US Shutdown Impact: హెచ్‌1బీ వీసాల ప్రాసెసింగ్‌పై అమెరికా షట్‌డౌన్‌ ప్రభావం!
అమెరికా షట్‌డౌన్‌ ప్రభావం!
డీఓఎల్‌ కార్యాలయాలు మూసివేత.. ఎల్‌సీఏ ఫైలింగ్‌లు ఆగిపోయే అవకాశం
యూఎస్‌సీఐఎస్‌ కొనసాగినా.. కొన్ని ప్రక్రియల్లో ఆలస్యాలు తప్పవు
US Shutdown Impact: అమెరికా ప్రభుత్వం అక్టోబర్‌ 1 నుంచి షట్‌డౌన్‌లోకి వెళ్లిన నేపథ్యంలో ఇమ్మిగ్రేషన్‌ సర్వీసులపై తీవ్ర ప్రభావం పడే అవకాశాలు కనిపిస్తున్నాయి. ముఖ్యంగా హెచ్‌-1బీ వీసాల ప్రాసెసింగ్‌లో ఆలస్యాలు ఏర్పడనున్నాయి. కాంగ్రెస్‌ ఫెడరల్‌ ఫండింగ్‌ బిల్లును ఆమోదించకపోవడంతో సెప్టెంబర్‌ 30తో ఫిస్కల్‌ ఇయర్‌ ముగియడంతో షట్‌డౌన్‌ అమల్లోకి వచ్చింది. దీంతో అనేక ప్రభుత్వ డిపార్ట్‌మెంట్లు మూసివేయబడ్డాయి.
యూఎస్‌ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్‌ (యూఎస్‌సీఐఎస్‌) ఎక్కువగా అప్లికేషన్‌ ఫీలతో నడుస్తుంది కాబట్టి, చాలా వరకు కార్యకలాపాలు కొనసాగుతాయి. హెచ్‌-1బీ పిటిషన్లు, ఎక్స్‌టెన్షన్లు, అమెండ్‌మెంట్లు వంటివి సాధారణంగా ప్రాసెస్‌ అవుతాయి. అయితే, డిపార్ట్‌మెంట్‌ ఆఫ్‌ లేబర్‌ (డీఓఎల్‌) పూర్తిగా మూసివేయబడుతుంది. దీంతో హెచ్‌-1బీ వీసాలకు అవసరమైన లేబర్‌ కండిషన్‌ అప్లికేషన్‌ (ఎల్‌సీఏ) ఫైలింగ్‌ ఆగిపోతుంది. కొత్త హెచ్‌-1బీ అప్లికేషన్లు దాఖలు చేయాలంటే ఎల్‌సీఏ తప్పనిసరి కాబట్టి, ఇవి ఆలస్యమవుతాయి.
అలాగే, పర్మనెంట్‌ లేబర్‌ సర్టిఫికేషన్‌ (పెర్మ్‌) ప్రక్రియ కూడా ఆగిపోతుంది. ఇది గ్రీన్‌కార్డ్‌ ప్రాసెస్‌కు కీలకం. స్టేట్‌ డిపార్ట్‌మెంట్‌లో వీసా స్టాంపింగ్‌ సర్వీసులు కూడా పరిమితమవుతాయి. ఇండియాలోని యూఎస్‌ ఎంబసీ, కాన్సులేట్లలో వీసా అపాయింట్‌మెంట్లు ఆలస్యమవుతాయి లేదా రద్దవుతాయి.
భారతీయ ఐటీ నిపుణులు హెచ్‌-1బీ వీసాలపై ఎక్కువగా ఆధారపడటంతో, ఈ షట్‌డౌన్‌ వారిపై తీవ్ర ప్రభావం చూపనుంది. ఇటీవల హెచ్‌-1బీ వీసాలపై $100,000 ఫీజు విధించిన నేపథ్యంలో ఇది మరింత ఇబ్బందికరంగా మారింది. ఇమ్మిగ్రేషన్‌ నిపుణులు షట్‌డౌన్‌ ఎంతకాలం కొనసాగుతుందనేది కీలకమని చెబుతున్నారు. ప్రస్తుతం కాంగ్రెస్‌లో చర్చలు జరుగుతున్నాయి, త్వరలోనే పరిష్కారం వచ్చే అవకాశం ఉంది.
షట్‌డౌన్‌ సమయంలో ఈ-వెరిఫై సిస్టమ్‌ కూడా ఆగిపోతుంది. దీంతో కొత్త ఉద్యోగులను హైర్‌ చేయడంలో కంపెనీలు ఇబ్బందులు ఎదుర్కొంటాయి. అయితే, అత్యవసర సర్వీసులు మాత్రం కొనసాగుతాయి.