Tata Sierra EV vs MG ZS EV : టాటా సియెర్రా ఈవీ vs ఎంజీ జెడ్ఎస్ ఈవీ.. ఈ రెండింటిలో ఏ ఎలక్ట్రిక్ కారు బెస్ట్ ?

Tata Sierra EV vs MG ZS EV : భారత ఎలక్ట్రిక్ వాహనాల మార్కెట్లో గట్టి పోటీ నడుస్తోంది. ఇటీవల సరికొత్తగా లాంచ్ అయిన టాటా సియెర్రా ఈవీ తన అద్భుతమైన ఫీచర్లు, అడ్వాన్స్డ్ సేఫ్టీ ఫీచర్లు, పవర్‌ఫుల్ పర్ఫార్మెన్స్‌తో మార్కెట్లో హాట్ టాపిక్‌గా మారింది. మరోవైపు, ఈ సెగ్మెంట్‌లో చాలా కాలంగా నమ్మకమైన మోడల్‌గా కొనసాగుతున్న ఎంజీ జెడ్ఎస్ ఈవీ కూడా ప్రీమియం ఇంటీరియర్ క్వాలిటీ, మంచి రేంజ్‌తో గట్టి పోటీ ఇస్తోంది. ఈ నేపథ్యంలో కొత్త ఈవీ కారు కొనాలనుకునే వారు ఈ రెండింటిలో ఏది బెస్ట్ ఆప్షన్ అని ఆలోచిస్తున్నారు. ధర, ఫీచర్లు, పవర్‌ట్రెయిన్, మైలేజ్ పరంగా ఈ రెండు కార్ల మధ్య ఉన్న తేడాలేంటో వివరంగా చూద్దాం.

ధరల రేసులో ఎవరిది పైచేయి?

మొదటగా ధరల విషయానికి వస్తే, టాటా సియెర్రా ఈవీ ప్రారంభ ఎక్స్-షోరూమ్ ధర రూ. 18.79 లక్షల నుంచి ప్రారంభమై టాప్ వేరియంట్ ధర రూ. 26 లక్షల వరకు ఉంటుంది. అదే సమయంలో ఎంజీ జెడ్ఎస్ ఈవీ ప్రారంభ ధర రూ. 17.99 లక్షలుగా ఉంది, దీని టాప్ వేరియంట్ ధర రూ. 20.74 లక్షలు మాత్రమే. అంటే సియెర్రా ఈవీ బేస్ మోడల్ ధర ఎంజీ కంటే రూ. 80,000 ఎక్కువగా ఉండగా, టాప్ వేరియంట్ల మధ్య ఏకంగా రూ. 5.25 లక్షల భారీ వ్యత్యాసం ఉంది. అయితే, ఎంజీ జెడ్ఎస్ ఈవీలో ఉన్న ఒక పెద్ద ప్లస్ పాయింట్ ఏంటంటే, ఇది BaaS సబ్‌స్క్రిప్షన్ ప్లాన్‌తో కూడా లభిస్తుంది. దీనివల్ల కారు బేస్ వేరియంట్ ధర రూ. 13 లక్షలకు తగ్గిపోతుంది, మిగిలిన మొత్తాన్ని కిలోమీటరుకు రూ. 4.5 చొప్పున బ్యాటరీ అద్దెగా చెల్లించాల్సి ఉంటుంది. తక్కువ బడ్జెట్ ఉన్నవారికి ఎంజీ కారు మంచి ఆప్షన్ కాగా, ఒకేసారి పూర్తి మొత్తం చెల్లించాలనుకునే వారికి సియెర్రా ఈవీ అందుబాటులో ఉంటుంది.

బూట్ స్పేస్, క్యాబిన్ కంఫర్ట్

కారు సైజు, కొలతల విషయానికి వస్తే టాటా సియెర్రా ఈవీ దాదాపు అన్ని రకాలుగా ఎంజీ జెడ్ఎస్ ఈవీ కంటే పెద్దదిగా ఉంటుంది. సియెర్రా ఈవీ పొడవు 4340 మి.మీ (ఎంజీ కంటే 17 మి.మీ ఎక్కువ), వెడల్పు 1841 మి.మీ (ఎంజీ కంటే 32 మి.మీ ఎక్కువ), ఎత్తు 1750 మి.మీ (ఎంజీ కంటే 101 మి.మీ ఎక్కువ) గా ఉంటుంది. వీల్‌బేస్ విషయానికొస్తే సియెర్రా ఈవీ 2730 మి.మీ కలిగి ఉండి ఎంజీ జెడ్ఎస్ ఈవీ (2585 మి.మీ) కంటే 145 మి.మీ ఎక్కువగా ఉంటుంది. దీనివల్ల సియెర్రా ఈవీ లోపల కూర్చోవడానికి చాలా విశాలమైన క్యాబిన్ స్పేస్ దొరుకుతుంది. లగేజీ పెట్టుకోవడానికి సియెర్రా ఈవీలో ఏకంగా 622 లీటర్ల భారీ బూట్ స్పేస్ లభిస్తుంది, ఇది ఎంజీ జెడ్ఎస్ ఈవీ (448 లీటర్లు) కంటే 174 లీటర్లు ఎక్కువ. కలర్ ఆప్షన్లలో కూడా టాటా సియెర్రా 7 రంగులలో లభిస్తుండగా, ఎంజీ కేవలం 4 రంగులలోనే వస్తుంది.

