Paris Museum Heist: పారిస్ మ్యూజియం చోరీ: రూ.895 కోట్ల విలువైన నగలు దొంగిలించిన పింక్ పాంథర్స్ గ్యాంగ్?
రూ.895 కోట్ల విలువైన నగలు దొంగిలించిన పింక్ పాంథర్స్ గ్యాంగ్?
Paris Museum Heist: ఫ్రాన్స్‌లోని ప్రసిద్ధ లౌవ్రే మ్యూజియంలో జరిగిన చోరీ ఘటన ప్రపంచవ్యాప్తంగా కలకలం రేపింది. అతి భద్రమైన ఈ మ్యూజియంలోకి చొరబడిన కుట్రదారులు కేవలం కొన్ని నిమిషాల్లోనే అపూర్వ ఆభరణాలను దొంగిలించి పరారయ్యారు. దొంగిలించిన నగల విలువ సుమారు రూ.895 కోట్లకు చేరిందని అధికారులు అంచనా వేస్తున్నారు. ఈ చోరీకి దారితీసినవారు ఎవరనేది ఇప్పటికే తేలలేదు. అయితే, ప్రసిద్ధ దొంగల ముఠా పింక్ పాంథర్స్ గ్యాంగ్ (Pink Panther Gang) చేతిలో ఉండొచ్చనే అనుమానాలు లేవనెత్తుతున్నాయి.
ఈ చోరీ పట్ల పరిశోధనలు కొనసాగుతున్నా, దొంగల తీరు పింక్ పాంథర్స్‌ను గుర్తుచేస్తోంది. వీరు అతి ధైర్యంగా, ఎటువంటి ఆధారాలు వదలకుండా పని పూర్తి చేసి వెళ్తారు. ''మ్యూజియంలో చోరీ చేసినవారు పూర్తి వృత్తిపరమైన దొంగలుగా కనిపిస్తున్నారు. ఇప్పటివరకు వారి ఆచూకీ ఏమీ దొరకలేదు. సమాచారం, ప్రణాళికతో చేసిన ఈ చోరీ పింక్ పాంథర్స్ పని అనిపిస్తోంది'' అని ఫ్రాన్స్ పోలీస్ స్క్వాడ్‌లో మాజీ చీఫ్ బ్యారీ ఫిలిప్స్ అభిప్రాయపడ్డారు.
పింక్ పాంథర్స్ గ్యాంగ్ గురించి...
ఈ దొంగల ముఠా గత దశాబ్దాలుగా ప్రపంచవ్యాప్తంగా భారీ చోరీలకు పాల్పడుతోంది. బహిరంగంగానే దొంగతనాలు చేయడం వీరి సంతకం. ముఖ్యంగా ఆభరణాలు, వజ్రాలను లక్ష్యంగా చేసుకుంటారు. 35 దేశాల్లో సుమారు 500 మిలియన్ డాలర్ల విలువైన ఆభరణాలను దొంగిలించినట్లు ఆధారాలు ఉన్నాయి. ఈ గ్యాంగ్‌లో ఎక్కువ మంది తూర్పు ఐరోపా నుంచి వచ్చినవారే. నైపుణ్యం కలిగిన వ్యక్తులను చేర్చుకుని చోరీలు చేస్తారు.
1990ల్లో బోస్నియా యుద్ధంలో పాల్గొన్న సెర్బియన్ స్పెషల్ ఫోర్సెస్ సభ్యులు కూడా ఈ ముఠాలో ఉన్నారని ఇంటర్‌పోల్ గతంలో గుర్తించింది. మాజీ సైనికుల కారణంగా మిలిటరీ స్థాయి క్రమశిక్షణతో ప్లానింగ్ చేస్తారు. లక్ష్యాలపై ముందుగానే పరిశోధన చేసి, పథకాలు రచిస్తారు. చోరీ తర్వాత నకిలీ పాస్‌పోర్టులతో దేశాలు దాటేస్తారు. అంతర్జాతీయ నెట్‌వర్క్‌తో దొంగిలించిన వస్తువులను కరిగించి లేదా ఆకృతి మార్చి మార్కెట్‌లో అమ్ముతారు.
45 సెకన్లలో చోరీ సాహసం..
ఒకసారి ఈ పింక్ పాంథర్స్ గ్యాంగ్ దుబాయ్‌లోని ఓ మాల్‌లో చోరీ చేసింది. కార్లతో దుకాణంలోకి దూసుకెళ్లి, 45 సెకన్లలోనే వజ్రాలు, ఆభరణాలు దొంగిలించి పరారయ్యారు. జపాన్, బ్రిటన్‌లో చరిత్రలోనే అతిపెద్ద నగల చోరీలకు వీరే కారణం. 2003లో లండన్‌లోని ఓ దుకాణంలో హాలీవుడ్ చిత్రం 'పింక్ పాంథర్'లాంటి ట్రిక్‌తో వజ్రాలు చోరీ చేసి, ఆ తర్వాత ఈ పేరు వచ్చింది.
మ్యూజియం చోరీ వివరాలు..
అక్టోబర్ 19న పారిస్‌లోని లౌవ్రే మ్యూజియంలో ఈ సంఘటన జరిగింది. నిర్మాణం జరుగుతున్న ప్రదేశం నుంచి దుండగులు లోపలికి చొరబడ్డారు. సరుకు ఎలివేటర్‌లో అపోలో గ్యాలరీలోకి ప్రవేశించి, అద్దాలను పగలగొట్టారు. నెపోలియన్ కాలం వస్తువులు, ఆభరణాలు ఉన్న గ్యాలరీ నుంచి తొమ్మిది వస్తువులు దొంగిలించారు. పరార్ సమయంలో ఒక ఆభరణం మ్యూజియం బయట పడిపోయింది. మిగిలినవి విలువ 88 మిలియన్ యూరోలు (రూ.895 కోట్లు). దుండగులను పట్టుకోవడానికి 100 మందితో దర్యాప్తు చేస్తున్నారు.