Spending Some Time Alone Every Day: రోజులో కాసేపు ఒంటరిగా ఉండటం ఎందుకు మంచిది?

Spending Some Time Alone Every Day: ఉదయం లేచిన దగ్గర నుంచి రాత్రి పడుకునే వరకు చాలామంది ఏదో ఒక పనిలో బిజీగా ఉంటారు. ఆఫీస్, కుటుంబం, ఫోన్ కాల్స్, సోషల్ మీడియా, ఇంటి బాధ్యతలు.. ఇలా రోజంతా ఇతరులతో కనెక్ట్ అవుతూనే ఉంటారు. అయితే రోజులో కొంత సమయం మన కోసం కేటాయించుకోవడం కూడా అవసరమే అంటున్నారు నిపుణులు.

‘Me Time’ అంటే అందరినీ వదిలేసి ఎక్కువసేపు ఒంటరిగా ఉండటం కాదు. రోజులో కనీసం 15–30 నిమిషాలు మనకు నచ్చిన పనిని ఎలాంటి అంతరాయం లేకుండా చేసుకోవడం. ఈ సమయంలో పుస్తకం చదవడం, సంగీతం వినడం, మొక్కలకు నీళ్లు పోయడం, కాసేపు నడవడం, టీ లేదా కాఫీ ప్రశాంతంగా తాగడం, డైరీ రాయడం వంటి పనులు చేయవచ్చు.

ఎప్పుడూ ఇతరుల అవసరాలు, పనులు, మెసేజ్‌లు, ఫోన్ కాల్స్ గురించి ఆలోచిస్తూ ఉండటం వల్ల మనకు తెలియకుండానే మానసిక అలసట ఏర్పడొచ్చు. అందుకే కాసేపు మన ఆలోచనలను మనమే గమనించుకోవడానికి సమయం కేటాయించడం ఉపయోగకరంగా ఉంటుంది. ముఖ్యంగా ఫోన్‌ను పక్కన పెట్టి ‘Me Time’ గడపడం మరింత ప్రభావవంతంగా ఉంటుంది. సోషల్ మీడియా నుంచి కొద్దిసేపు దూరంగా ఉండటం వల్ల ఇతరులతో మన జీవితాన్ని పోల్చుకోవడం, నిరంతరం కొత్త సమాచారాన్ని తీసుకోవడం వంటి వాటి నుంచి కూడా విరామం లభిస్తుంది.

అయితే ‘Me Time’ అంటే రోజువారీ బాధ్యతల నుంచి పూర్తిగా తప్పించుకోవడం కాదు. మనసుకు కాస్త విరామం ఇచ్చి.. మళ్లీ ఉత్సాహంగా పనులను కొనసాగించేందుకు అవసరమైన చిన్న బ్రేక్‌గా భావించాలి.