Vastu Wonder: వాస్తు అద్భుతం: రాళ్లను పేర్చి నిర్మించిన 115 అడుగుల శివాలయం.. దీని వెనుక ఉన్న రహస్యం ఏంటి?

Vastu Wonder: మధ్యప్రదేశ్‌లోని మోరేనా జిల్లాలో ఉన్న ఈ కాకన్‌మఠ్ ఆలయం చూస్తే ఎవరికైనా కళ్ళు చెదరాల్సిందే. ఆధునిక యంత్రాలు, సాంకేతికత లేని ఆ కాలంలో 115 అడుగుల ఎత్తైన ఈ గంభీరమైన కట్టడాన్ని ఎలా నిర్మించారో ఇప్పటికీ ఒక మిస్టరీగానే ఉంది.

నిర్మాణ కౌశలం: ఇంటర్‌లాకింగ్ మ్యాజిక్

ఈ ఆలయం యొక్క అత్యంత ఆశ్చర్యకరమైన విషయం ఏమిటంటే, దీని నిర్మాణంలో ఎక్కడా సిమెంట్, ప్లాస్టర్ లేదా సున్నం ఉపయోగించలేదు. భారీ రాళ్లను ఒకదానిపై ఒకటి సమతుల్యంగా అమర్చడం ద్వారా ఈ ఆలయాన్ని నిర్మించారు. చుట్టూ ఉన్న ఎన్నో చిన్న ఆలయాలు ప్రకృతి వైపరీత్యాలకు కూలిపోయినా, ప్రధాన ఆలయం మాత్రం శతాబ్దాలుగా చెక్కుచెదరకుండా నిలబడి ఉండటం ఇంజనీర్లకే సవాలుగా మారింది.

చారిత్రక నేపధ్యం

చరిత్రకారుల కథనం ప్రకారం, ఈ ఆలయాన్ని 11వ శతాబ్దంలో కచ్ఛవహ వంశానికి చెందిన కీర్తిరాజ్ రాజు నిర్మించారు. తన భార్య కాకనావతి పరమ శివభక్తురాలు కావడంతో ఆమె కోరిక మేరకు ఈ అద్భుత కట్టడాన్ని నిర్మించారు. అందుకే ఆమె పేరు మీద దీనికి 'కాకన్‌మఠ్' అనే పేరు స్థిరపడింది.

రాక్షసులు నిర్మించారా? - స్థానిక గాథలు

ఈ ఆలయం చుట్టూ అనేక ఉత్కంఠభరితమైన జానపద కథలు ప్రచారంలో ఉన్నాయి. శివుని ఆజ్ఞ మేరకు రాక్షసులు ఈ ఆలయాన్ని ఒక్క రాత్రిలోనే నిర్మించారని స్థానికులు నమ్ముతారు. తెల్లవారుజామున ఎవరో పిండి దంచుతున్న శబ్దం విని, ఉదయం అయిపోయిందని భ్రమపడి రాక్షసులు పనిని సగంలోనే ఆపేసి వెళ్ళిపోయారట. అందుకే ఆలయ శిఖరం అసంపూర్తిగా కనిపిస్తుందని చెబుతారు.

కాలక్రమేణా కొన్ని భాగాలు దెబ్బతిన్నప్పటికీ, ఆలయం తన వైభవాన్ని కోల్పోలేదు. ఇక్కడి అరుదైన శిల్పాలు, విగ్రహాలు శిల్పుల అద్భుత నైపుణ్యానికి అద్దం పడతాయి. ప్రస్తుతం ఇది పురావస్తు శాఖ పరిధిలో ఉంది. కేవలం భక్తులే కాకుండా ప్రపంచవ్యాప్తంగా ఉన్న చరిత్ర ప్రేమికులు, పర్యాటకులు ఈ వింత ఆలయాన్ని చూసేందుకు తరలివస్తుంటారు.