Bombshell Statement by Former President Trump: బాంబు పేల్చిన అధ్యక్షుడు ట్రంప్: “థర్డ్ వరల్డ్ దేశాల వలసను శాశ్వతంగా నిలిపివేస్తాం!"

Bombshell Statement by Former President Trump: శ్వేతసౌధం సమీపంలో కాల్పుల ఘటన నేపథ్యంలో అమెరికా అధ్యక్షుడు డొనాల్డ్ ట్రంప్ సంచలన నిర్ణయం ప్రకటించారు. పేద, అభివృద్ధి లేని 'థర్డ్ వరల్డ్' దేశాల నుంచి అమెరికాకు వలసలను శాశ్వతంగా నిలిపివేస్తామని ట్రంప్ పేర్కొన్నారు. ఈ నిర్ణయంపై అమెరికా యంత్రాంగం చర్యలు ప్రారంభించడంతో పాటు, వలసదారులకు అందే ప్రభుత్వ సబ్సిడీలు, ఫెడరల్ ప్రయోజనాలను కూడా రద్దు చేస్తున్నట్లు తెలిపారు. ట్రంప్ తన 'ట్రూత్ సోషల్' పోస్ట్‌లో ఈ విషయాన్ని వివరించారు.

అమెరికా వలస విధానాలు దేశ భద్రతకు, జీవన పరిస్థితులకు ముప్పుగా మారాయని ట్రంప్ విమర్శించారు. “మన సాంకేతిక ప్రగతి ఉన్నప్పటికీ, వలసల వల్ల మన వ్యవస్థ దెబ్బతింటోంది. అందుకే అమెరికా పూర్తిగా కోలుకునే వరకు థర్డ్ వరల్డ్ దేశాల నుంచి వలసలను శాశ్వతంగా నిలిపేస్తున్నాం. జో బైడెన్ ఆటోపెన్‌తో సంతకం చేసిన లక్షల మంది అక్రమ అడ్మిషన్లను రద్దు చేస్తాం. అమెరికాకు ఆస్తి కాని, దేశాన్ని ప్రేమించని వారిని బహిష్కరిస్తాం. అమెరికాయేతర పౌరులకు ఫెడరల్ ప్రయోజనాలు, సబ్సిడీలను నిలిపేస్తాం. దేశ ప్రశాంతతకు భంగం కలిగించే, భద్రతకు ముప్పుగా మారే వారిని తిరిగి పంపేస్తాం. తిరోగమన వలస విధానంతోనే ఈ లక్ష్యాలు సాధ్యమవుతాయి” అని ట్రంప్ పోస్ట్‌లో రాశారు.

ఈ నిర్ణయం వెనుక శ్వేతసౌధానికి రెండు బ్లాకుల దూరంలో బుధవారం మధ్యాహ్నం జరిగిన కాల్పుల దాడి ఘటనే కారణం. ఈ దాడిలో నేషనల్ గార్డ్‌కు చెందిన ఓ మహిళ సభ్యురాలు ప్రాణాలు కోల్పోగా, మరొకరు తీవ్రంగా గాయపడ్డారు. నిందితుడు అఫ్గానిస్తాన్‌కు చెందిన రెహ్మనుల్లా లకన్‌వాల్‌గా గుర్తించబడ్డాడు. సీఐఏ మద్దతు ఉన్న అఫ్గాన్ ప్రత్యేక సైనిక విభాగంలో కొన్ని కాలాలు పనిచేసిన అతడు, తర్వాత అమెరికాకు వలసగా వచ్చినట్లు తెలుస్తోంది. ఈ ఘటన నేపథ్యంలో ట్రంప్ వలసలపై కఠిన చర్యలు ప్రకటించారు. అఫ్గాన్‌తో పాటు మరో 18 దేశాల గ్రీన్ కార్డ్ హోల్డర్లను అధికారులు సమీక్షించనున్నారు.

'థర్డ్ వరల్డ్' దేశాలు అంటే పేద, అభివృద్ధి అంతగా లేని దేశాలు. దక్షిణ అమెరికా, ఆఫ్రికా, ఆసియాలోని అనేక దేశాలు ఈ జాబితాలో ఉన్నాయి. ప్రస్తుతం వీటిని తక్కువ ఆదాయ దేశాలుగా పిలుస్తున్నారు. దక్షిణ సూడాన్, సోమాలియా, నైగర్, బుర్కినా ఫాసో, బురుండి, అఫ్గానిస్తాన్, మడగాస్కర్, ఇథియోపియా, లైబీరియా, పాకిస్థాన్, సిరియా, ఉగాండా వంటి దేశాలు ఈ జాబితాలో భాగం. ఈ దేశాల నుంచి వలసలు అమెరికా భద్రతకు ముప్పుగా మారాయని ట్రంప్ ఆరోపిస్తున్నారు.

ఈ ప్రకటనపై అమెరికాలో వివాదాలు చెలరేగాయి. వలస సంస్థలు, మానవ హక్కుల సంస్థలు ఈ నిర్ణయాన్ని విమర్శిస్తున్నాయి. అయితే, ట్రంప్ మద్దతుదారులు దేశ భద్రత కోసం ఇది అవసరమని సమర్థిస్తున్నారు. ఈ చర్యలు అమెరికా వలస విధానాల్లో పెద్ద మలుపు తిరిగే అవకాశం ఉందని విశ్లేషకులు అంచనా వేస్తున్నారు.