Roja: వెంకటేశ్‌తో దూరం వెనుక అసలు నిజం అదే.. రాజా సినిమాలో అందుకే ఛాన్స్ మిస్సైంది.. రోజా ఓపెన్ కామెంట్స్!

Roja: 90వ దశకంలో టాలీవుడ్ వెండితెరపై విక్టరీ వెంకటేశ్, రోజా జోడీకి ప్రత్యేకమైన క్రేజ్ ఉండేది. వీరి కాంబినేషన్‌లో వచ్చిన పలు చిత్రాలు బాక్సాఫీస్ వద్ద ఘన విజయాలు సాధించాయి. అయితే, సూపర్ హిట్ ట్రాక్ రికార్డు ఉన్నప్పటికీ వీరిద్దరి కాంబినేషన్‌లో సినిమాలు ఎందుకు ఆగిపోయాయనే దానిపై అప్పట్లో ఎన్నో ఊహాగానాలు వినిపించాయి. తాజాగా ఓ ఇంటర్వ్యూలో పాల్గొన్న ఒకప్పటి స్టార్ హీరోయిన్, మాజీ మంత్రి రోజా.. వెంకటేశ్‌తో ఏర్పడిన కమ్యూనికేషన్ గ్యాప్, ప్రొఫెషనల్ దూరం వెనుక ఉన్న అసలు కారణాలను తొలిసారిగా బయటపెట్టారు. ఒక చిన్న అపార్థం, మధ్యవర్తుల తప్పుడు సమాచారం వల్లే తాము కలిసి నటించలేకపోయామని ఆమె స్పష్టం చేశారు.

పోకిరి రాజా సెట్స్‌లో అసలేం జరిగింది?

ఈ మొత్తం వివాదానికి పోకిరి రాజా సినిమా సమయంలో జరిగిన ఓ సంఘటనే మూలకారణమని రోజా వివరించారు. తమపై చిత్రీకరించిన ఒక పాట నెగెటివ్ ఫిల్మ్ ల్యాబ్‌లో పాడైపోవడంతో, దాన్ని రీషూట్ చేయాలని యూనిట్ కోరింది. ఆ సమయంలో భర్త సెల్వమణి పుట్టినరోజు ఉన్నప్పటికీ, చిత్ర బృందం కోసం రోజా ప్రత్యేకంగా కాల్షీట్లు సర్దుబాటు చేశారు. అయితే షూటింగ్ స్పాట్‌కు చేరుకున్న తర్వాత వరుసగా రెండు రోజుల పాటు తనపై ఎలాంటి చిత్రీకరణ చేయకుండా కేవలం ఖాళీగా కూర్చోబెట్టారని రోజా ఆవేదన వ్యక్తం చేశారు. ఇది తీవ్రమైన అవమానంగా అనిపించడంతో మనస్తాపం చెంది, కోపంతో సెట్స్ నుంచి బ్యాగ్ సర్దుకుని వెళ్లిపోయినట్లు తెలిపారు.

మధ్యవర్తుల రాజకీయం.. రాజా సినిమా చేజారిన వైనం

చిత్ర యూనిట్ సభ్యులు తమ తప్పిదాన్ని కప్పిపుచ్చుకోవడానికి వెంకటేశ్‌కు తనపై తప్పుడు సమాచారం చేరవేసి ఉండవచ్చని రోజా అభిప్రాయపడ్డారు. దీనికితోడు దర్శకుడు సెల్వా చిత్రానికి డేట్స్ కేటాయించే విషయంలో తలెత్తిన సమస్యల వల్ల వీరి మధ్య మరింత గ్యాప్ పెరిగింది. ఈ అపార్థాల పర్యవసానమే తమిళ బ్లాక్‌బస్టర్ ఉన్నిడతిల్ ఎన్నై కొడుత్తేన్ తెలుగు రీమేక్ అయిన రాజా చిత్రంలో తనకు దక్కాల్సిన పాత్ర మిస్సవడానికి కారణమైందని రోజా వెల్లడించారు. ఆ పాత్రలో చివరకు సౌందర్య నటించి అద్భుతమైన విజయాన్ని అందుకున్నారు. అయితే ఈ విషయంపై వెంకటేశ్‌తో ఎప్పుడూ నేరుగా వివరణ ఇవ్వడానికి ప్రయత్నించలేదని, నిజం ఎప్పటికైనా బయటపడుతుందనే ఉద్దేశంతో మౌనంగా ఉండిపోయానని ఆమె చెప్పారు.

మంత్రి అయ్యాక ఫ్లైట్‌లో కలిసినప్పుడు.. వెంకీ సంస్కారం..

వృత్తిపరంగా ఎన్ని అపోహలు ఉన్నా, వెంకటేశ్‌కు తనపై వ్యక్తిగతంగా ఎలాంటి కోపం లేదని రోజా స్పష్టం చేశారు. తమ మధ్య ప్రొఫెషనల్ గ్యాప్ ఉన్నప్పటికీ, సురేశ్ ప్రొడక్షన్స్ బ్యానర్‌తో తనకున్న అనుబంధాన్ని ఆమె గుర్తుచేసుకున్నారు. తాను రాష్ట్ర మంత్రిగా బాధ్యతలు చేపట్టిన తర్వాత ఓసారి విమానంలో వెంకటేశ్ ఎదురుపడ్డారని, ఆ సమయంలో ఆయన ఎంతో ఆప్యాయంగా పలకరించి యు డిజర్వ్ ఇట్ అంటూ తన ఎదుగుదలను, శ్రమను మనస్ఫూర్తిగా ప్రశంసించారని రోజా తెలిపారు. వృత్తిపరంగా దూరమైనా, వెంకటేశ్ ఎంతో మర్యాదస్తుడని, ఉన్నతమైన సంస్కారం ఉన్న గొప్ప వ్యక్తి అని రోజా కొనియాడారు.