Income Tax: ఆదాయపు పన్ను చెల్లింపుదారులకు నవంబర్ నెల కీలకం కానుంది. ముఖ్యంగా వ్యాపారులు, ఉద్యోగులకు జీతాలు చెల్లించే సంస్థలు, టీడీఎస్‌ బాధ్యతలు నిర్వహించే వారు కొన్ని గడువులను తప్పకుండా గుర్తుంచుకోవాలి. అక్టోబర్ నెలకు సంబంధించిన పన్ను చెల్లింపుల నుంచి ఆదాయపు పన్ను రిటర్నుల దాఖలు వరకు పలు పనులకు ఈ నెలలోనే చివరి తేదీలు ఉన్నాయి. ఏ తేదీన ఏ పని పూర్తి చేయాలో తెలుసుకుందాం.

నవంబర్ 7: అక్టోబర్ నెల పన్ను చెల్లింపులకు గడువు

నవంబర్ 7న మొదటి ముఖ్యమైన గడువు ఉంది. అక్టోబర్ నెలలో చెల్లింపుల సమయంలో మినహాయించిన పన్ను (టీడీఎస్‌), వసూలు చేసిన పన్ను (టీసీఎస్‌) మొత్తాలను ఈ తేదీలోగా ప్రభుత్వ ఖాతాలో జమ చేయాలి. పన్ను మినహాయించే సంస్థలు, వ్యాపారులు, ఇతర బాధ్యతగల వ్యక్తులు ఈ పని పూర్తి చేయాలి. ఆదాయపు పన్ను నిబంధనలు 2026 ప్రకారం, కొన్ని సందర్భాల్లో కొనుగోలుదారుల నుంచి అందిన ప్రకటనలను 127వ నమూనాలో అప్‌లోడ్ చేయాల్సిన గడువు కూడా ఇదే.

నవంబర్ 14, 15: ట్యాక్స్ సర్టిఫికెట్ ఇవ్వాలి

సెప్టెంబర్ నెలలో కొన్ని ప్రత్యేక లావాదేవీలపై పన్ను మినహాయించిన వారు నవంబర్ 14లోగా 132వ నమూనాలో సర్టిఫికెట్ ఇవ్వాలి. అద్దె చెల్లింపులు, స్థిరాస్తుల బదిలీ, సాంకేతిక సేవలకు చెల్లింపులు, డిజిటల్ ఆస్తుల బదిలీ వంటి లావాదేవీలు ఇందులోకి వస్తాయి. ఇక నవంబర్ 15న మరో మూడు పనులు పూర్తి చేయాలి. జూలై నుంచి సెప్టెంబర్ వరకు జీతం కాకుండా ఇతర ఆదాయాలపై మినహాయించిన పన్నుకు సంబంధించి 131వ నమూనాలో ధ్రువపత్రం ఇవ్వాలి. అదే త్రైమాసికానికి వసూలు చేసిన పన్ను వివరాలతో 133వ నమూనాను జారీ చేయాలి. అక్టోబర్ నెలకు సంబంధించిన పన్ను వివరాలను ఖాతాల్లో సర్దుబాటు చేసిన ప్రభుత్వ కార్యాలయాలు 137వ నమూనాలో నివేదిక సమర్పించాలి.

నవంబర్ 21: ఆడిట్‌ పరిధిలో ఉన్నవారికి ఐటీఆర్ గడువు

వ్యాపార లావాదేవీలు నిర్వహిస్తూ ఆదాయపు పన్ను నిబంధనల ప్రకారం ఖాతాల తనిఖీ చేయించుకోవాల్సిన వారికి నవంబర్ 21 కీలకమైన తేదీ. 2025–26 ఆర్థిక సంవత్సరానికి సంబంధించిన 2026–27 మదింపు సంవత్సర ఆదాయపు పన్ను రిటర్నుల దాఖలుకు మొదట అక్టోబర్ 31 చివరి తేదీగా ఉండేది. అయితే కేంద్ర ప్రత్యక్ష పన్నుల మండలి ఈ గడువును నవంబర్ 21 వరకు పొడిగించింది. సంబంధిత వర్గాలకు ఖాతాల తనిఖీ నివేదిక సమర్పించే గడువును కూడా అక్టోబర్ 21 వరకు పొడిగించారు. అయితే ఈ వెసులుబాటు ఆడిట్‌ నిబంధనల పరిధిలోకి వచ్చే నిర్దిష్ట వర్గాలకే వర్తిస్తుంది. ప్రతి ఒక్కరికీ ఈ గడువు వర్తిస్తుందని భావించకూడదు.

నవంబర్ 30: ప్రత్యేక లావాదేవీలకు మరో గడువు

అంతర్జాతీయ లావాదేవీలు లేదా నిర్దిష్ట దేశీయ లావాదేవీలు నిర్వహిస్తూ బదిలీ ధరల నిబంధనల ప్రకారం నివేదిక సమర్పించాల్సిన వారు నవంబర్ 30లోగా 2026–27 మదింపు సంవత్సరానికి ఆదాయపు పన్ను రిటర్ను దాఖలు చేయాలి. అక్టోబర్ నెలలో అద్దె, స్థిరాస్తి బదిలీ, కాంట్రాక్టర్లకు లేదా వృత్తి నిపుణులకు చెల్లింపులు, డిజిటల్ ఆస్తుల బదిలీ వంటి నిర్దిష్ట లావాదేవీలపై పన్ను మినహాయించిన వారు 141వ నమూనాలో వివరాలు సమర్పించాలి.

గడువు దాటితే ఏమవుతుంది?

పన్ను చెల్లింపులు, నివేదికలు, ధ్రువపత్రాలను నిర్ణీత సమయంలో సమర్పించకపోతే వర్తించే నిబంధనల ప్రకారం వడ్డీ, ఆలస్య రుసుము లేదా జరిమానా పడే అవకాశం ఉంది. ధ్రువపత్రాలు ఆలస్యమైతే పన్ను మినహాయింపు వివరాలను సరిపోల్చుకోవడంలోనూ ఇబ్బందులు ఎదురవుతాయి. అందుకే వ్యాపారులు, సంస్థలు, పన్ను మినహాయింపు బాధ్యతలు ఉన్నవారు తమ లెక్కలు ముందుగానే సిద్ధం చేసుకోవాలి. ముఖ్యంగా కొత్త ఆదాయపు పన్ను చట్టం, 2025 అమల్లోకి రావడంతో పాత నమూనాల స్థానంలో కొత్త నమూనాలు వచ్చాయి. కాబట్టి ఏ లావాదేవీకి ఏ నమూనా వర్తిస్తుందో ఆదాయపు పన్ను శాఖ వెబ్‌సైట్‌లో లేదా పన్ను సలహాదారుతో నిర్ధారించుకోవడం మంచిది.

Tags: