Renault : మైలేజ్ టెన్షన్కు చెల్లుచీటి.. సీఎన్జీ అవతారంలో రెనాల్ట్ నుంచి 3 అదిరిపోయే కార్లు
సీఎన్జీ అవతారంలో రెనాల్ట్ నుంచి 3 అదిరిపోయే కార్లు
Renault : భారతీయ ఆటోమొబైల్ మార్కెట్లో మధ్యతరగతి ప్రజలకు నచ్చే బడ్జెట్ కార్లను అందించే రెనాల్ట్ సంస్థ తన సీఎన్జీ పోర్ట్ఫోలియోను పూర్తిగా మార్చేందుకు సిద్ధమైంది. ప్రస్తుతం మార్కెట్లో ఉన్న రెనాల్ట్ క్విడ్, ట్రైబర్, కైగర్ కార్లు సీఎన్జీ ఆప్షన్లలో అందుబాటులో ఉన్నప్పటికీ.. అవి డీలర్ స్థాయిలో బిగించే రేట్రోఫిట్మెంట్ కిట్లు మాత్రమే. దీనివల్ల ఆశించిన స్థాయిలో పర్ఫార్మెన్స్ రాకపోవడంతో, రెనాల్ట్ సంస్థ ఈ మూడు మోడళ్లలో భారీ మార్పులు తీసుకురాబోతోంది. 2027 నాటికి సరికొత్త టెక్నాలజీతో మూడు సరికొత్త ఫ్యాక్టరీ ఫిట్టెడ్ సీఎన్జీ కార్లను లాంచ్ చేయడానికి కంపెనీ రోడ్మ్యాప్ సిద్ధం చేసింది.
కొత్త ఆర్జీఈపీ ప్లాట్ఫామ్తో మారనున్న రూపురేఖలు
ఈ రాబోయే మూడు సరికొత్త సీఎన్జీ కార్లను కంపెనీ సరికొత్త ఆర్జీఈపీ ఆర్కిటెక్చర్పై రూపొందించనుంది. గత మార్చి 2026లో జరిగిన ఫ్యూచర్రెడీ ఈవెంట్లో రెనాల్ట్ మొదటిసారిగా ఈ ప్లాట్ఫామ్ను ప్రపంచానికి పరిచయం చేసింది. ప్రస్తుతం వాడుకలో ఉన్న సీఎంఎఫ్-ఏ, సీఎంఎఫ్-ఏ+ ప్లాట్ఫామ్ల స్థానంలో ఈ కొత్త టెక్నాలజీని తీసుకువస్తున్నారు. ఈ ప్లాట్ఫామ్ అతిపెద్ద ప్రత్యేకత ఏంటంటే.. ఇది సీఎన్జీ సిలిండర్లను కారు డిక్కీలో కాకుండా, వాహనం అండర్ బాడీలో అమర్చడానికి వీలు కల్పిస్తుంది.
లగేజ్ స్పేస్ సమస్యకు చెక్.. డ్యూయల్ సిలిండర్ సిస్టమ్
సాధారణంగా సీఎన్జీ కార్లు కొనేవారికి ఎదురయ్యే అతిపెద్ద సమస్య బూట్ స్పేస్. పెద్ద గ్యాస్ సిలిండర్ డిక్కీలోనే ఉండటం వల్ల సామాన్లు పెట్టుకోవడానికి అస్సలు చోటుండదు. ఈ లోపాన్ని అధిగమించడానికి రెనాల్ట్ ఒకే పెద్ద సిలిండర్కు బదులుగా రెండు చిన్న సిలిండర్ల విధానాన్ని ఉపయోగించబోతోంది. కారు అడుగుభాగంలో ఒకదానికొకటి అనుసంధానించబడిన రెండు చిన్న సిలిండర్లలో గ్యాస్ నింపబడుతుంది. దీనివల్ల కారు డిక్కీలో పూర్తి స్థలం మిగులుతుంది. ప్రస్తుత రెనాల్ట్ సీఎన్జీ లైనప్లో ఉన్న అతిపెద్ద మైనస్ పాయింట్ను ఈ సరికొత్త టెక్నాలజీ పూర్తిగా తుడిచేయనుంది.
