరైన ఎంపిక?

నగర వీధుల్లో ట్రాఫిక్‌ను దాటుకుని సాఫీగా సాగిపోవడానికి రెండు స్కూటర్లు అద్భుతంగా పనిచేస్తాయి. మెరుగైన రైడింగ్ అనుభవం, ప్రీమియం బిల్డ్ క్వాలిటీ కోరుకునే వారికి ఏథర్ అద్భుతమైన ఎంపికగా నిలుస్తుంది. తక్కువ ఖర్చులో ఎక్కువ మైలేజ్, విశాలమైన స్టోరేజ్ స్థలం కోరుకునే వారికి ఓలా సరైన ప్రత్యామ్నాయంగా మారుతుంది.

Tags: