Leaving in the Middle of a Homa or Puja: హోమం, పూజ మధ్యలో లేచి వెళ్తున్నారా? అయితే ఏం జరుగుతుందో తెలుసా...

Leaving in the Middle of a Homa or Puja: మన ఇంట్లో ఏదైనా కష్టం వచ్చినా లేదా శుభకార్యం జరిగినా దైవ అనుగ్రహం కోసం హోమాలు, పూజలు నిర్వహిస్తుంటాం. అయితే చాలామంది పూజ మధ్యలో ఫోన్ కాల్స్ వచ్చాయనో, లేదా తెలిసిన వారు వచ్చారనో హోమ గుండం ముందు నుండి లేచి వెళ్తుంటారు. ఇలా చేయడం వల్ల ఆ పూజ ఫలితం దక్కకపోగా, మరిన్ని సమస్యలు కొనితెచ్చుకున్నట్లేనని జ్యోతిష్కులు హెచ్చరిస్తున్నారు.

పూజా స్థలాన్ని విడిచిపెట్టకూడదు

గణపతి హోమం, సత్యనారాయణ వ్రతం, మృత్యుంజయ హోమం లేదా నవగ్రహ శాంతి వంటి ఏ కార్యక్రమం చేపట్టినా.. సంకల్పం తీసుకున్న వ్యక్తి పూజ పూర్తయ్యే వరకు ఆ స్థలాన్ని విడిచిపెట్టకూడదు. పురోహితుడు ఏదైనా కారణం వల్ల రెండు నిమిషాల విరామం ఇచ్చినా కూడా హోమం చేసే వ్యక్తి ఇంటి గడప దాటి బయటకు వెళ్లకూడదు. ఇలా చేయడం వల్ల పూజ పవిత్రత దెబ్బతింటుంది. భక్తితో పాటు క్రమశిక్షణ, దృఢ సంకల్పం ఉన్నప్పుడే ఆ వ్రతం పరిపూర్ణమవుతుంది.

సీతాదేవి కథే ఒక ఉదాహరణ

పూజా నియమాలను అతిక్రమిస్తే కలిగే నష్టానికి రామాయణంలోని ఒక ఉదంతాన్ని పండితులు ఉదాహరణగా చెప్పారు. వాల్మీకి ఆశ్రమంలో సీతాదేవి ఒక వ్రతం చేస్తున్న సమయంలో, మధ్యలో లేచి కొంత దూరం వెళ్లడం వల్ల ఆమె అనేక కష్టాలను అనుభవించాల్సి వచ్చిందని పురాణాల ద్వారా తెలుస్తోంది. అంటే, దైవకార్యం మధ్యలో ఏకాగ్రత చెదరడం ఎంతటి విపత్తుకు దారితీస్తుందో దీని ద్వారా అర్థం చేసుకోవచ్చు.

రాజకీయ నాయకులు, ధనవంతులు చేసే పొరపాట్లు

గృహప్రవేశాలు లేదా పెద్ద వేడుకల్లో రాజకీయ నాయకులు, ప్రముఖులు పూజలో కూర్చున్నప్పుడు.. అతిథులు రాగానే మధ్యలో లేచి పలకరించడం, ఫోన్లలో మాట్లాడటం వంటివి చేస్తుంటారు.

వృధా ప్రయాస: ఇలా మధ్యలో లేవడం వల్ల అంతవరకు చేసిన పూజ మొత్తం వృధా అవుతుంది. ఫలితాలు ఆశించిన విధంగా రావు.

ప్రత్యామ్నాయం: ఒకవేళ అనివార్య కారణాల వల్ల వెళ్లాల్సి వస్తే, మొదటి నుండి పూజలో పాల్గొంటున్న కుటుంబ సభ్యులతో ఆ ప్రక్రియను పూర్తి చేయించాలి. అంతే తప్ప, మధ్యలో కొత్త వ్యక్తులను పూజలో కూర్చోబెట్టకూడదు.

"ఆచార్యుడు స్వర్గం.. అనాచార్యుడు నరకం" అనే నానుడిని మనం గుర్తుంచుకోవాలి. శాస్త్రం చెప్పిన పద్ధతులను పాటించి చేసే పూజలే మనకు రక్షణగా నిలుస్తాయి. కాబట్టి, భక్తితో పాటు ఆచారాలను కూడా తూచా తప్పకుండా పాటించాలని గురూజీ సూచిస్తున్నారు.