Tata Motors: వాహనదారులకు షాకింగ్ న్యూస్.. రూ. 25 వేల వరకు పెరిగిన టాటా కార్ల ధరలు

Tata Motors: టాటా కారును ఇంటికి తీసుకెళ్లాలని కలలు కంటున్న వారికి చేదు వార్త అందుతోంది. వచ్చే నెల అంటే సెప్టెంబర్ 1 నుంచి తమ ప్యాసింజర్, ఎలక్ట్రిక్ వాహనాల ధరలను రూ. 25 వేల వరకు పెంచుతున్నట్లు టాటా మోటార్స్ ప్రకటించింది. ఈ నిర్ణయం కారు కొనుగోలుదారుల బడ్జెట్‌పై ప్రభావం చూపనుంది. టాటా మోటార్స్ ప్యాసింజర్ వెహికల్స్ విభాగం తమ కార్లు, ఎస్‌యూవీల ధరలను పెంచుతున్నట్లు అధికారికంగా వెల్లడించింది. సెప్టెంబర్ 1 నుంచి అమల్లోకి రానున్న ఈ సవరణల వల్ల వేర్వేరు వేరియంట్లు, మోడళ్లను బట్టి గరిష్టంగా రూ. 25 వేల వరకు భారం పడనుంది. కేవలం సాంప్రదాయ ఇంధనంతో నడిచే పెట్రోల్, డీజిల్ కార్లకే కాకుండా మార్కెట్లో మంచి ఆదరణ ఉన్న ఎలక్ట్రిక్ వాహనాలకు కూడా ఈ సవరించిన ధరలు వర్తిస్తాయి.

ధరలు పెంచడానికి గల ప్రధాన కారణాలు

కార్ల విడిభాగాల తయారీ వ్యయం, ఉక్కు వంటి ముడిసరుకుల ధరలు నిరంతరం పెరుగుతుండటంతోనే ఈ నిర్ణయం తీసుకోక తప్పలేదని సంస్థ స్పష్టం చేసింది. అంతర్జాతీయంగా నెలకొన్న భౌగోళిక రాజకీయ అస్థిరతలు, ద్రవ్యోల్బణ ప్రభావం వల్ల రవాణా, ఉత్పత్తి ఖర్చులు భారీగా పెరిగాయి. పెరిగిన భారాన్ని వీలైనంత వరకు తామే భరిస్తున్నప్పటికీ, అనివార్య పరిస్థితుల్లో స్వల్ప మొత్తాన్ని వినియోగదారులకు బదిలీ చేయక తప్పడం లేదని కంపెనీ తెలిపింది.

ఒకే ఏడాదిలో రెండోసారి సవరణ

టాటా మోటార్స్ ఈ ఏడాది కార్ల ధరలను పెంచడం ఇది రెండోసారి కావడం గమనార్హం. ఇంతకుముందే జూన్ నెలలో 1.5 శాతం వరకు ధరల పెంపును ప్రకటించగా, అది జులై 1 నుంచి అమలులోకి వచ్చింది. రెండు నెలల వ్యవధిలోనే మళ్లీ ధరలు పెంచుతున్నట్లు ప్రకటించడంతో కారు కొనేందుకు సిద్ధమవుతున్న ఖాతాదారులు నిరాశ వ్యక్తం చేస్తున్నారు. వేరియంట్‌ను బట్టి పెరిగే ఖచ్చితమైన మొత్తంపై డీలర్ల ద్వారా స్పష్టత రానుంది.

మిగిలిన దిగ్గజ కంపెనీలు సైతం అదే బాటలో

ధరల పెంచుతున్న ఆటోమొబైల్ కంపెనీల్లో టాటా మోటార్స్ ఒక్కటే లేదు. మార్కెట్ దిగ్గజాలైన మారుతీ సుజుకీ, హ్యుందాయ్ మోటార్స్ ఇప్పటికే తమ వాహనాల ధరలను సవరించాయి. హ్యుందాయ్ మోటార్ ఇండియా కూడా సెప్టెంబర్ నుంచి తమ అన్ని మోడళ్లపై 1 శాతం వరకు ధర పెంచుతున్నట్లు ఇటీవల ప్రకటించింది. కంపెనీలు అన్నీ వరుసగా రేట్లు పెంచుతుండటంతో కొత్త కారు కొనే ప్లాన్ ఉన్నవారు సెప్టెంబర్ 1 కంటే ముందే బుక్ చేసుకోవడం మంచిదని నిపుణులు సూచిస్తున్నారు.