Suffering from Kaal Sarp Dosha: కాలసర్ప దోషంతో ఇబ్బంది పడుతున్నారా? ఈ సులభమైన పరిహారాలతో విముక్తి పొందండి..

Suffering from Kaal Sarp Dosha: హిందూ సంప్రదాయంలో శ్రావణ మాసంలో వచ్చే పండుగలకు అత్యంత పవిత్రమైన విశిష్టత ఉంది. అందులోనూ శ్రావణ శుక్ల పక్ష పంచమి తిథి నాడు జరుపుకునే నాగ పంచమి పర్వదినం సర్పదేవతల ఆరాధనకు ఎంతో ప్రసిద్ధి. వేద క్యాలెండర్ ప్రకారం ఈ ఏడాది నాగ పంచమిని ఆగస్టు 17న జరుపుకోనున్నారు. జాతకంలో తీవ్రమైన మానసిక అశాంతికి, ఆర్థిక అడ్డంకులకు కారణమయ్యే కాలసర్ప దోషం ఉన్నవారికి ఈ రోజు చేసే పూజలు, పరిహారాలు అద్భుతమైన ఉపశమనాన్ని ఇస్తాయని జ్యోతిష్య పండితులు చెబుతున్నారు. నాగ పంచమి రోజున ఆచరించాల్సిన శక్తివంతమైన పరిహారాలు ఏమిటో ఇప్పుడు వివరంగా తెలుసుకుందాం.

కాలసర్ప దోషం అంటే ఏమిటి? దాని ప్రభావం ఎలా ఉంటుంది?

జ్యోతిష్య శాస్త్రం ప్రకారం.. జాతక చక్రంలోని ఏడు ప్రధాన గ్రహాలు రాహువు, కేతువుల మధ్యలోకి వచ్చినప్పుడు కాలసర్ప దోషం ఏర్పడుతుంది. ప్రముఖ జ్యోతిష నిపుణులు తెలిపిన వివరాల ప్రకారం.. ఈ దోషం ఉన్న వ్యక్తులు జీవితంలో అనుకోని అడ్డంకులు, తీవ్రమైన మానసిక ఒత్తిడి, కెరీర్‌లో ఆటంకాలు మరియు ఆర్థిక హెచ్చుతగ్గులను ఎదుర్కొంటారు. అయితే, రాహు-కేతువుల దుష్ప్రభావాలను శాంతింపజేయడానికి నాగ పంచమిని మించిన ఉత్తమమైన సందర్భం మరొకటి లేదు.

కాలసర్ప దోష నివారణకు 5 అద్భుత పరిహారాలు

వెండి నాగుపాముల పరిహారం:

నాగ పంచమి రోజున వెండి లేదా రాగితో తయారు చేసిన ఒక జత చిన్న నాగుపాముల ప్రతిమలను పూజలో ఉంచాలి. వాటికి పచ్చి పాలు, పవిత్ర గంగాజలంతో అభిషేకం చేసి.. మీ కోరికలు నెరవేరాలని, దోషాలు తొలగిపోవాలని ప్రార్థిస్తూ ప్రవహించే నది లేదా కాలువలో నిమజ్జనం చేయాలి. ఇది రాహు-కేతువుల వల్ల కలిగే పీడలను తగ్గిస్తుంది.

శివలింగానికి విశేష జలాభిషేకం:

సర్పాలు పరమశివుడికి అత్యంత ప్రీతిపాత్రమైన ఆభరణాలు. నాగ పంచమి నాడు రాగి పాత్రలో శుద్ధ జలం, కొద్దిగా పచ్చి పాలు, నల్ల నువ్వులు, గంగాజలం కలపాలి. ఈ మిశ్రమంతో శివలింగానికి అభిషేకం చేస్తూ.. ‘ఓం నమః శివాయ’ లేదా ‘మహా మృత్యుంజయ మంత్రం’ జపించాలి. ఇది కాలసర్ప దోష తీవ్రతను వేగంగా తగ్గిస్తుంది.

అష్టముఖి రుద్రాక్ష ధారణ:

దీర్ఘకాలిక అనారోగ్య సమస్యలు, మానసిక ఆందోళనలతో బాధపడేవారు ఈ పవిత్రమైన రోజున 8 ముఖాల రుద్రాక్షను (అష్టముఖి) ధరించడం వల్ల విశేషమైన రక్షణ లభిస్తుంది.

నెమలి ఈకతో నెగెటివ్ ఎనర్జీకి చెక్:

ఇంటి ప్రధాన ద్వారం వద్ద, పూజా గదిలో నెమలి ఈకలను ఉంచడం మంచిది. నెమలి సర్పాలకు సహజ శత్రువు కావడంతో, ఇది రాహువు యొక్క ప్రతికూల కిరణాలను నిరోధించి, ఇంట్లోని నెగెటివ్ ఎనర్జీని దూరం చేస్తుంది.

నవనాగ స్తోత్ర పఠనం & దానధర్మాలు:

నాగ పంచమి పూజలో భాగంగా శ్రీ నవనాగ స్తోత్రాన్ని 11 సార్లు

భక్తిశ్రద్ధలతో పఠించాలి. పూజ ముగిసిన అనంతరం మీ స్తోమత మేరకు నల్ల నువ్వులు, నీలం రంగు వస్త్రాలు, కరివేపాకు, దక్షిణను నిరుపేదలకు దానం చేయాలి. దీనివల్ల నిలిచిపోయిన పనులు త్వరగా పూర్తయి, సర్వకార్యాలలో విజయం, సుఖసంతోషాలు చేకూరుతాయి.