Muhammad Yunus: బంగ్లాదేశ్‌లో కొత్త ప్రభుత్వ ఏర్పాటు సమయంలో.. తాత్కాలిక నాయకుడు ముహమ్మద్ యూనస్ తదుపరి పాత్ర ఏమిటి?

Muhammad Yunus: బంగ్లాదేశ్ సార్వత్రిక ఎన్నికల్లో భారీ విజయం సాధించిన బంగ్లాదేశ్ నేషనలిస్ట్ పార్టీ (బీఎన్‌పీ) ఛైర్మన్ తారిక్ రెహమాన్ నేతృత్వంలో కొత్త ప్రభుత్వం ఏర్పాటుకు సన్నాహాలు ముమ్మరంగా సాగుతున్నాయి. క్యాబినెట్ కూర్పుపై చర్చలు జరుగుతున్న నేపథ్యంలో, ఇప్పటివరకు తాత్కాలిక ప్రభుత్వ సారథిగా (ప్రధాన సలహాదారుడిగా) వ్యవహరించిన నోబెల్ శాంతి బహుమతి గ్రహీత ముహమ్మద్ యూనస్ తదుపరి దిశ ఏమిటనే అంశం ఆసక్తి రేపుతోంది. క్లిష్ట సమయంలో దేశాన్ని స్థిరపరిచిన ఆయన, కొత్త ప్రభుత్వంలో ఏదైనా కీలక పాత్ర పోషిస్తారా? అనే ప్రశ్నలు వినిపిస్తున్నాయి.

2024 ఆగస్టు నెలలో మాజీ ప్రధాని షేక్ హసీనా దేశాన్ని వీడిన తర్వాత, తీవ్ర అస్థిరత నెలకొన్న సమయంలో ముహమ్మద్ యూనస్ తాత్కాలిక ప్రభుత్వ ప్రధాన సలహాదారుగా బాధ్యతలు స్వీకరించారు. దాదాపు 18 నెలల పాటు ఆయన ఈ పాత్రలో కొనసాగారు. ఈ కాలంలో ఎన్నికల నిర్వహణ సాఫీగా జరిగేలా చూశారు. అలాగే, రాజకీయ వ్యవస్థలో సంస్కరణలకు బలమైన పునాది వేశారు. ఒకే వ్యక్తి రెండు సార్లు ప్రధాని పదవి చేపట్టకుండా పరిమితి విధించడం, స్వతంత్ర న్యాయవ్యవస్థ బలోపేతం, మహిళలకు ఎక్కువ ప్రాతినిధ్యం, ఎన్నికల సమయంలో నిష్పక్షపాత తాత్కాలిక ప్రభుత్వాల ఏర్పాటు వంటి ముఖ్య సిఫార్సులు చేశారు. ఈ సంస్కరణలపై జరిగిన రిఫరెండమ్‌లో తాజా ఎన్నికల్లో మెజారిటీ ప్రజలు మద్దతు తెలిపారు.

కొత్త ప్రభుత్వంలో యూనస్ పాత్రపై ఊహాగానాలు

బీఎన్‌పీ నేతృత్వంలో ఏర్పడబోయే ప్రభుత్వంలో యూనస్‌కు ముఖ్యమైన బాధ్యతలు అప్పగించే అవకాశం ఉందని రాజకీయ విశ్లేషకులు అంచనా వేస్తున్నారు. అంతర్జాతీయంగా ఆయనకున్న బలమైన సంబంధాలు, గుర్తింపు దృష్ట్యా అధ్యక్ష పదవికి ఆయనను ఎంచుకునే అవకాశం ఉందని కొందరు విశ్లేషకులు, ముఖ్యంగా కాలమిస్ట్ డేవిడ్ బెర్గ్‌మన్ వ్యాఖ్యానించారు. ప్రపంచ స్థాయిలో బంగ్లాదేశ్ నుంచి వచ్చిన నాయకుల్లో యూనస్‌కు సమానమైన గుర్తింపు మరెవరికీ లేదని ఆయన అన్నారు. బీఎన్‌పీతో యూనస్ మధ్య ఇలాంటి చర్చలు జరిగాయనే వార్తలు వచ్చినప్పటికీ, యూనస్ వర్గాలు వాటిని ఖండించాయి. రాజకీయాలపై ఆయనకు పెద్దగా ఆసక్తి లేదని వారు చెప్పారు.

అయితే, సంక్షోభ సమయంలో యూనస్ చూపిన నాయకత్వాన్ని గుర్తించి, తారిక్ రెహమాన్ ఆయన సేవలను ఉపయోగించుకునే అవకాశం ఉందని విశ్లేషకులు అంటున్నారు. ముఖ్యంగా రాజకీయ లేదా ఆర్థిక సలహాదారుగా, లేదా ఏదైనా ప్రత్యేక బాధ్యతల్లో ఆయనను నియమించే అవకాశాలు ఉన్నాయని చెబుతున్నారు. ప్రస్తుతానికి యూనస్ ఏమీ అధికారికంగా ప్రకటించకపోయినా, బీఎన్‌పీ నుంచి వచ్చే ప్రతిపాదనను ఆమోదించే అవకాశాలే ఎక్కువగా ఉన్నట్లు సమాచారం.