US Supreme Court: జన్మతః పౌరసత్వం పరిరక్షణ: అమెరికా సుప్రీం కోర్టు తీర్పుపై ఇండో-అమెరికన్ల హర్షం

US Supreme Court: అమెరికాలో విదేశీ వలసదారుల పిల్లలకు జన్మతః పౌరసత్వం కల్పించే విధానాన్ని పరిరక్షిస్తూ సుప్రీం కోర్టు ఇచ్చిన కీలక తీర్పుపై భారతీయ అమెరికన్ సమాజం సంతోషం వ్యక్తం చేస్తోంది. అధ్యక్షుడు డొనాల్డ్ ట్రంప్ వేసిన పిటిషన్‌ను కోర్టు మంగళవారం కొట్టివేసింది.

అక్రమ వలసదారులు మరియు తాత్కాలిక వీసాలు కలిగిన వారి పిల్లలు అమెరికాలో జన్మిస్తే వారిని అమెరికన్ పౌరులుగా పరిగణించాలని సుప్రీం కోర్టు స్పష్టం చేసింది. ఈ తీర్పు వలస కుటుంబాలకు గొప్ప భరోసా కల్పించిందని ఇండియన్ అమెరికన్ ఇంపాక్ట్ సంస్థ ఎగ్జిక్యూటివ్ డైరెక్టర్ చింతన్ పటేల్ అన్నారు. ట్రంప్ జారీ చేసిన కార్యనిర్వాహక ఉత్తర్వులు ప్రత్యక్షంగా భారత్, దక్షిణాసియా వలస కుటుంబాలను ప్రభావితం చేసేవని ఆయన పేర్కొన్నారు.

ఈ తీర్పును ‘చరిత్రాత్మక విజయం’గా అభివర్ణించిన ఇండియన్ అమెరికన్ కమ్యూనిటీ లీడర్ అజయ్ జైన్ బుటోరియా, ఇది అనేక కుటుంబాల భవిష్యత్తును కాపాడిందని తెలిపారు. అమెరికాలో సుమారు 52 లక్షల మంది ఇండో-అమెరికన్లు ఉన్నారని, వారిలో 12 లక్షల మందికి పైగా ఉద్యోగ ఆధారిత గ్రీన్ కార్డుల కోసం దీర్ఘకాలంగా ఎదురుచూస్తున్నారని ఎఫ్‌ఐఐడీఎస్ అధ్యక్షుడు ఖండేరావ్ కంద్ వివరించారు.

ప్రస్తుతం అమెరికాలో 6 నుంచి 7 లక్షల మంది హెచ్-1బీ వీసా హోల్డర్లు ఉన్నారని, వారిలో 70 శాతానికి పైగా భారతీయులేనని అంచనాలు చెబుతున్నాయి. సుప్రీం కోర్టు తీర్పు హెచ్-1బీ వీసాదారులకు కూడా గణనీయమైన ఊరట కల్పిస్తుందని భావిస్తున్నారు.

ఈ నిర్ణయం అమెరికా వలస విధానాల్లో ముఖ్యమైన మలుపుగా పరిగణించబడుతోంది.