Mojtaba Khamenei: ఇరాన్‌ పునర్నిర్మాణం కోసం ప్రజలు ముందుకు రావాలి: మొజ్తాబా ఖమేనీ

Mojtaba Khamenei: అమెరికా-ఇజ్రాయెల్ దేశాలు ఇరాన్‌పై అకారణంగా, నీచమైన దాడులు చేస్తున్నాయని ఇరాన్ సుప్రీం నేత మొజ్తాబా ఖమేనీ తీవ్రంగా మండిపడ్డారు. ఈ దాడుల వల్ల దెబ్బతిన్న మౌలిక సదుపాయాలను (ఇన్‌ఫ్రాస్ట్రక్చర్) తిరిగి నిర్మించి, దేశాన్ని పునరుద్ధరించడానికి ప్రజలంతా నడుం బిగించాలని ఆయన ప్రజలకు పిలుపునిచ్చారు.

ఇస్లామిక్ రిపబ్లిక్ డే సందర్భంగా ప్రజలను ఉద్దేశించి విడుదల చేసిన సందేశంలో మొజ్తాబా ఖమేనీ ఈ వ్యాఖ్యలు చేశారు. అమెరికా-ఇజ్రాయెల్ దురాక్రమణ దాడుల కారణంగా ఇరాన్‌లో మౌలిక సదుపాయాలు మాత్రమే కాకుండా పర్యావరణం కూడా తీవ్రంగా దెబ్బతిన్నట్లు ఆయన పేర్కొన్నారు. ఈ నేపథ్యంలో దేశ అంతర్గత అభివృద్ధిపై దృష్టి సారించి, ఇరాన్ ఉజ్వల భవిష్యత్తు కోసం అందరూ కృషి చేయాల్సిన అవసరం ఉందని ఆయన ఉద్ఘాటించారు.

ఈ సందర్భంగా మొజ్తాబా ఖమేనీ మినాబ్‌లోని ఒక పాఠశాలపై జరిగిన దాడిని ప్రత్యేకంగా ప్రస్తావించారు. ఆ దాడిలో 186 మంది ప్రాణాలు కోల్పోయారని తెలిపారు. ఈ ఘటనలో మృతులకు నివాళిగా పట్టణాలు, గ్రామాల్లో మొక్కలు నాటే కార్యక్రమంలో అందరూ సక్రియంగా పాల్గొనాలని పిలుపునిచ్చారు. యుద్ధంలో ప్రాణాలు కోల్పోయిన వారిని స్మరించుకుంటూ ఇరాన్ ప్రజలు వ్యాప్తంగా మొక్కలు నాటనున్నట్లు ఆయన సందేశంలో పేర్కొన్నారు.

ఇరాన్ సుప్రీం నేత మొజ్తాబా ఖమేనీ ఈ పిలుపు ద్వారా దేశం ఎదుర్కొంటున్న సవాళ్లను ఎదుర్కొని, బలమైన ఇరాన్‌ను తిరిగి నిర్మించడానికి ప్రజలను సమీకరించేందుకు ప్రయత్నించారు.