Bill Gates: బిల్‌గేట్స్‌: ఎప్‌స్టీన్‌ సంబంధాలపై పశ్చాత్తాపం: 'ప్రతీ క్షణానికి చింతిస్తున్నా'

Bill Gates: ప్రపంచవ్యాప్తంగా సంచలనం రేపిన జెఫ్రీ ఎప్‌స్టీన్‌ సెక్స్‌ కుంభకోణం విషయంలో మైక్రోసాఫ్ట్‌ సహ వ్యవస్థాపకుడు బిల్‌గేట్స్‌ పేరు తెరపైకి వచ్చిన సంగతి తెలిసిందే. ఈ వ్యవహారంపై ఇటీవల స్పందించిన గేట్స్‌, ఎప్‌స్టీన్‌తో గడిపిన ప్రతీ క్షణానికి తాను ఇప్పుడు పశ్చాత్తాపం చెందుతున్నానని వెల్లడించారు. ఆస్ట్రేలియా మీడియా సంస్థతో మాట్లాడుతూ ఆయన ఈ వ్యాఖ్యలు చేశారు.

'ఎప్‌స్టీన్‌తో గడిపిన ప్రతీ సమయానికి నేను ఇప్పుడు చింతపడుతున్నాను. అందుకు నేను క్షమాపణలు చెబుతున్నాను. అయితే, ఆ ఈ-మెయిల్‌లో పేర్కొన్న విషయాలు సత్యం కావు. అప్పట్లో ఆయన ఆలోచనలు ఏమిటో నాకు తెలియదు. ఏదో ఒక విధంగా నన్ను లక్ష్యంగా చేసుకుని ప్రయత్నించాడా?' అని గేట్స్‌ ప్రశ్నించారు.

ఇటీవల అమెరికా న్యాయశాఖ విడుదల చేసిన 30 లక్షల పేజీల ఎప్‌స్టీన్‌ ఫైళ్లలో బిల్‌గేట్స్‌కు సంబంధించిన కొన్ని వివరాలు బయటపడ్డాయి. 2013లో ఎప్‌స్టీన్‌ తనకు తాను రాసుకున్న ఈ-మెయిల్‌లో, గేట్స్‌ రష్యన్‌ మహిళలతో లైంగిక సంబంధాలు పెట్టుకున్నాడని, అందువల్ల సుఖవ్యాధులకు గురయ్యాడని ఆరోపించాడు. ఆ విషయం బయటపడకుండా ఉండేందుకు తన మాజీ భార్య మిలిందాకు రహస్యంగా యాంటీబయాటిక్స్‌ ఇవ్వాలని కోరినట్లు పేర్కొన్నాడు. ఈ పరిణామాల తర్వాత గేట్స్‌ తనతో ఉన్న ఆరేళ్ల స్నేహాన్ని తెంచుకున్నాడని ఎప్‌స్టీన్‌ రాశాడు.

అయితే, ఈ ఈ-మెయిల్‌ విషయాలను బిల్‌గేట్స్‌ బృందం తోసిపుచ్చింది. ఇది పూర్తిగా అసత్యమని స్పష్టం చేసింది. మరోవైపు, ఈ ఫైళ్ల విడుదల తర్వాత మిలిందా గేట్స్‌ స్పందిస్తూ, 'నా వివాహ జీవితంలో కొన్ని బాధాకరమైన అంశాలు ఉన్నాయి. ఇప్పుడు బయటకు వచ్చిన వాటికి సమాధానం చెప్పాల్సింది బిల్‌గేట్స్‌. నేను కాదు. బాధిత మహిళలకు న్యాయం జరుగుతుందని ఆశిస్తున్నాను' అని అన్నారు.

మూడు దశాబ్దాలకు పైగా కొనసాగిన వివాహ బంధానికి 2021లో బిల్‌ మరియు మిలిందా గేట్స్‌ దంపతులు విడాకులు తీసుకున్నారు. ఎప్‌స్టీన్‌తో బిల్‌గేట్స్‌ సంబంధాలు మిలిందాకు నచ్చకపోవడమే ఈ విడాకులకు కారణమని అప్పట్లో పలు వార్తలు వచ్చాయి.