Nitin Gadkari : వాహనాలను స్క్రాప్ చేసే పనిలోకి టాటా మోటార్స్.. నితిన్ గడ్కరీ కీలక ప్రకటన!

Nitin Gadkari : టాటా మోటార్స్ 'రిసైకిల్ విత్ రెస్పెక్ట్' పేరుతో రెండు రిజిస్టర్డ్ వెహికల్ స్క్రాపింగ్ ఫెసిలిటీలను ప్రారంభించినట్లు ప్రకటించింది. ఈ కేంద్రాలు ఉత్తరప్రదేశ్‌లోని లక్నో, ఛత్తీస్‌గఢ్‌లోని రాయ్‌పూర్ లలో ప్రారంభమయ్యాయి. కేంద్ర మంత్రి నితిన్ గడ్కరీ వర్చువల్‌గా వీటిని ప్రారంభించారు. ఈ కేంద్రాలలో ప్యాసింజర్ వాహనాల నుండి కమర్షియల్ వాహనాల వరకు అన్ని బ్రాండ్ల వాహనాలను, అవి త్రీ వీలర్ వెహికల్స్ అయినా లేదా టూ వీలర్ వెహికల్స్ అయినా స్క్రాప్ చేయవచ్చు.

ఈ సందర్భంగా నితిన్ గడ్కరీ మాట్లాడుతూ.. ఈ ఆధునిక స్క్రాప్ సెంటర్‌లు జాతీయ వాహన స్క్రాపేజ్ పాలసీ కింద ఒక ముఖ్యమైన అడుగు అని అన్నారు. పాత కారును స్క్రాప్ చేయించినప్పుడు కొత్త కారు కొనుగోలుపై ప్రోత్సాహకాలు పొందవచ్చని ఆయన తెలిపారు. దీని తర్వాత ప్రజలు కాలుష్యం సృష్టించే పాత వాహనాలను తొలగించి, కొత్త ఎక్కువ ఇంధన సామర్థ్యం ఉన్న వెహికల్స్ తీసుకోవచ్చు. ఈ స్క్రాపింగ్ సౌకర్యాలు పాత వాహనాలను సురక్షితంగా తొలగించడంలో సహాయపడతాయి. ఆ తర్వాత ఈ వాహనాలను రీసైకిల్ చేస్తారు.

గడ్కరీ మాట్లాడుతూ.. "దేశవ్యాప్తంగా ఇటువంటి సౌకర్యాలను ఏర్పాటు చేసినందుకు నేను టాటా మోటార్స్‌ను అభినందిస్తున్నాను. ఇటువంటి కార్యక్రమాలు దేశంలో బలమైన, ప్రభావవంతమైన వాహన స్క్రాపింగ్ వ్యవస్థను సృష్టిస్తాయి. దీనివల్ల ప్రజలు తమ పాత వాహనాలను సులభంగా స్క్రాప్ చేయించుకోగలరు" అని అన్నారు.

రాయ్‌పూర్‌లోని కేంద్రాన్ని టాటా మోటార్స్ భాగస్వామి అయిన రాయ్‌పూర్ గ్రీన్ ఎనర్జీ నడుపుతుంది. దీనికి ప్రతి సంవత్సరం సుమారు 25,000 వాహనాలను స్క్రాప్ చేసే కెపాసిటీ ఉంటుంది. లక్నోలోని కేంద్రాన్ని మోటో స్క్రాప్‌ల్యాండ్ నడుపుతోంది. ఇక్కడ ప్రతి సంవత్సరం 15,000 వాహనాలను స్క్రాప్ చేయవచ్చు.

టాటా మోటార్స్ ఎగ్జిక్యూటివ్ డైరెక్టర్ గిరీష్ వాఘ్ మాట్లాడుతూ.. ప్రతి సంవత్సరం 1.75 లక్షలకు పైగా పాత వాహనాలను వీటి ద్వారా స్క్రాప్ చేయవచ్చని అన్నారు. పాత కారును స్క్రాప్ చేయించినప్పుడు ప్రజలు కొత్త వాహనాన్ని కొనుగోలు చేసినప్పుడు రోడ్ ట్యాక్స్, రిజిస్ట్రేషన్ లో రాయితీ పొందవచ్చు. కొన్ని కంపెనీలు స్క్రాప్ సర్టిఫికేట్ చూపించినప్పుడు డిస్కౌంట్‌లను కూడా అందిస్తాయి.

పాత వాహనాలు ఎక్కువ పొగను విడుదల చేసి పర్యావరణానికి హాని కలిగిస్తాయి. స్క్రాపింగ్ సౌకర్యాలు వాహనం బరువును బట్టి మంచి డబ్బును ఇస్తాయి. అలాగే, స్క్రాప్ సర్టిఫికేట్ కూడా లభిస్తుంది. ఇది భవిష్యత్తులో ప్రయోజనకరంగా ఉంటుంది. దీనితో పాటు పాత వాహనం మీ పేరు మీద ఉన్నప్పటికీ, అది ఉపయోగిస్తున్నా లేదా ఉపయోగించకపోయినా దాని రిజిస్ట్రేషన్ ఆర్‌టిఓలో రద్దు అవుతుంది