Auto Sales: 11 నెలల్లో ఏకంగా 3 కోట్లు.. జీఎస్‌టీ తగ్గింపుతో ఆటో రంగంలో సరికొత్త రికార్డు

Auto Sales: గతంలో ప్రభుత్వం జీఎస్‌టీ సంస్కరణల ప్రభావం ఇప్పుడు భారతీయ ఆటోమొబైల్ రంగంపై స్పష్టంగా కనిపిస్తోంది. పన్నుల తగ్గింపు కారణంగా కార్లు, బైక్‌ల ధరలు గణనీయంగా తగ్గడంతో ఆటో సెక్టార్‌లోకి మళ్లీ కొత్త కళ వచ్చింది. ఈ ట్యాక్స్ సడలింపుల వల్ల దేశవ్యాప్తంగా వాహనాల అమ్మకాల్లో ఏకంగా 20 శాతం వరకు భారీ వృద్ధి నమోదైంది. కొనుగోలుదారులు ఎంతో కాలంగా ఎదురుచూస్తున్న ధరల తగ్గింపు రావడం వల్ల షోరూమ్‌లకు కస్టమర్ల తాకిడి విపరీతంగా పెరిగింది. ఈ పెరుగుదల కేవలం ఆటో మేకర్స్‌కే కాకుండా దేశ ఆర్థిక వ్యవస్థకు, వినియోగదారుల ఖర్చులకు కూడా ఎంతో బలాన్ని చేకూరుస్తోంది.

ప్రముఖ కార్ల తయారీ సంస్థలైన మారుతి సుజుకి, హ్యుందాయ్ మోటార్స్ ఈ వృద్ధిలో ముందువరుసలో నిలిచాయి. దేశంలో గడచిన 11 నెలల కాలంలో మొత్తం 3 కోట్ల వాహనాల రిజిస్ట్రేషన్లు జరిగాయని గణాంకాలు చెబుతున్నాయి. ముఖ్యంగా ఏప్రిల్ నుంచి ఆగస్టు 2026 మధ్య కాలంలో మారుతి సుజుకి ప్యాసింజర్ వెహికల్స్ విక్రయాలు ఏడాది ప్రాతిపదికన దాదాపు 36 శాతం పెరిగాయి. ఇందులోనూ ఎంట్రీ-లెవెల్ సెగ్మెంట్‌లో ఏకంగా 96 శాతానికి పైగా వృద్ధి నమోదు కావడం విశేషం. మరోవైపు హ్యుందాయ్ మోటార్స్ ఇండియా కూడా ప్రతి నెల 4 లక్షలకు పైగా యూనిట్ల హోల్‌సేల్ అమ్మకాలతో కొత్త రికార్డులను సృష్టిస్తూ 'న్యూ నార్మల్'ను సాధించింది.

ఫెడరేషన్ ఆఫ్ ఆటోమొబైల్ డీలర్స్ అసోసియేషన్ (FADA) విడుదల చేసిన గణాంకాల ప్రకారం.. గ్రామీణ, పట్టణ ప్రాంతాల్లో డిమాండ్ అద్భుతంగా పుంజుకుంది. పాత కాలంతో పోలిస్తే టూ-వీలర్ల విక్రయాలు రికార్డు స్థాయికి చేరాయి. ముఖ్యంగా ప్యాసింజర్ సెగ్మెంట్‌లో తొలిసారిగా ఆల్టర్నేటివ్-ఫ్యూయల్ వాహనాలు సాంప్రదాయ పెట్రోల్ మోడళ్లను వెనక్కి నెట్టడం గమనార్హం. చిన్న పట్టణాలు, గ్రామీణ మార్కెట్లలో వినియోగదారుల కొనుగోలు శక్తి పెరగడం వల్ల ఆటోమొబైల్ మార్కెట్ పరిధి మరింత విస్తృతంగా మారుతోంది.

కేవలం చిన్న కార్లు మాత్రమే కాకుండా ఎస్‌యూవీ కార్ల అమ్మకాలు కూడా జోరుగా సాగుతున్నాయి. జీఎస్‌టీ సంస్కరణల పుణ్యమా అని ఎస్‌యూవీల విక్రయాలు 17 శాతం పెరగగా, లైట్ కమర్షియల్ వెహికల్స్, ట్రాక్టర్ల అమ్మకాల్లో 20 శాతం వృద్ధి నమోదైంది. దీనివల్ల ఫైనాన్స్ రంగం, రియల్ ఎస్టేట్, హాస్పిటాలిటీ వ్యాపారాలు కూడా పుంజుకున్నాయి. అయితే మరోవైపు గ్లోబల్ మార్కెట్లో కరెన్సీ మార్పులు, ముడిసరుకుల ధరల ఒత్తిడిని కంపెనీలు తామే భరిస్తున్నప్పటికీ, దేశీయంగా మాత్రం డిమాండ్ మాత్రం ఎక్కడా తగ్గకుండా దూసుకుపోతోంది.