US Government Clarifies Green Card Rules: గ్రీన్కార్డులపై అమెరికా సర్కారు స్పష్టీకరణ.. దరఖాస్తుదారులు యూఎస్లోనే ఉండొచ్చు
దరఖాస్తుదారులు యూఎస్లోనే ఉండొచ్చు
US Government Clarifies Green Card Rules: అమెరికాలో శాశ్వత నివాసం (గ్రీన్ కార్డు) పొందేందుకు దరఖాస్తు చేసుకునే వలసదారులు దేశాన్ని వదిలి వెళ్లాల్సిన అవసరం లేదని అమెరికా హోమ్లాండ్ సెక్యూరిటీ శాఖ (DHS) స్పష్టం చేసింది. ఇటీవల వచ్చిన కొత్త మార్గదర్శకాలపై వివరణ ఇస్తూ ఈ ప్రకటన చేసింది.
మే 21న యూఎస్ సిటిజన్షిప్ అండ్ ఇమిగ్రేషన్ సర్వీసెస్ (USCIS) జారీ చేసిన మార్గదర్శకాలు గ్రీన్ కార్డు దరఖాస్తుదారుల్లో గందరగోళం సృష్టించాయి. తాత్కాలిక వీసాలపై ఉన్నవారు గ్రీన్ కార్డు ప్రక్రియ కోసం స్వదేశానికి వెళ్లాల్సి ఉంటుందని ఆ ప్రకటనలో పేర్కొన్నారు. దీనిపై విస్తృతంగా విమర్శలు వచ్చాయి.
దీనికి స్పందించిన DHS, ఇది ఎలాంటి విస్తృత విధాన మార్పు కాదని వివరించింది. గ్రీన్ కార్డు దరఖాస్తు ప్రక్రియను అమెరికాలోనే పూర్తి చేయాలా లేదా స్వదేశం నుంచి చేయాలా అనేది ఇమిగ్రేషన్ అధికారి కేసు కేసును బట్టి నిర్ణయిస్తారని తెలిపింది. ఇది ఎప్పటినుంచో అమల్లో ఉన్న నిబంధనేనని, కేవలం అధికారులకు గుర్తు చేయడమే లక్ష్యమని స్పష్టం చేసింది.
దరఖాస్తు పరిశీలన జరుగుతున్న సమయంలో కూడా వలసదారులు అమెరికాలోనే ఉండేందుకు అనుమతి ఉంటుందని DHS వెల్లడించింది. అయితే వీసా ఓవర్స్టేలు, ఇతర ఇమిగ్రేషన్ ఉల్లంఘనలను మాత్రం పరిగణనలోకి తీసుకుంటామని సూచించింది.
ఈ స్పష్టీకరణతో గ్రీన్ కార్డు ఆశలు పెంచుకున్న వారికి కొంత ఊరట లభించినప్పటికీ, ఏ పరిస్థితుల్లో దేశం వదిలి వెళ్లాల్సి వస్తుందనే విషయంపై పూర్తి స్పష్టత ఇవ్వలేదు. దీంతో వలసదారుల్లో మిగతా సందేహాలు కొనసాగుతున్నాయి.
ఈ మార్పులు ఉపాధి, కుటుంబ ఆధారిత గ్రీన్ కార్డు దరఖాస్తులపై ప్రభావం చూపవచ్చని నిపుణులు అంటున్నారు. మరిన్ని వివరాల కోసం అధికారిక USCIS వెబ్సైట్ను సంప్రదించాలని సూచించారు.