బ్యాటరీ ఆప్షన్లు, రేంజ్

ఇంజన్ పవర్ మరియు బ్యాటరీ విషయానికి వస్తే టాటా సియెర్రా ఈవీ చాలా పవర్‌ఫుల్‌గా నిలుస్తుంది. సియెర్రా ఈవీ లో 63 kWh, 75 kWh అనే రెండు పెద్ద బ్యాటరీ ప్యాక్ ఆప్షన్లు ఉన్నాయి. అదే ఎంజీ జెడ్ఎస్ ఈవీ లో కేవలం 50.3 kWh బ్యాటరీ ప్యాక్ మాత్రమే లభిస్తుంది. డ్రైవ్‌ట్రెయిన్ పరంగా చూస్తే సియెర్రా ఈవీ సింగిల్-మోటార్ ఆర్‌డబ్ల్యూడీ, డ్యూయల్-మోటార్ ఏడబ్ల్యూడీ ఆప్షన్లలో లభిస్తుంది, కానీ ఎంజీ కేవలం ఎఫ్‌డబ్ల్యూడీ ఆప్షన్‌తోనే వస్తుంది. పవర్ పరంగా సియెర్రా బేస్ మోడల్ కూడా 238 పీఎస్ పవర్, 315 ఎన్ఎమ్ టాక్‌ను ఇస్తుంది, ఇది ఎంజీ (177 పీఎస్ పవర్, 280 ఎన్ఎమ్ టాక్) కంటే చాలా ఎక్కువ. మైలేజ్ రేంజ్ విషయానికి వస్తే ఎంజీ జెడ్ఎస్ ఈవీ ఫుల్ ఛార్జ్‌పై 461 కిలోమీటర్ల రేంజ్ ఇస్తుండగా, టాటా సియెర్రా ఈవీ తన 75 kWh బ్యాటరీతో ఏకంగా 665 కిలోమీటర్ల మైలేజ్ రేంజ్ ఇస్తుందని సర్టిఫై చేయబడింది.

త్రీ-స్క్రీన్ సెటప్, జేబీఎల్ 12 స్పీకర్లు

ఫీచర్లు, సేఫ్టీ విభాగంలో టాటా సియెర్రా ఈవీ సరికొత్త టెక్నాలజీతో దూసుకుపోతోంది. సియెర్రా ఈవీలో అదిరిపోయే త్రీ-స్క్రీన్ సెటప్ ఉంది. ఇందులో వైర్‌లెస్ ఆపిల్ కార్‌ప్లే, ఆండ్రాయిడ్ ఆటోతో కూడిన 12.3 అంగుళాల మెయిన్ ఇన్‌ఫోటైన్‌మెంట్ స్క్రీన్, డ్రైవర్ కోసం 10.25 అంగుళాల డిజిటల్ డిస్‌ప్లే, పక్కన కూర్చునే కో-డ్రైవర్ ఎంటర్‌టైన్‌మెంట్ కోసం ప్రత్యేకంగా మరో 12.3 అంగుళాల స్క్రీన్ ఉన్నాయి. అదే ఎంజీ జెడ్ఎస్ ఈవీ లో కేవలం 7 అంగుళాల టచ్‌స్క్రీన్ మాత్రమే లభిస్తుంది. సౌండ్ సిస్టమ్ విషయానికి వస్తే సియెర్రా ఈవీలో డాల్బీ అట్మోస్ సపోర్ట్‌తో కూడిన 12 స్పీకర్ల జేబీఎల్ సౌండ్ సిస్టమ్ ఉండగా, ఎంజీలో కేవలం 4 స్పీకర్లు మాత్రమే ఉన్నాయి. భద్రత పరంగా ఈ రెండు కార్లలోనూ లెవెల్-2 ఏడీఏఎస్ సేఫ్టీ ఫీచర్ ఉంది, కానీ సియెర్రా ఈవీలో అదనంగా ఆఫ్-రోడింగ్ కోసం ఉపయోగపడే 540-డిగ్రీ కెమెరా, పెద్ద 19 అంగుళాల అలాయ్ వీల్స్ లభిస్తాయి. ఎంజీలో కేవలం 17 అంగుళాల అలాయ్ వీల్స్ మాత్రమే ఉంటాయి.