కొత్త ప్లాట్ఫామ్పైకి మారనున్న రెనాల్ట్ క్విడ్ సీఎన్జీ
ప్రస్తుతం మార్కెట్లో ఉన్న చిన్న కారు రెనాల్ట్ క్విడ్ సీఎంఎఫ్-ఏ ప్లాట్ఫామ్పై నడుస్తోంది. కానీ రాబోయే కొత్త మోడల్ ఆర్జీఈపీ ప్లాట్ఫామ్పైకి అప్గ్రేడ్ కానుంది. దీనివల్ల కారు లోపల స్థలం పెరగడంతో పాటు కింది భాగంలో సీఎన్జీ ట్యాంక్ అమరుస్తారు. ఈ కొత్త క్విడ్ సీఎన్జీ వేరియంట్లో ప్రస్తుతం ఉన్న 1.0 లీటర్ పెట్రోల్ ఇంజన్నే ఉపయోగించనున్నారు. ప్రస్తుతానికి ఇది 5-స్పీడ్ మాన్యువల్ గేర్బాక్స్తో మాత్రమే వస్తోంది. అయితే భవిష్యత్తులో ఈ సీఎన్జీ వేరియంట్తో పాటు ఏఎమ్టీ ఆటోమేటిక్ ట్రాన్స్మిషన్ ఆప్షన్ను కూడా కంపెనీ ఇస్తుందో లేదో చూడాల్సి ఉంది.
మరింత విలాసవంతంగా మారనున్న 7-సీటర్ రెనాల్ట్ ట్రైబర్
రెనాల్ట్ ట్రైబర్ విషయానికి వస్తే, ప్రస్తుతం దీని కస్టమర్లకు డీలర్ ఆప్షన్ ద్వారా సీఎన్జీ కిట్ లభిస్తోంది. కానీ త్వరలోనే ఈ మోడల్ కూడా ఆర్జీఈపీ ప్లాట్ఫామ్కు మారబోతోంది. దీనివల్ల కారు అడుగుభాగంలో సీఎన్జీ ట్యాంకులు వస్తాయి కాబట్టి, డిక్కీ స్పేస్ పెరగడమే కాకుండా కారులోని మూడవ వరుస సీట్లలో కూర్చునే ప్రయాణికులకు లెగ్రూమ్ పెరిగి మరింత కంఫర్ట్గా మారనుంది. ఇందులో కూడా పాత 1-లీటర్ పెట్రోల్ ఇంజన్నే కొనసాగిస్తారు. అయితే కొత్త మోడల్లో మాన్యువల్తో పాటు ఆటోమేటిక్ గేర్బాక్స్ ఆప్షన్ కూడా ఇచ్చే అవకాశాలు ఎక్కువగా ఉన్నాయి.
రెనాల్ట్ కైగర్ సీఎన్జీలో ఆటోమేటిక్ గేర్బాక్స్ ట్విస్ట్
రెనాల్ట్ సంస్థ నుంచి సబ్-4 మీటర్ ఎస్యూవీ కేటగిరీలో వచ్చిన మొదటి పాపులర్ కారు కైగర్. ఇది 1.0 లీటర్ నార్మల్ పెట్రోల్, 1.0 లీటర్ టర్బో పెట్రోల్, సీఎన్జీ ఆప్షన్లలో లభిస్తోంది. ప్రస్తుతం ఉన్న మోడల్ సీఎంఎఫ్-ఏ+ ప్లాట్ఫామ్పై ఆధారపడి ఉంది. కంపెనీ కొత్త ప్లాన్ ప్రకారం దీనిని కూడా ఆర్జీఈపీ ఆర్కిటెక్చర్కు అప్గ్రేడ్ చేయనున్నారు. కొత్త కైగర్ సీఎన్జీ వర్షన్లో అండర్ బాడీ ట్యాంక్ వల్ల బూట్ స్పేస్ పెరగడమే కాకుండా, ప్రస్తుతం మార్కెట్లో లేని సీఎన్జీ-ఆటోమేటిక్ కాంబినేషన్ వేరియంట్ను కూడా కొత్తగా లాంచ్ చేయాలని రెనాల్ట్ భావిస్తోంది. ఇది గనుక వస్తే మార్కెట్లో కైగర్ సేల్స్ విపరీతంగా పెరిగే అవకాశం ఉంది.