Traffic Challans : ట్రాఫిక్ కెమెరాల తప్పిదంతో మీకు తప్పుడు చలాన్ వచ్చిందా? ఇలా చేస్తే రూపాయి కట్టనక్కర్లేదు

Traffic Challans : ఈ రోజుల్లో బైక్ లేదా కారు ఉన్న ప్రతి ఒక్కరినీ వేధించే ప్రధాన సమస్య ట్రాఫిక్ చలాన్లు. సిటీల్లో ఎక్కడ చూసినా ఆటోమేటిక్ సిసిటివి కెమెరాలు, ఏఎన్‌పీఆర్ టెక్నాలజీతో కూడిన నిఘా ఉండటంతో.. నిబంధనలు ఉల్లంఘిస్తే క్షణాల్లో మొబైల్‌కు ఈ-చలాన్ మెసేజ్ వచ్చేస్తోంది. అయితే, కొన్నిసార్లు మనం ఎలాంటి తప్పు చేయకపోయినా, అసలు ఆ ప్రాంతానికే వెళ్లకపోయినా మన బండి నంబర్‌పై తప్పుడు చలాన్ పడుతుంటుంది. కెమెరాల సాంకేతిక లోపాలు లేదా నంబర్ ప్లేట్ రీడింగ్ తప్పుగా జరగడం వల్ల ఇలాంటివి జరుగుతాయి. ఒకవేళ మీకు కూడా ఇలాంటి రాంగ్ చలాన్ వస్తే.. కంగారు పడి డబ్బులు కట్టాల్సిన అవసరం లేదు. దాన్ని ఆన్‌లైన్‌లోనే ఈజీగా రద్దు చేయించుకోవచ్చు. ఆ ప్రాసెస్ ఏంటో ఇక్కడ వివరంగా తెలుసుకుందాం.

అసలు తప్పుడు చలాన్లు ఎందుకు పడతాయి?

ప్రస్తుతం హైదరాబాద్, బెంగళూరు, ఢిల్లీ, ముంబై లాంటి పెద్ద నగరాల్లో పోలీసులు ఆటోమేటిక్ నంబర్ ప్లేట్ రికగ్నిషన్ కెమెరాలను వాడుతున్నారు. ఈ సిస్టమ్ ఫోటో ఆధారంగా నంబర్ ప్లేట్‌ను రీడ్ చేస్తుంది. అయితే వర్షం పడినప్పుడు, రాత్రి వేళల్లో లైటింగ్ సరిగ్గా లేనప్పుడు లేదా వేరే బండి నంబర్ ప్లేట్ పగిలిపోయి ఉన్నప్పుడు.. కెమెరా అక్షరాలను తప్పుగా అంచనా వేస్తుంది. దీనివల్ల ఎవరో చేసిన తప్పుకు, సంబంధం లేని మరో అమాయక వాహనదారుడికి చలాన్ జనరేట్ అవుతుంది. కొన్నిసార్లు ఒకే తప్పుకు పొరపాటున రెండు సార్లు కూడా చలాన్ పడుతుంటుంది.

రాంగ్ చలాన్ రాగానే మొదట ఏం చేయాలి?

మీ ఫోన్‌కు చలాన్ మెసేజ్ రాగానే ముందుగా అధికారిక ఈ-చలాన్ వెబ్‌సైట్ లేదా యాప్‌లోకి వెళ్లి పూర్తి వివరాలను సరిచూసుకోండి. అందులో ఉన్న చలాన్ తేదీ, సమయం, లొకేషన్, ముఖ్యంగా చలాన్‌తో పాటు అటాచ్ చేసిన ఫొటో ఆధారాలను క్షుణ్ణంగా పరిశీలించండి. ఆ ఫొటోలో ఉన్న బండి మీదేనా? నంబర్ ప్లేట్ మీ బండిదేనా? అనేది చెక్ చేసుకోండి. ఒకవేళ అది మీ బండి కాదని తేలితే.. ఆ సమయంలో మీరు వేరే ప్రాంతంలో ఉన్నట్లు నిరూపించేందుకు జీపీఎస్ రికార్డ్స్, ఫాస్టాగ్ టోల్ రశీదులు, లేదా మీ కారు డ్యాష్‌క్యామ్ వీడియోల వంటి ఆధారాలను సిద్ధం చేసుకోండి.

ఆన్‌లైన్‌లో ఫిర్యాదు చేయడం ఎలా?

తప్పుడు చలాన్‌ను ఛాలెంజ్ చేయడానికి రవాణా శాఖ అధికారిక పోర్టల్ లో సులువైన మార్గం ఉంది.

స్టెప్ 1: మొదట కేంద్ర ప్రభుత్వ అధికారిక పరివాహన్ ఈ-చలాన్ వెబ్‌సైట్ (echallan.parivahan.gov.in) లేదా మీ స్థానిక రాష్ట్ర ట్రాఫిక్ పోలీస్ వెబ్‌సైట్ ఓపెన్ చేయండి.

స్టెప్ 2: హోమ్ పేజీలో కనిపించే Complaint లేదా Grievance సెక్షన్‌పై క్లిక్ చేయండి.

స్టెప్ 3: అక్కడ మీ పేరు, మొబైల్ నంబర్, బండి నంబర్, చలాన్ నంబర్ వివరాలను ఎంటర్ చేసి లాగిన్ అవ్వండి.

స్టెప్ 4: డ్రాప్‌డౌన్ మెనూ నుంచి మీ సమస్యను ఎంచుకోండి (ఉదాహరణకు: Wrong Vehicle Number లేదా Wrong Violation). అనంతరం డిస్క్రిప్షన్ బాక్స్‌లో ఈ చలాన్ ఎందుకు తప్పో స్పష్టంగా రాయండి.

స్టెప్ 5: మీ బండి ఒరిజినల్ ఫోటో, మీ వద్ద ఉన్న ఆధారాలను అప్‌లోడ్ చేసి సబ్మిట్ నొక్కండి.

ఈమెయిల్ ద్వారా కూడా సంప్రదించవచ్చు

మీరు పోర్టల్ ద్వారా కాకుండా, చలాన్ ఫొటోను జతచేస్తూ సంబంధిత సిటీ ట్రాఫిక్ పోలీస్ అధికారిక ఈమెయిల్ ఐడీకి మెయిల్ పంపడం ద్వారా లేదా వారి హెల్ప్‌లైన్ నంబర్‌కు కాల్ చేయడం ద్వారా కూడా ఫిర్యాదు చేయవచ్చు. సాధారణంగా మీ అభ్యర్థనను పరిశీలించి చలాన్ రద్దు చేయడానికి 15 రోజుల సమయం పడుతుంది. చాలామంది రూ.200 లేదా రూ.500 చలానే కదా అని లైట్ తీసుకుని వదిలేస్తుంటారు. కానీ తప్పుడు చలాన్లను నిర్లక్ష్యం చేస్తే భవిష్యత్తులో కోర్టు నుండి సమన్లు రావడం లేదా బండి ఫిట్‌నెస్, ఇన్సూరెన్స్ రిన్యూవల్ సమయంలో ఇబ్బందులు ఎదురవుతాయి. కాబట్టి సమయానికి స్పందించి మీ డబ్బును, హక్కులను కాపాడుకోండి.