Anupama Parameswaran: నన్ను నేను అద్దంలో చూసుకోలేకపోయా.. గతం తాలూకు చేదు జ్ఞాపకాలపై అనుపమ పరమేశ్వరన్ భావోద్వేగం..

Anupama Parameswaran: ప్రముఖ కథానాయిక అనుపమ పరమేశ్వరన్ తన గత వ్యక్తిగత జీవితానికి సంబంధించి చేసిన వ్యాఖ్యలు ప్రస్తుతం సినీ వర్గాల్లో తీవ్ర చర్చనీయాంశంగా మారాయి. గతంలో ఓ వ్యక్తితో రెండేళ్ల పాటు కొనసాగిన బంధంలో తాను తీవ్రమైన మానసిక క్షోభను అనుభవించానని ఆమె వెల్లడించారు. ఆ విషపూరిత బంధం వల్ల తన కెరీర్‌తో పాటు ఆరోగ్యం కూడా తీవ్రంగా ప్రభావితమైందని పేర్కొన్నారు. తన తాజా చిత్రం ప్రమోషన్ల సందర్భంగా ఇచ్చిన ఇంటర్వ్యూలో ఆమె ఈ అంశాలను పంచుకున్నారు.

ప్రతిరోజూ బతకడమే ఒక యుద్ధంలా అనిపించేది

ఆ రెండేళ్ల కాలాన్ని గుర్తుచేసుకుంటూ అనుపమ తీవ్ర ఆవేదన వ్యక్తం చేశారు. "ఒకానొక దశలో అద్దంలో చూసుకున్నా నా ముఖం నాకు స్పష్టంగా కనిపించేది కాదు. అసలు నన్ను నేనే గుర్తించలేనంతగా మారిపోయాను. జీవితం అంటే కేవలం రోజును ఎలాగోలా గడపడమే అన్నట్లుగా సాగింది. రేపు ఎలాంటి గండం ఎదురవుతుందోనన్న భయంతోనే గడిపాను" అంటూ ఆమె తెలిపారు. సంబంధంలో భాగస్వామి మొదట ఎంతో ప్రేమగా ఉండి, ఆ తర్వాత అకారణంగా కఠినంగా ప్రవర్తించడం, మళ్లీ క్షమాపణలు చెప్పడం వంటి మానసిక ఒత్తిళ్లకు గురిచేశారని పేర్కొన్నారు.

కెరీర్, ఆరోగ్యంపై తీవ్ర ప్రభావం

ఈ మానసిక వేధింపులు అనుపమ శారీరక ఆరోగ్యంపై తీవ్ర ప్రభావం చూపాయి. తీవ్రమైన ఆందోళన, విపరీతంగా బరువు తగ్గడం, కంటి సంబంధిత సమస్యలు వంటి ఇబ్బందులను ఎదుర్కొన్నట్లు చెప్పారు. ఒక దశలో నటననే పూర్తిగా వదిలేయాలని భావించినప్పటికీ, ఎంతో మనోవేదన అనుభవిస్తూనే షూటింగ్‌లలో పాల్గొన్నానని గుర్తుచేసుకున్నారు. ఆ తీవ్రమైన మానసిక గందరగోళం వల్ల ఆ రెండేళ్ల కాలంలో చేసిన చిత్రాల్లో తన నటనకు 100% న్యాయం చేయలేకపోయానని, ఇంకా మెరుగ్గా నటించాల్సింది అన్న భావన ఇప్పటికీ ఉందని ఆవేదన చెందారు.

ఆ చేదు అనుభవాలను ఎదుర్కొని, ఆ సంబంధం నుంచి బయటకు వచ్చినట్లు తెలిపిన అనుపమ.. సదరు వ్యక్తి వివరాలను మాత్రం గోప్యంగా ఉంచారు. ప్రస్తుతం ఆ గాయాల నుంచి క్రమంగా కోలుకుంటూ, పూర్తి దృష్టిని సినిమాలపైనే పెట్టినట్లు స్పష్టం చేశారు.