Tata Harrier EV : మహీంద్రాకు గట్టి షాక్ ఇచ్చిన టాటా.. హారియర్ ఈవీతో మార్కెట్ కొల్లగొట్టే ప్రయత్నం

Tata Harrier EV : గతేడాది మహింద్రా అండ్ మహింద్రా తమ రెండు కొత్త ఎలక్ట్రిక్ కార్లు BE 6, XEV 9eని విడుదల చేశాయి. మహింద్రా XEV 9eని రూ.21.90 లక్షల ప్రారంభ ధరతో విడుదల చేసింది. అయితే, ఇప్పుడు ఈ కారుకు టెన్షన్ పెంచడానికి మార్కెట్‌లోకి మరో కొత్త ఎలక్ట్రిక్ ఎస్‌యూవీ వచ్చింది. దీని ధర కూడా రూ.21.49 లక్షల నుండి మొదలవుతుంది. ఆ కారు మరేదో కాదు... టాటా మోటార్స్ నుంచి వస్తున్న టాటా హారియర్ ఈవీ. కంపెనీ దీన్ని ఇదే సంవత్సరం జనవరిలో జరిగిన ఆటో ఎక్స్‌పోలో మొదటిసారి చూపించింది. ఇప్పుడు ఈ కారును రూ.21.49 లక్షల ఎక్స్-షోరూమ్ ధరతో కంపెనీ లాంచ్ చేసింది. దీని బుకింగ్‌లు జూలై 2వ తేదీ నుంచి ప్రారంభమవుతాయి. మరి టాటా హారియర్ ఈవీ రేంజ్, ఫీచర్లు, మహింద్రా XEV 9eతో ఎలా పోటీ పడుతుందో తెలుసుకుందాం.

బ్యాటరీ ప్యాక్, రేంజ్

టాటా హారియర్ ఈవీ: ఇందులో మీకు 65 kWh, 75 kWh అనే రెండు బ్యాటరీ ప్యాక్‌లు లభిస్తాయి. 75 kWh బ్యాటరీ ప్యాక్‌తో ఒక్కసారి ఛార్జ్ చేస్తే ఏకంగా 627 కిలోమీటర్ల దూరం ప్రయాణించవచ్చు.

మహింద్రా XEV 9e: ఇందులో 79 kWh బ్యాటరీ ప్యాక్ ఉంది. ఇది ఒక్కసారి ఛార్జ్ చేస్తే 656 కిలోమీటర్ల దూరం ప్రయాణించగలదు.

ఛార్జింగ్ విషయానికి వస్తే

మహింద్రా XEV 9e ఫాస్ట్ ఛార్జింగ్‌తో 20 నిమిషాల్లో 20శాతం నుంచి 80శాతం వరకు ఛార్జ్ అవుతుంది. టాటా హారియర్ ఈవీలో కేవలం 15 నిమిషాల ఛార్జింగ్‌తోనే 250 కిలోమీటర్ల వరకు రేంజ్ లభిస్తుంది.

హారియర్ ఈవీ ఫీచర్లు

మహింద్రా XEV 9eలోని చాలా ఫీచర్లు ఇప్పటికే చాలా మందికి తెలుసు. కానీ, టాటా హారియర్ ఈవీలో కొన్ని ప్రత్యేకమైన ఫీచర్లు ఉన్నాయి

V2L, V2V ఫీచర్లు: టాటా హారియర్ ఈవీలో 'వెహికల్ 2 లోడ్' (Vehicle 2 Load - V2L), 'వెహికల్ 2 వెహికల్' (Vehicle 2 Vehicle - V2V) ఫీచర్లు ఉన్నాయి. V2L అంటే కారును ఇన్వర్టర్‌లాగా ఉపయోగించి ఇతర ఎలక్ట్రానిక్ పరికరాలను ఛార్జ్ చేయవచ్చు. V2V అంటే ఒక ఎలక్ట్రిక్ కారు నుంచి మరొక ఎలక్ట్రిక్ కారును ఛార్జ్ చేయవచ్చు. ఈ ఫీచర్లు మహింద్రా కారులో లేవు.

పవర్, టార్క్

టాటా హారియర్ ఈవీ 369 హెచ్‌పీ (HP) పవర్‌ను, 500 ఎన్ఎమ్ (NM) టార్క్‌ను ఉత్పత్తి చేస్తుంది. మహింద్రా కారు 282 హెచ్‌పీ పవర్‌ను, 380 ఎన్ఎమ్ పీక్ టార్క్‌ను ఉత్పత్తి చేస్తుంది. అంటే, టాటా హారియర్ ఈవీ మరింత పవర్ ఫుల్.

యాక్సలరేషన్

మహింద్రా XEV 9e 0 నుంచి 100 కిలోమీటర్ల వేగాన్ని అందుకోవడానికి 6.8 సెకన్లు పడుతుంది. టాటా హారియర్ ఈవీ కేవలం 6.3 సెకన్లలోనే 0 నుండి 100 కిలోమీటర్ల వేగాన్ని అందుకుంటుంది. వేగంలోనూ టాటా ముందే ఉంది.