Jeff Bezos: ప్రపంచంలోనే అతిపెద్ద ఈ-కామర్స్ సంస్థలలో ఒకటైన అమెజాన్ కంపెనీని ఒక చిన్న గ్యారేజ్ నుంచి ప్రారంభించి గ్లోబల్ దిగ్గజంగా తీర్చిదిద్దిన వ్యవస్థాపకుడు జెఫ్ బెజోస్. ఇటువంటి భారీ వ్యాపార సామ్రాజ్యాలను నిర్వహించడం సాధారణ విషయం కాదు. కంపెనీ పెద్ద నిర్ణయాల నుంచి నిత్యం ఎదురయ్యే సవాళ్ల వరకు ప్రతి దశలోనూ తీవ్రమైన పని ఒత్తిడి ఉంటుంది. అయితే ఈ ఒత్తిడిని, మానసిక ఆందోళనను ఎదుర్కొనేందుకు జెఫ్ బెజోస్ ఒక అద్భుతమైన మార్గాన్ని అనుసరిస్తారు. ఆయన చెప్పిన ఆ ప్రత్యేకమైన నియమం ఎంతోమంది వ్యాపారవేత్తలకు ఆదర్శంగా నిలుస్తోంది.

పని వాయిదా వేయడమే ఒత్తిడికి కారణం

జెఫ్ బెజోస్ 2017లో జరిగిన ఒక ఈవెంట్‌లో తన స్ట్రెస్ మేనేజ్‌మెంట్ సీక్రెట్‌ను బయటపెట్టారు. ఆయన ప్రకారం మనిషికి ఎప్పుడైతే విపరీతమైన ఒత్తిడి కలుగుతుందో, దానికి ప్రధాన కారణం ఆ సమస్యను పరిష్కరించడానికి ఎలాంటి చర్యలు తీసుకోకపోవడమే. ఏ పనినైతే మనం నిరంతరం వాయిదా వేస్తూ ఉంటామో, ఆ భయమే మనలో టెన్షన్‌ను మరింత పెంచుతుంది. సమస్య ఉనికిని గుర్తించి దానిని పరిష్కరించే దిశగా తొలి అడుగు వేసిన క్షణం నుంచే ఒత్తిడి వాటంతట అవే తగ్గిపోవడానికి ఆస్కారం ఉంటుందని ఆయన నమ్ముతారు.

ఒత్తిడిని తగ్గించేందుకు తొలి అడుగు ముఖ్యం

మన శరీరం ఇచ్చే సంకేతాలను సరిగ్గా అర్థం చేసుకోవడం చాలా అవసరమని జెఫ్ స్పష్టం చేశారు. ఎప్పుడైతే మనకు అశాంతి లేదా టెన్షన్ కలుగుతుందో, ఏదో తప్పు జరుగుతోందని గ్రహించి దానికి గల అసలు కారణం ఏమిటో తెలుసుకోవాలి. సమస్య నుంచి పారిపోకుండా దానిని ఎదుర్కొనేందుకు ప్రణాళిక సిద్ధం చేయాలి. పనిని పెండింగ్‌లో పెట్టకుండా ఎప్పుడైతే పరిష్కారం కోసం ప్రయత్నం ప్రారంభిస్తామో, అప్పుడే మన మనసుకు అసలైన ప్రశాంతత లభిస్తుంది.

అందరితో కలిసి పనిచేయడం వల్ల లభించే ఉపశమనం

ఏదైనా పెద్ద సమస్య ఎదురైనప్పుడు దానిని ఒంటరిగా మోయాల్సిన అవసరం లేదని జెఫ్ బెజోస్ అభిప్రాయపడ్డారు. తోటి ఉద్యోగులు, స్నేహితులు లేదా ఆ విషయంలో అనుభవం ఉన్నవారితో చర్చించడం ద్వారా సులభంగా పరిష్కారం దొరుకుతుంది. ఒకే గదిలో కూర్చుని సమస్య పరిష్కారం కోసం ఆలోచించే వ్యక్తులు ఉన్నప్పుడు ఆ ప్రక్రియ ఒత్తిడిని కలిగించకుండా ఎంతో ఆసక్తికరంగా మారుతుంది. మైక్రోసాఫ్ట్ సీఈఓ సత్య నాడేళ్ల కూడా ఉద్యోగులపై భారాన్ని తగ్గించి మంచి వాతావరణం కల్పించడంపై దృష్టి పెడతారు. మొత్తానికి సమస్యలను ఎదుర్కొనే సరైన విధానం ఉంటే ఏ రంగంలోనైనా సులభంగా రాణించవచ్చు.

Tags: