Sri Krishna Janmashtami: శ్రీకృష్ణ జన్మాష్టమి: విశిష్టత, పూజా విధానం, జపించాల్సిన శక్తివంతమైన మంత్రాలు

Sri Krishna Janmashtami: హిందూ సంప్రదాయంలో అత్యంత వైభవంగా జరుపుకునే పండుగలలో శ్రీకృష్ణ జన్మాష్టమి ఒకటి. అధర్మాన్ని నశింపజేసి, లోకంలో ధర్మాన్ని పునఃస్థాపించడానికి శ్రీమహావిష్ణువు అవతరించిన పవిత్ర దినమిది. శ్రావణ మాసం కృష్ణపక్ష అష్టమి తిథి, రోహిణి నక్షత్రం కలయికలో శ్రీకృష్ణ పరమాత్ముడు జన్మించాడు. ఈ ఏడాది శ్రీకృష్ణ జన్మాష్టమి పర్వదినం సెప్టెంబర్ 4, శుక్రవారం నాడు వచ్చింది. భక్తులు ఈ పవిత్ర దినాన ఉపవాస దీక్షలు ఆచరించి, బాలగోపాలుడిని భక్తిశ్రద్ధలతో ఆరాధిస్తారు.

పూజా విధానం - నియమాలు

శుభ్రత: పండుగ రోజున వేకువజామునే నిద్రలేచి ఇల్లు, పూజా మందిరాన్ని శుద్ధి చేసుకోవాలి.

ఉపవాసం - వస్త్రధారణ: తలస్నానం ఆచరించి, శుభ్రమైన సాంప్రదాయ దుస్తులు ధరించి రోజంతా భక్తితో ఉపవాస దీక్షను పాటించాలి.

ఆలయ దర్శనం: ఈ రోజున సమీపంలోని శ్రీకృష్ణుని ఆలయాలను దర్శించుకోవడం విశేష ఫలితాలను ఇస్తుంది.

జన్మాష్టమి నాడు జపించాల్సిన ముఖ్యమైన మంత్రాలు

ఈ పవిత్ర దినాన కృష్ణుడి అనుగ్రహం పొందడానికి క్రింది మంత్రాలను భక్తితో జపించాలి.

మూల మంత్రం

“ఓం నమో భగవతే వాసుదేవాయ”

మహా మంత్రం:

“హరే కృష్ణ హరే కృష్ణ కృష్ణ కృష్ణ హరే హరే..

హరే రామ హరే రామ రామ రామ హరే హరే…”

కృష్ణ గాయత్రీ మంత్రం:

“ఓం దేవకీనందనాయ విద్మహే వాసుదేవాయ ధీమహి తన్నో కృష్ణః ప్రచోదయాత్”

సంతాన ప్రాప్తి కొరకు:

సంతానం కోసం ఎదురుచూసే దంపతులు ఈ రోజున

“ఓం క్లీం కృష్ణాయ గోవిందాయ గోపీజనవల్లభాయ స్వాహా” అనే మంత్రాన్ని జపించడం వల్ల శుభ ఫలితాలు లభిస్తాయని విశ్వసిస్తారు.

శ్రీకృష్ణుని లీలలను స్మరిస్తూ, నిష్కల్మషమైన భక్తితో ఆరాధిస్తే సకల శుభాలు, మనశ్శాంతి కలుగుతాయి.