VinFast : మహీంద్రా, హ్యుందాయ్ కంపెనీలకు సెప్టెంబర్ 6న చలిజ్వరం రావడం ఖాయం

VinFast : భారతీయ ఎలక్ట్రిక్ వాహనాల మార్కెట్‌లోకి విన్‌ఫాస్ట్ అనే కొత్త కంపెనీ అడుగుపెడుతోంది. ఈ సంస్థ తమ పవర్ఫుల్ ఎలక్ట్రిక్ ఎస్‌యూవీలైన వీఎఫ్‌6, వీఎఫ్‌7ల విడుదల తేదీని అధికారికంగా ప్రకటించింది. ఈ రెండు మోడళ్లు 2025 సెప్టెంబర్ 6న భారత మార్కెట్లో లాంచ్ కానున్నాయి. ఇది ఇప్పటికే మార్కెట్లో ఉన్న మహీంద్రా, హ్యుందాయ్ వంటి కంపెనీలకు గట్టి పోటీ ఇవ్వగలదని ఆటోమొబైల్ నిపుణులు భావిస్తున్నారు. ఈ సంవత్సరం ప్రారంభంలో ఢిల్లీలో జరిగిన భారత్ మొబిలిటీ గ్లోబల్ ఎక్స్‌పోలో వీఎఫ్‌6 , వీఎఫ్‌7 మోడళ్లను తొలిసారిగా ప్రదర్శించారు. ఇటీవల, ఈ రెండు ఎస్‌యూవీల బుకింగ్‌లను విన్‌ఫాస్ట్ కేవలం రూ. 21,000 టోకెన్ ధరతో ప్రారంభించింది. మొదట ఈ కార్లు ఆగస్టులోనే విడుదల అవుతాయని అంచనా వేసినప్పటికీ, ఇప్పుడు అధికారికంగా సెప్టెంబర్ 6న లాంచ్ చేయనున్నట్లు కంపెనీ వెల్లడించింది.

పాత నివేదికల ప్రకారం, వీఎఫ్‌7 ఎస్‌యూవీ మూడు వేరియంట్లలో లభిస్తుంది: ఎర్త్, విండ్, స్కై. అలాగే, ఇది జెట్ బ్లాక్, డెజర్ట్ సిల్వర్, ఇన్ఫినిటీ బ్లాంక్, క్రిమ్‌సన్ రెడ్, జెనిత్ గ్రే, అర్బన్ మింట్ వంటి 6 రంగులలో అందుబాటులోకి రానుంది. ఈ రంగులు దాని డిజైన్‌ను మరింత ఆకర్షణీయంగా మార్చుతాయి. ఈ కారు ముందు భాగంలో డిఆర్‌ఎల్‌లు ప్రత్యేకంగా నిలుస్తాయి. ఇవి కారు మొత్తం వెడల్పుగా వ్యాపించి మధ్యలో V ఆకారంలో కలుస్తాయి. ఇది విన్‌ఫాస్ట్ బ్రాండ్ లోగోను హైలైట్ చేస్తుంది.

విన్‌ఫాస్ట్ వీఎఫ్‌7 రెండు కాన్ఫిగరేషన్లలో వస్తుంది: 2డబ్ల్యుడి, 4డబ్ల్యుడి. దీనిలో 70.8 kWh బ్యాటరీ ప్యాక్ ఉంటుంది. 2డబ్ల్యుడి మోడల్‌లో 204 హెచ్‌పి పవర్ ఇచ్చే ఫ్రంట్ ఇంజిన్ ఉంటుంది. ఏడబ్ల్యుడి వేరియంట్‌లో ఒక రియర్ మోటార్ కూడా ఉంటుంది. ఇది మొత్తం 350 హెచ్‌పి పవర్ , 500 ఎన్ఎమ్ టార్క్‌ను ఉత్పత్తి చేస్తుంది. వీఎఫ్‌7 ఏడబ్ల్యుడి వేరియంట్ 431 కిలోమీటర్ల డబ్ల్యుఎల్‌టిపి రేంజ్‌ను ఇస్తే, ఫ్రంట్-వీల్-డ్రైవ్ వెర్షన్ 450 కిలోమీటర్ల రేంజ్‌ను ఇస్తుంది.

విన్‌ఫాస్ట్ వీఎఫ్‌6 కూడా పవర్ఫుల్ డిజైన్‌ను కలిగి ఉంది. దీని ముందు భాగంలో ఎల్‌ఈడీ డేటైమ్ రన్నింగ్ లైట్లు ఉన్నాయి. ఈ ఎల్‌ఈడీ లైట్లు మధ్యలో ఉన్న V లోగో దగ్గరకు వచ్చేసరికి కిందికి వస్తాయి. ఇందులో వెడల్పుగా ఉండే ఎయిర్ డ్యామ్‌లు, హనీకాంబ్ ప్యాటర్న్‌తో కూడిన గ్రిల్ ఉంటుంది. వెనుక భాగంలో కూడా ముందు డిజైన్‌లాగానే ఎల్‌ఈడీ స్ట్రిప్ టెయిల్ లైట్ ఉంటుంది. ఈ ఎస్‌యూవీలో 59.6 kWh బ్యాటరీ ప్యాక్ ఉంది. ఇది ఫ్రంట్ యాక్సిల్‌పై ఉన్న 204 హెచ్‌పి మోటార్‌కు పవర్‌ను అందిస్తుంది. ఏఆర్‌ఏఐ రేంజ్ వివరాలు ఇంకా తెలియకపోయినా దీని డబ్ల్యుఎల్‌టిపి రేంజ్ 480 కిలోమీటర్లు.