Thyroid Levels: థైరాయిడ్ లెవల్స్ నార్మల్‌గా ఉన్నాయని మందులు వాడటం మానేయొచ్చా?

Thyroid Levels: శరీర జీవక్రియలను నియంత్రించే థైరాయిడ్ హార్మోన్ల స్థాయిలు పరీక్షల్లో సాధారణంగా (నార్మల్) ఉన్నంత మాత్రాన చికిత్సను ఆపేయరాదని వైద్య నిపుణులు స్పష్టం చేస్తున్నారు. థైరాయిడ్ సమస్యను దీర్ఘకాలిక సమస్యగా పరిగణించాలి. వైద్యుల సూచన లేకుండా మందులు ఆపడం వల్ల తీవ్రమైన ఆరోగ్య సమస్యలు తలెత్తే ప్రమాదం ఉందని వారు హెచ్చరిస్తున్నారు.

మందులు మానేస్తే ఏం జరుగుతుంది?

హార్మోన్ల అసమతుల్యత: ముఖ్యంగా హైపోథైరాయిడిజం (థైరాయిడ్ హార్మోన్లు తక్కువగా ఉండటం) ఉన్నవారు మందులు ఆపేస్తే, శరీరంలో థైరాయిడ్ హార్మోన్ల స్థాయిలు వేగంగా తగ్గిపోతాయి.

లక్షణాలు తిరగబెట్టడం: జీవక్రియ మందగించడం, విపరీతమైన అలసట, బరువు పెరగడం, చలిని తట్టుకోలేకపోవడం, జుట్టు రాలడం, డిప్రెషన్ మరియు ఋతుక్రమం (పీరియడ్స్) సమస్యలు వంటి లక్షణాలు నాలుగు వారాల్లోపే తిరిగి కనిపించవచ్చు.

గుండెపై ప్రభావం: థైరాయిడ్ హార్మోన్లు గుండె వేగాన్ని, రక్తపోటును నియంత్రిస్తాయి. మందులు ఆపడం వల్ల రక్తపోటులో మార్పులు లేదా గుండె సమస్యలు తలెత్తే అవకాశం ఉంది.

వైద్యుల సలహా తప్పనిసరి:

థైరాయిడ్ చికిత్స తీసుకుంటున్న చాలా మందిలో, మందుల కారణంగానే థైరాయిడ్ స్థాయిలు అదుపులో ఉంటాయి. కాబట్టి, పరీక్షా ఫలితాలు 'నార్మల్'గా వచ్చాయంటే, మీ మందులు సరిగ్గా పనిచేస్తున్నాయని అర్థం. వైద్య నిపుణులు చెబుతున్న వివరాల ప్రకారం మందుల డోసును తగ్గించాలన్నా లేదా పూర్తిగా ఆపేయాలన్నా అది కేవలం ఎండోక్రైనాలజిస్ట్ (Endocrinologist) లేదా జనరల్ ఫిజీషియన్ సలహా మేరకు మాత్రమే చేయాలి.హైపోథైరాయిడిజం తరచుగా దీర్ఘకాలిక సమస్యగా ఉంటుంది. చాలా సందర్భాలలో, జీవితాంతం మందులు వాడాల్సి వస్తుంది.కొంతమందిలో వైద్యులు మొదట అధిక డోసు ఇచ్చి, ఆ తర్వాత తగ్గించవచ్చు లేదా కొన్ని అరుదైన సందర్భాల్లో (తాత్కాలిక థైరాయిడ్ సమస్యలున్నప్పుడు) మందులు ఆపేయమని సలహా ఇవ్వవచ్చు. అలాంటి నిర్ణయాన్ని కూడా వైద్య పరీక్షల ఆధారంగానే తీసుకోవాలి. థైరాయిడ్ సమస్యతో బాధపడుతున్న వారు తమకు తామే మందులు ఆపడం లేదా డోసు మార్చడం వంటివి చేయకూడదు. ఈ విషయంలో ఏదైనా సందేహం ఉంటే వెంటనే వైద్యులను సంప్రదించాలని ఆరోగ్య శాఖ సూచించింది.