Chiranjeevi’s ‘Vishwambhara’: రాజమౌళి ‘వారణాసి’ కంటే ముందే చిరు ‘విశ్వంభర’?

Chiranjeevi’s ‘Vishwambhara’: మెగాస్టార్ చిరంజీవి నటిస్తున్న ‘విశ్వంభర’ సినిమా విడుదలపై ఆసక్తికరమైన వార్తలు వినిపిస్తున్నాయి. వశిష్ఠ దర్శకత్వంలో తెరకెక్కుతున్న ఈ సోషియో ఫాంటసీ చిత్రం 2027 మార్చిలో ప్రేక్షకుల ముందుకు వచ్చే అవకాశముందని సినీ వర్గాల్లో ప్రచారం జరుగుతోంది. మార్చి 18న విడుదల చేయాలని మేకర్స్‌ పరిశీలిస్తున్నట్లు సమాచారం.

మరోవైపు చిరంజీవి నటిస్తున్న ‘కాకా’ సినిమా సంక్రాంతి విడుదలకు సిద్ధమవుతోంది. బాబీ దర్శకత్వంలో తెరకెక్కుతున్న ఈ సినిమా షూటింగ్‌ దాదాపు 70 శాతం పూర్తయినట్లు తెలుస్తోంది. డిసెంబర్‌ నాటికి చిత్రీకరణ పూర్తి చేసి, 2027 జనవరి 13న విడుదల చేయాలని చిత్రబృందం లక్ష్యంగా పెట్టుకున్నట్లు సమాచారం.

గత నెలలో ‘విశ్వంభర’ సినిమాను ‘కాకా’ కంటే ముందుగా విడుదల చేస్తారంటూ ప్రచారం జరిగింది. అయితే తాజా సమాచారం ప్రకారం, ‘విశ్వంభర’ను మార్చిలో విడుదల చేయడంపై మేకర్స్‌ దృష్టి పెట్టినట్లు తెలుస్తోంది.

ఇక ఎస్‌.ఎస్‌. రాజమౌళి దర్శకత్వంలో తెరకెక్కుతున్న ‘వారణాసి’ సినిమా 2027 ఏప్రిల్‌ 7న విడుదల కానుంది. ఈ నేపథ్యంలో ‘విశ్వంభర’ను మార్చిలో విడుదల చేస్తే, రెండు భారీ చిత్రాల మధ్య కొంత సమయం దొరుకుతుందని చిత్రబృందం భావిస్తున్నట్లు సమాచారం.

‘విశ్వంభర’లో చిరంజీవి సరసన త్రిష, ఆషికా రంగనాథ్‌ నటిస్తున్నారు. ఎం.ఎం. కీరవాణి సంగీతం అందిస్తున్నారు. అయితే సినిమా విడుదల తేదీపై చిత్రబృందం నుంచి ఇంకా అధికారిక ప్రకటన వెలువడలేదు. దీంతో ‘విశ్వంభర’ మార్చిలో వస్తుందా? అన్నది ఆసక్తికరంగా మారింది.