Nobel Peace Prize Laureate Narges Mohammadi: ఇరాన్: నోబెల్ శాంతి పురస్కార విజేత నర్గెస్ మొహమ్మదికి మరో ఏడున్నర ఏళ్ల జైలు శిక్ష

Nobel Peace Prize Laureate Narges Mohammadi: నోబెల్ శాంతి పురస్కార గ్రహీత నర్గెస్ మొహమ్మది (53)కు ఇరాన్ న్యాయస్థానం మరో ఏడున్నర ఏళ్ల జైలు శిక్ష విధించింది. దీంతోపాటు దేశం విడిచి వెళ్లకుండా రెండేళ్ల పాటు నిషేధం, రెండేళ్ల అంతర్గత బహిష్కరణ (దక్షిణ ఖొరాసాన్ ప్రావిన్స్‌లోని ఖోస్ఫ్ నగరానికి) కూడా విధించారు. ఈ శిక్షను మష్హద్‌లోని విప్లవ న్యాయస్థానం శనివారం విధించినట్లు ఆమె న్యాయవాది మోస్తాఫా నిలీ వెల్లడించారు.

నర్గెస్ మొహమ్మది ఫిబ్రవరి 2 నుంచి జైలులో నిరాహార దీక్ష చేస్తున్నారు. ఆమె మద్దతుదారులు, న్యాయవాది ద్వారా ఆమెతో మాట్లాడిన తర్వాత ఈ శిక్ష వివరాలు వెలుగులోకి వచ్చాయి. ప్రజలను రెచ్చగొట్టడం, ప్రభుత్వానికి వ్యతిరేకంగా కుట్ర, రాష్ట్ర వ్యతిరేక ప్రచారం చేసినట్లు ఆరోపణలు ఉన్నాయి. దీనిలో ఆరేళ్లు 'గ్యాదరింగ్ అండ్ కల్యూజన్ టు కమిట్ క్రైమ్స్' (సమావేశం, కుట్ర) కింద, ఏడాదిన్నర 'ప్రచారం అగైన్స్ట్ ది గవర్న్‌మెంట్' కింద విధించారు.

ఇరాన్ ప్రభుత్వం నుంచి ఇంకా ఎలాంటి అధికారిక ప్రకటన రాలేదు. ఈ శిక్షతో నర్గెస్ మొహమ్మదికి జీవితకాలం మొత్తం 44 ఏళ్లకు పైగా జైలు శిక్షలు పడినట్లు ఆమె సంస్థ (నర్గెస్ ఫౌండేషన్) తెలిపింది.

మహిళా హక్కుల కోసం మూడు దశాబ్దాలుగా పోరాడుతున్న నర్గెస్ మొహమ్మది ఇప్పటికే అనేకసార్లు జైలు పాలయ్యారు. కొరడా దెబ్బలు, హింసను ఎదుర్కొన్నారు. 2023లో జైలులో ఉండగానే ఆమెకు నోబెల్ శాంతి బహుమతి లభించింది. ఇరాన్‌లో మహిళల హక్కులు, మానవ హక్కుల కోసం ఆమె చేస్తున్న పోరాటానికి అంతర్జాతీయ స్థాయిలో గుర్తింపు లభించింది.

ఈ శిక్ష ఇరాన్‌లో భిన్నాభిప్రాయాలపై, మానవ హక్కుల కార్యకర్తలపై కొనసాగుతున్న అణచివేతను మరింత స్పష్టం చేస్తోంది.