Bigg Boss 20 ఎగ్జిట్ ఇంటర్వ్యూ: "నేను ఎలాంటి వాడ్నో బిగ్ బాస్ ద్వారా తెలిసింది!" – ఆసిఫ్ ఖాన్ ఓపెన్ టాక్!

మనోహరమైన నటనతో పంచాయత్, మీర్జాపూర్, పాతాళ్ లోక్, జామ్‌తారా వంటి సూపర్ హిట్ వెబ్ సిరీస్‌ల ద్వారా ప్రేక్షకుల మనసు గెలుచుకున్న నటుడు ఆసిఫ్ ఖాన్. ఇటీవల 'బిగ్ బాస్ 20' హౌస్ నుండి ఎలిమినేట్ అయిన ఆయన, ప్రముఖ జర్నలిస్ట్ లిపికా వర్మకు ఇచ్చిన ప్రత్యేక ఇంటర్వ్యూలో తన బిగ్ బాస్ ప్రయాణం, సినీ జీవితం, వ్యక్తిగత విషయాలపై ఆసక్తికరమైన ముచ్చట్లు పంచుకున్నారు.

ఆ గంభీరమైన లుక్ వెనుక హాస్యచతురత ఉందబ్బా!

"బయట నన్ను చూసి చాలామంది కోపిష్టి అనుకుంటారు. కానీ బిగ్ బాస్ హౌస్‌లో నన్ను చూసిన వారికి నాలోని హ్యూమర్, పన్స్, వన్-లైనర్స్ నచ్చాయి. రూపాన్ని బట్టి మనుషులను అంచనా వేయలేం. నన్ను నిశితంగా గమనించిన ప్రేక్షకులకు నా నిజమైన వ్యక్తిత్వం ఏంటో అర్థమైంది," అని ఆసిఫ్ చెప్పారు.

థియేటర్ నేపథ్యమే నా ధైర్యం

ఇండస్ట్రీకి ఎలా వచ్చారో వివరిస్తూ.. "మొదటిసారి ముంబై వచ్చినప్పుడు నటనపై నాకు ఎలాంటి అవగాహన లేదు. ఆ తర్వాత జైపూర్‌లోని 'సార్థక్ థియేటర్ గ్రూప్'లో చేరి ఆరేళ్ల పాటు నాటకాల్లో నటించాను. NSD గ్రాడ్యుయేట్లతో కలిసి పనిచేయడం వల్ల నటనలో మెళకువలు నేర్చుకున్నాను. ఆ అనుభవమే నేడు నన్ను ఒక ధైర్యమైన నటుడిగా నిలబెట్టింది," అని గుర్తుచేసుకున్నారు.

అమ్మ చెప్పిన జీవిత పాఠం:

"సొంతంగా మనకు రాసిపెట్టి ఉన్నదాన్ని ఎవరూ లాక్కోలేరు, అలాగే ఇతరుల దాన్ని మనం ఆశించకూడదు అని మా అమ్మ చెప్పేది. దేవుడు మనకు ఏది కేటాయించాడో అది కచ్చితంగా లభిస్తుంది. అందుకే నేను తోటి నటులను చూసి ఎప్పుడూ అసూయపడలేదు. అంతా కాలమే నిర్ణయిస్తుంది."

సింగిల్ మదర్ పెంపకం.. మహిళల పట్ల గౌరవం

ఒంటరి తల్లి వద్ద పెరగడంపై స్పందిస్తూ, "సింగిల్ మదర్ దగ్గర పెరిగే అబ్బాయిలకు భావోద్వేగాలపై ఎక్కువ అవగాహన ఉంటుంది. భావోద్వేగాలకు స్పందించడం బలహీనత కాదు. మన చుట్టూ ఉన్నవారి బాధను అర్థం చేసుకునే శక్తిని ఇస్తుంది. మా అమ్మ, అక్క, వదిన, నా భార్య.. ఇలా ఎప్పుడూ నా చుట్టూ మహిళలు ఉండటం వల్ల నేను మానసికంగా మరింత బలపడ్డాను," అని తెలిపారు.

