NTR–Neel Movie: ఎన్టీఆర్-నీల్ మూవీలో 'యానిమల్' స్టార్

NTR–Neel Movie: ప్రశాంత్ నీల్ దర్శకత్వంలో జూనియర్ ఎన్టీఆర్ హీరోగా తెరకెక్కుతున్న భారీ పాన్-ఇండియా చిత్రం 'డ్రాగన్' . ఈ సినిమా గురించి ఒక క్రేజీ అప్‌డేట్ బయటకు వచ్చింది. ఈ సినిమాలో బాలీవుడ్ సీనియర్ స్టార్ అనిల్ కపూర్ కీలక పాత్ర పోషిస్తున్నట్లు స్వయంగా ఆయనే ధృవీకరించారు. తన ఇన్‌స్టాగ్రామ్ స్టోరీ ద్వారా ఈ విషయాన్ని వెల్లడిస్తూ, ఎన్టీఆర్‌తో కలిసి పనిచేయడం పట్ల సంతోషం వ్యక్తం చేశారు. గతంలో వీరిద్దరూ 'వార్ 2' (War 2) కోసం కలిసి పనిచేయగా, 'డ్రాగన్' వీరిద్దరి కాంబినేషన్‌లో వస్తున్న రెండో సినిమా కానుంది.

కేవలం 'డ్రాగన్' మాత్రమే కాకుండా, భవిష్యత్తులో వీరిద్దరూ కలిసి మరో మూడవ ప్రాజెక్ట్‌లో కూడా నటించబోతున్నట్లు అనిల్ కపూర్ హింట్ ఇచ్చారు. ఇది వైఆర్ఎఫ్ స్పై యూనివర్స్ లో భాగమైన ఒక స్టాండలోన్ చిత్రమై ఉంటుందని ఫిల్మ్ నగర్ వర్గాల్లో బలమైన ప్రచారం జరుగుతోంది. వరుసగా రెండు పెద్ద సినిమాల్లో ఈ ఇద్దరు దిగ్గజ నటులు కలిసి కనిపిస్తుండటంతో అభిమానుల్లో అంచనాలు రెట్టింపయ్యాయి.

ప్రస్తుతం 'డ్రాగన్' షూటింగ్ శరవేగంగా జరుగుతోంది. ఈ సినిమా కోసం ఎన్టీఆర్ సుమారు 18 కిలోల బరువు తగ్గి, సరికొత్త 'లీన్ అండ్ మీన్' లుక్‌లో కనిపించనున్నారు. రుక్మిణి వసంత్ హీరోయిన్‌గా నటిస్తున్న ఈ చిత్రాన్ని మైత్రీ మూవీ మేకర్స్, ఎన్టీఆర్ ఆర్ట్స్ సంయుక్తంగా నిర్మిస్తున్నాయి. ఈ భారీ యాక్షన్ ఎంటర్టైనర్ జూన్ 25, 2026న ప్రపంచవ్యాప్తంగా విడుదలయ్యే అవకాశం ఉంది.