Thyroid Patients Alert: థైరాయిడ్ రోగులు జాగ్రత్త: చలికాలంలో వీటి జోలికి అస్సలు పోవద్దు..

Thyroid Patients Alert: చలికాలం చలి పెరిగే కొద్దీ థైరాయిడ్ రోగులకు ఇబ్బందులు కూడా పెరుగుతుంటాయి. ఈ వాతావరణంలో శరీరంలో మెటబాలిజం నెమ్మదించడం వల్ల నీరసం, అలసట, వేగంగా బరువు పెరగడం వంటి సమస్యలు ఎదురవుతాయి. థైరాయిడ్ సమస్య ఉన్నవారు చలికాలంలో తమ జీవనశైలి, ఆహారపు అలవాట్లలో కొన్ని మార్పులు చేసుకోవడం ద్వారా ఆరోగ్యాన్ని కాపాడుకోవచ్చు. చలికాలంలో లభించే కొన్ని ఆహారాలు థైరాయిడ్ హార్మోన్ల సమతుల్యతను దెబ్బతీస్తాయి. వైద్య నిపుణుల సూచనల ప్రకారం థైరాయిడ్ రోగులు పాటించాల్సిన ముఖ్యమైన చిట్కాల గురించి తెలుసుకుందాం..

వీటి జోలికి పోవద్దు

వేయించిన పదార్థాలు:

బయట దొరికే జంక్ ఫుడ్, నూనెలో వేయించిన కారంగా ఉండే పదార్థాలకు దూరంగా ఉండాలి. ఇవి బరువును పెంచడమే కాకుండా మందుల ప్రభావాన్ని తగ్గిస్తాయి.

సోయా ఉత్పత్తులు: సోయా, సోయా ఆధారిత పదార్థాలు అతిగా తీసుకోవడం థైరాయిడ్ రోగులకు మంచిది కాదు.

పచ్చి కూరగాయలు: క్యాబేజీ, కాలీఫ్లవర్, బ్రోకలీ వంటి వాటిని పచ్చిగా తినకూడదు. వీటిని బాగా ఉడికించిన తర్వాతే తీసుకోవాలి.

చక్కెర - పిండి పదార్థాలు: బేకరీ ఉత్పత్తులు, తీపి పదార్థాలు, మైదాతో చేసిన వస్తువులను పరిమితం చేయాలి.

కెఫీన్: చలికాలంలో ఎక్కువగా టీ లేదా కాఫీ తాగడం అలవాటు ఉంటుంది. కానీ థైరాయిడ్ ఉన్నవారు వీటిని అతిగా తీసుకోవడం వల్ల సమస్య తీవ్రం కావచ్చు.

ఇవి మీ ఆహారంలో చేర్చుకోండి

శరీరాన్ని వెచ్చగా ఉంచడంతో పాటు, పోషకాలను అందించే ఆహారం తీసుకోవాలి:

పాల ఉత్పత్తులు: వెచ్చని పాలు, పెరుగు, పనీర్ వంటివి శరీరానికి అవసరమైన శక్తిని ఇస్తాయి.

నట్స్ - గింజలు: బాదం, వాల్‌నట్స్, అవిసె గింజలు శరీరంలో వేడిని పెంచి, జలుబు నుండి రక్షిస్తాయి.

ప్రోటీన్: తగినంత ప్రోటీన్ తీసుకోవడం వల్ల చలికాలంలో వచ్చే నీరసం తగ్గుతుంది.

తాజా పండ్లు: సీజనల్ ఫ్రూట్స్, ఆకుకూరలు శరీరానికి అవసరమైన ఫైబర్, విటమిన్లను అందిస్తాయి.

ఆరోగ్యంగా ఉండటానికి మరికొన్ని చిట్కాలు:

మందులు: డాక్టర్ సూచించిన థైరాయిడ్ టాబ్లెట్లను ప్రతిరోజూ నిర్ణీత సమయంలోనే వేసుకోవాలి.

శరీర ఉష్ణోగ్రత: శరీరం చల్లబడకుండా వెచ్చని దుస్తులు ధరించాలి.

వ్యాయామం: రోజూ 30 నిమిషాల పాటు తేలికపాటి వ్యాయామం లేదా యోగా చేయడం వల్ల బరువు నియంత్రణలో ఉంటుంది.

నిద్ర మరియు విశ్రాంతి: తగినంత నిద్ర పోవాలి. ఒత్తిడికి గురికాకుండా చూసుకోవాలి.

రెగ్యులర్ చెకప్: క్రమం తప్పకుండా థైరాయిడ్ పరీక్షలు చేయించుకుంటూ హార్మోన్ల స్థాయిని గమనించాలి.