క్యాన్సర్‌తో పోరాటం.. నమాజ్ ఇచ్చిన ఆత్మస్థైర్యం

తన ఆరోగ్య సమస్యలు మరియు డిప్రెషన్‌ను ఎలా అధిగమించారో వివరిస్తూ ఆసిఫ్ భావోద్వేగానికి గురయ్యారు:

క్యాన్సర్ సర్వైవర్ : "నేను క్యాన్సర్‌ను జయించిన వాడిని. రోజూ సరైన వేళకు నిద్రపోవడం, తినడం మరియు మానసిక ప్రశాంతతను కాపాడుకోవడం చాలా ముఖ్యం."

డిప్రెషన్‌ను జయించడం : "డాక్టర్లు నన్ను 9-10 నెలలు ఇంట్లోనే ఉండమన్నప్పుడు, కెరీర్ ఏమవుతుందో అని భయపడ్డాను. కానీ రోజుకు ఐదు సార్లు చేసే 'నమాజ్' నాకు అపారమైన ధైర్యాన్ని ఇచ్చింది. అల్లాహ్ ఉన్నాడు, ఈ రోజు కాకపోతే రేపైనా మంచి రోజులు వస్తాయని నన్ను నేనే ప్రోత్సహించుకున్నాను."

'ఒకటిన్నర ఏళ్ల పెళ్లి బంధం.. ఐ యామ్ ఎ వన్-వుమన్ మ్యాన్!'

పరిశ్రమలో ఉన్న గ్లామర్ వల్ల సంబంధాలలో అభద్రతాభావం వస్తుందా అని అడిగినప్పుడు:

"అస్సలు లేదు! నా భార్యకు నాపై పూర్తి నమ్మకం ఉంది. నేను ఎక్కడికి వెళ్లినా నా లొకేషన్, ఫోటోలు పంపుతుంటాను. అది భయం వల్ల కాదు, నా బాధ్యతగా భావిస్తాను. చిన్న చిన్న బహుమతులు, కలిసి సమయం గడపడం బంధాన్ని బలపరుస్తాయి. **నేను జీవితాంతం ఒకే ఒక స్త్రీకి కట్టుబడి ఉండే వ్యక్తినే !"

17 ఏళ్ల క్రితం బ్యాక్‌గ్రౌండ్ డ్యాన్సర్.. నేడు సల్మాన్ ఖాన్‌తో ఆఫర్!

బిగ్ బాస్ స్టేజిపై సల్మాన్ ఖాన్‌తో జరిగిన ముచ్చటను పంచుకుంటూ:

"సుమారు 16-17 ఏళ్ల క్రితం సల్మాన్ ఖాన్ నటించిన 'రెడీ' సినిమాలో నేను వెనుక బ్యాక్‌గ్రౌండ్ డ్యాన్సర్‌గా చేశాను. ఆ విషయాన్ని సల్మాన్ భాయ్‌కి చెప్పగా.. 'కచ్చితంగా భవిష్యత్తులో మనం కలిసి ఒక సినిమాలో నటిద్దాం ఇన్షా అల్లాహ్' అని ఆయన హామీ ఇచ్చారు. అది నాకు ఎప్పటికీ గుర్తుండిపోయే ఘట్టం."

బిగ్ బాస్ ఆశావాదులకు ఆసిఫ్ సలహా:

"ఎవరి కోసమో మీ వ్యక్తిత్వాన్ని మార్చుకోకండి. హౌస్‌లోకి మీ అసలు రూపంతో అడుగుపెట్టండి. మీ ఆలోచనలు, మీ అనుభవాలే మిమ్మల్ని ప్రత్యేకంగా నిలబెడతాయి!"