PAN Card Fraud : మీ పాన్ కార్డ్ వాడి ఎవరో లోన్ తీసుకున్నారా? ఇలా ఈజీగా కనిపెట్టండి

PAN Card Fraud : మీ పాన్ కార్డ్ మీ ఆర్థిక వ్యక్తిత్వానికి ప్రతిరూపం. కానీ ప్రస్తుత డిజిటల్ కాలంలో కేటుగాళ్ల కన్ను మీ పాన్ వివరాలపై పడింది. మీకు తెలియకుండానే మీ పాన్ కార్డ్ ఉపయోగించి వేలల్లో, లక్షల్లో లోన్లు తీసుకుంటున్న ఘటనలు ఈ మధ్య ఎక్కువయ్యాయి. అసలు మీ పేరు మీద ఎవరైనా లోన్ తీసుకున్నారా? మీ క్రెడిట్ స్కోర్‌ను ఎవరో పాడు చేస్తున్నారా? అనే విషయాలు తెలుసుకోవడం చాలా ముఖ్యం. సాధారణంగా బ్యాంకుల నుంచి ఫోన్లు రావడం లేదా లోన్ అప్లికేషన్లు రిజెక్ట్ అవ్వడం వంటివి జరిగే వరకు మనం ఈ విషయాన్ని కనిపెట్టలేం. కానీ కొంచెం జాగ్రత్తగా ఉంటే మీరే స్వయంగా దీనిని చెక్ చేసుకోవచ్చు.

అన్నిటికంటే ముందు మీరు చేయాల్సింది క్రెడిట్ రిపోర్ట్ చెక్ చేసుకోవడం. మీ పాన్ నంబర్‌తో లింక్ అయిన ప్రతి లోన్ అది పర్సనల్ లోన్ కావచ్చు, క్రెడిట్ కార్డ్ కావచ్చు లేదా బై నౌ పే లేటర్ వంటి యాప్ లోన్లు కావచ్చు. అన్నీ మీ క్రెడిట్ హిస్టరీలో కనిపిస్తాయి. సిబిల్, ఈక్విఫాక్స్ వంటి క్రెడిట్ బ్యూరోల నుంచి ఏడాదికి ఒకసారి ఉచితంగా రిపోర్ట్ పొందవచ్చు. రిపోర్ట్ డౌన్‌లోడ్ చేశాక అందులో ఉన్న అకౌంట్స్ లేదా క్రెడిట్ ఫెసిలిటీస్ సెక్షన్‌ను క్షుణ్ణంగా పరిశీలించండి. అక్కడ మీకు తెలియని లోన్ ఏదైనా కనిపిస్తే, వెంటనే ఆ బ్యాంక్ పేరు, లోన్ అమౌంట్ నోట్ చేసుకోండి.

కేవలం లోన్లనే కాదు ఎంక్వైరీ సెక్షన్‌ను కూడా అస్సలు వదలకండి. మీరు లోన్ కోసం ప్రయత్నించకపోయినా, ఏదైనా బ్యాంక్ లేదా ఫైనాన్స్ యాప్ మీ క్రెడిట్ స్కోర్‌ను చెక్ చేసిందంటే, మీ పాన్ వివరాలతో ఎవరో లోన్ కోసం ప్రయత్నిస్తున్నారని అర్థం. అలాగే, కారణం లేకుండా మీ క్రెడిట్ స్కోర్ అకస్మాత్తుగా పడిపోతుంటే అది ఒక ప్రమాద సంకేతం. మీ ఫోన్‌కు వచ్చే బ్యాంకు మెసేజ్‌లు, ఈమెయిల్ అలర్ట్‌లను కూడా ఎప్పటికప్పుడు గమనిస్తూ ఉండండి. కొన్నిసార్లు మనం స్పామ్ అని వదిలేసే మెసేజ్‌ల్లోనే మన పేరు మీద ఎవరో ఈఎంఐ కడుతున్నారనే సమాచారం ఉండవచ్చు.

ఒకవేళ మీ పాన్ కార్డు దుర్వినియోగం అయిందని తెలిస్తే, ఆలస్యం చేయకుండా వెంటనే యాక్షన్ తీసుకోండి. ముందుగా క్రెడిట్ బ్యూరో వెబ్‌సైట్‌లో డిస్ప్యూట్ రైజ్ చేయండి. ఆ తర్వాత సదరు బ్యాంకును సంప్రదించి, మీ కేవైసీ డాక్యుమెంట్లను ఎవరో వాడుకున్నారని ఫిర్యాదు చేయండి. అన్నిటికంటే ముఖ్యంగా సైబర్ క్రైమ్ పోర్టల్ లో ఫిర్యాదు చేసి ఆ నంబర్‌ను భద్రపరుచుకోండి. ఇది భవిష్యత్తులో మీపై ఆర్థిక భారం పడకుండా కాపాడుతుంది. అవసరమైతే మీ క్రెడిట్ రిపోర్ట్‌ను తాత్కాలికంగా ఫ్రీజ్ చేసే వెసులుబాటును కూడా వాడుకోవచ్చు.

పాన్ కార్డు కాపీలను ఎక్కడపడితే అక్కడ అప్‌లోడ్ చేయడం, లోన్ యాప్‌లకు అనవసరమైన పర్మిషన్లు ఇవ్వడం వల్ల ఇలాంటి మోసాలు జరుగుతుంటాయి. మన ఆర్థిక భద్రత మన చేతుల్లోనే ఉంది. అందుకే ఏటా కనీసం ఒక్కసారైనా మీ క్రెడిట్ రిపోర్ట్‌ను చెక్ చేసుకోవడం అలవాటు చేసుకోండి. చిన్నపాటి అజాగ్రత్త పెద్ద ఆర్థిక ఇబ్బందులకు దారితీయవచ్చు, కాబట్టి అప్రమత్తంగా ఉండండి.