Gold Price: పసిడి ప్రియులకు షాక్.. రాబోయే రోజుల్లో మరింత పెరగనున్న ధరలు

Gold Price: ప్రపంచవ్యాప్తంగా ఆర్థిక మార్కెట్లలో నెలకొన్న అనిశ్చితి కారణంగా పెట్టుబడిదారులు సురక్షితమైన ప్రత్యామ్నాయాలపై దృష్టి సారిస్తున్నారు. ముఖ్యంగా సంపన్న కుటుంబాలు ప్రభుత్వ బాండ్లలో తమ పెట్టుబడులను తగ్గిస్తూ అత్యంత వేగంగా బంగారాన్ని కొనుగోలు చేసి నిల్వ చేసుకుంటున్నాయి. ప్రముఖ ఆర్థిక వార్తా సంస్థ ఫైనాన్షియల్ టైమ్స్ నివేదిక ప్రకారం.. పెరుగుతున్న ప్రభుత్వ అప్పులు అలాగే అంతర్జాతీయ ఆర్థిక భయాల నేపథ్యంలో రాబోయే రెండు సంవత్సరాల్లో పసిడి ధరలు సరికొత్త రికార్డు స్థాయికి చేరుకునే అవకాశం ఉంది. ఇటీవల అమెరికా ఫెడరల్ రిజర్వ్ వడ్డీ రేట్లు పెంచవచ్చనే అంచనాలతో ధరలు కొద్దిగా తగ్గినప్పటికీ, దీర్ఘకాలికంగా మాత్రం బంగారానికి డిమాండ్ విపరీతంగా పెరుగుతోంది.

బంగారం వైపు మళ్లుతున్న ఇన్వెస్టర్లు

ప్రపంచ ఆర్థిక వ్యవస్థలో వస్తున్న మార్పుల వల్ల భవిష్యత్తుపై ఆందోళనలు వ్యక్తమవుతున్నాయి. మైనింగ్ సంస్థ ఎలైడ్ గోల్డ్ ఛైర్మన్ పీటర్ మేరాన్ వెల్లడించిన వివరాల ప్రకారం.. ఆర్థిక అస్థిరత పెరుగుతున్న తరుణంలో సంపన్నుల ఆస్తులను నిర్వహించే ఫ్యామిలీ ఆఫీసులు గోల్డ్‌పై ఎక్కువ శ్రద్ధ చూపుతున్నాయి. ఈ క్రమంలోనే చాలామంది తమ వద్ద ఉన్న ప్రభుత్వ బాండ్లను విక్రయించి ఆ మొత్తాన్ని బంగారంలోకి మళ్లిస్తున్నారు. కాగితపు కరెన్సీ విలువ కాలక్రమేణా పడిపోతుందనే భయంతో పాటు అమెరికా భారీ అప్పుల ఊబిలో కూరుకుపోవడం వంటి పరిణామాలు పసిడికి తిరుగులేని రక్షణ కవచంగా మారుతున్నాయి.

సెంట్రల్ బ్యాంకుల భారీ కొనుగోళ్లు అలాగే చైనా వ్యూహం

కేవలం సంపన్నులు మాత్రమే కాకుండా వివిధ దేశాల సెంట్రల్ బ్యాంకులు సైతం తమ రిజర్వ్‌లలో బంగారాన్ని భారీగా పెంచుకుంటున్నాయి. అమెరికా డాలర్‌పై ఎక్కువగా ఆధారపడకుండా ప్రత్యామ్నాయ మార్గాలను అన్వేషిస్తున్న దేశాలు పసిడిని సురక్షిత ఆస్తిగా భావిస్తున్నాయి. వరల్డ్ గోల్డ్ కౌన్సిల్ గణాంకాల ప్రకారం.. సెప్టెంబర్ నెలలో సెంట్రల్ బ్యాంకులు సుమారు 63 టన్నుల బంగారాన్ని కొనుగోలు చేశాయి. ఇందులో పీపుల్స్ బ్యాంక్ ఆఫ్ చైనా తన వద్ద దాదాపు 2,410 టన్నుల బంగారాన్ని నిల్వ ఉంచుకుని తన రిజర్వ్‌ను మరింత బలపరుచుకుంది.

భవిష్యత్తులో ధరల సరళి ఎలా ఉండబోతోంది?

ట్రాయ్ అసెట్ మేనేజ్‌మెంట్ నిపుణులు అంచనా వేస్తున్న ప్రకారం.. రాబోయే 12 నుంచి 18 నెలల కాలంలో పసిడి ధరలు ఊహించని శిఖరాలను తాకవచ్చు. ప్రభుత్వాలు విపరీతంగా నోట్లు ముద్రించడం వల్ల కరెన్సీపై ప్రజల నమ్మకం సడలుతుంది, కానీ బంగారాన్ని అలా ఇష్టానుసారంగా కృత్రిమంగా పెంచలేము. ఇదే ప్రధాన కారణం వల్ల తమ సంపదను కాపాడుకోవాలనుకునే మదుపరులకు బంగారం ఎప్పటికీ మొదటి ఎంపికగా నిలుస్తోంది. రాబోయే కాలంలో అంతర్జాతీయ రాజకీయ పరిణామాలు అలాగే ద్రవ్యోల్బణ పరిస్థితులు పసిడి మార్కెట్‌ను మరింత ప్రభావితం చేసే అవకాశం ఉంది.