Pakistan: బలోచ్ మిలిటెంట్ సమూహం ఇద్దరు మహిళా ఆత్మాహుతి దాడిదారుల ఫోటోలు విడుదల.. పాక్ దళాలపై భారీ దాడులు!

Pakistan: పాకిస్థాన్‌లోని బలోచిస్థాన్ ప్రావిన్స్‌లో ఇటీవల జరిగిన భారీ దాడులకు బాధ్యత తీసుకున్న బలోచిస్థాన్ లిబరేషన్ ఆర్మీ (BLA) తమ వైపు నుంచి ఆత్మాహుతి దాడులకు పాల్పడిన ఇద్దరు మహిళల ఫోటోలను విడుదల చేసింది. ఈ దాడుల్లో పాకిస్థాన్ భద్రతా దళాలు, సిబ్బందిపై లక్ష్యంగా చేసుకుని జరిగిన దాడుల్లో ఇద్దరు మహిళా ఆత్మాహుతి బాంబర్లు పాల్గొన్నట్లు BLA ప్రకటనలో వెల్లడించింది.

ఈ ఇద్దరిలో ఒకరైన 24 ఏళ్ల ఆసిఫా మెంగల్ అనే యువతి చేసిన ఆత్మాహుతి దాడిలో పాక్ భద్రతా సిబ్బందితో పాటు సుమారు 50 మంది మృతి చెందినట్లు BLA తెలిపింది. మరో మహిళా ఆత్మాహుతి బాంబర్ చేసిన దాడిలో కూడా అనేక మంది ప్రాణాలు కోల్పోయారని పేర్కొంది. అయితే ఆ రెండో బాంబర్ పేరును మాత్రం వెల్లడించలేదు. బలోచిస్థాన్ అంతటా భద్రతా దళాలను లక్ష్యంగా చేసుకుని 'హీరోఫ్' పేరుతో రెండో దశ ఆపరేషన్‌ను ప్రారంభించనున్నట్లు BLA ఆదివారం ప్రకటించింది.

ఈ దాడులపై పాకిస్థాన్ రక్షణ మంత్రి ఖవాజా ఆసిఫ్ స్పందిస్తూ.. ఆత్మాహుతి దాడుల్లో ఇద్దరు మహిళలు పాల్గొన్నట్లు గుర్తించామని తెలిపారు. బలోచిస్థాన్ ముఖ్యమంత్రి సర్ఫరాజ్ బుగతీ మాట్లాడుతూ.. గత 40 గంటలుగా భద్రతా దళాలు ఉగ్రవాద నిర్మూలన చర్యలు కొనసాగిస్తున్నాయని, ఇప్పటివరకు 140 మందికి పైగా వేర్పాటువాదులను మట్టుబెట్టామని వెల్లడించారు.

పాక్ మిలిటరీ వర్గాలు తెలిపిన వివరాల ప్రకారం.. స్థానిక పౌరుల వేషధారణలో ఉన్న బలోచ్ రెబల్స్ పాఠశాలలు, బ్యాంకులు, మార్కెట్లు, ఆసుపత్రుల్లోకి ప్రవేశించి కాల్పులు జరుపుతున్నారు. ఏదైనా నగరం లేదా వ్యూహాత్మక స్థావరాన్ని స్వాధీనం చేసుకోవాలని ప్రయత్నిస్తున్నప్పటికీ, భద్రతా దళాలు వాటిని సమర్థవంతంగా తిప్పికొడుతున్నాయని పేర్కొన్నాయి.

ఈ ఘటన బలోచిస్థాన్‌లో కొనసాగుతున్న ఉద్రిక్తతలను మరింత పెంచినట్లు కనిపిస్తోంది. BLA తమ ఆపరేషన్‌లో మహిళలను ఆత్మాహుతి దాడిదారులుగా ఉపయోగించడం ద్వారా ప్రచారాన్ని కూడా చేస్తోంది.