TTP’s Stern Warning to Asim Munir: ఆసిం మునీర్‌కు తీవ్ర హెచ్చరిక: ‘దమ్ముంటే మమ్మల్ని ఎదుర్కో’.. పాక్ ఆర్మీ చీఫ్‌పై టీటీపీ సవాలు!

TTP’s Stern Warning to Asim Munir: పాకిస్థాన్‌లో ఉగ్రవాద కార్యకలాపాలు, అఫ్గానిస్థాన్‌తో సరిహద్దు ఉద్రిక్తతలు దేశాన్ని కలవరపరుస్తున్నాయి. ఇటీవల తెహ్రీక్-ఇ-తాలిబాన్ పాకిస్థాన్ (టీటీపీ) ఉగ్రవాదులు పాక్ ఆర్మీ చీఫ్ ఆసిం మునీర్ (ఆసిం మునీర్)పై బహిరంగ బెదిరింపులు చేశారు. ‘దమ్ముంటే మమ్మల్ని ఎదుర్కో’ అంటూ సవాలు విసిరుతూ వీడియోలు విడుదల చేశారు. తమపై సామాన్య సిపాయిలను పంపకుండా, ఉన్నతాధికారులే యుద్ధభూమిలోకి దిగాలని డిమాండ్ చేశారు. అలాగే, అక్టోబర్ 8న ఖైబర్ పఖ్తుంఖ్వా ప్రావిన్స్‌లో జరిగిన దాడి దృశ్యాలను కూడా ప్రకటించారు.

టీటీపీ వీడియోలో కనిపించిన కమాండర్ కాజిమ్‌ అనే వ్యక్తి మునీర్‌ను నేరుగా లక్ష్యంగా చేసుకుని హెచ్చరించాడు. ఈ బెదిరింపులు పాక్ అధికారులను తీవ్రంగా కలచివేశాయి. కాజిమ్ తలపై 10 కోట్ల పాకిస్థానీ రూపాయల రివార్డు ప్రకటించారు. అతడి గురించి సమాచారం అందించినవారికి ఆ మొత్తాన్ని ఇస్తామని పాక్ ప్రభుత్వం ప్రకటించింది.

అఫ్గానిస్థాన్ భూభాగాన్ని ఉపయోగించుకుంటూ దాడులు చేస్తున్న టీటీపీ ఉగ్రవాదులపై కఠిన చర్యలు తీసుకోవాలని పాకిస్థాన్ డిమాండ్ చేసింది. అయితే, సరిహద్దుల్లో ఉగ్రవాదులకు ఆశ్రయం అందిస్తున్నారనే ఆరోపణలను అఫ్గాన్ ప్రభుత్వం తిరస్కరించింది. ఈ వివాదం ఇరుదేశాల మధ్య తీవ్ర ఘర్షణలకు దారితీసింది. ఉగ్రవాదుల ఏరివేత పేరుతో పాక్ చేసిన దాడులకు ప్రతీకారంగా అఫ్గాన్ కాల్పులు జరిపింది. ఈ ఉద్రిక్తతలు కొన్ని రోజుల పాటు కొనసాగాయి. చివరికి ఖతార్ రాజధాని దోహాలో జరిగిన రెండు దఫాల చర్చల్లో ఇరుదేశాలు తక్షణ కాల్పుల విరమణకు అంగీకరించాయి. శాశ్వత శాంతి, స్థిరత్వం కోసం ఇది ముఖ్య దశ అని ఖతార్ విదేశాంగ శాఖ ప్రకటించింది.